Is 23 - Mam Ostuncalco Bible

Tpakb'alilju' tzul kyi'j Tiro ex Sidon

1Tpakb'alilju' tzul ti'j Tiro:

Nche t'i'njneju' kyb'ark aj Tarsis,

qu'n matxi' b'ajxitju' ttzitnam.

Aju' janche ula'toq tzajniqe' Chipre

matxi' kyej naj.

2Numliqe' xjal aj Tiro exqe' xk'aẍlel aj Sidon.

Intoq cheb'ji'k'xju' kyxq'uqil toj ninnjab'.

3Ex kyoju' a' nimaq a'.

Inxi'xtoq che kanb'an

ti'ju' twitz kyawal njaw toj tnam Syor, ex kyawal njaw ttzi nin a' Nilo,

ex intoq che xk'aẍlen kyuky'i'l nimaqtnam.

4Ch'ixwenku'ya, Sidon, tkuwil ninnjab',

qu'n ati tu'n txitma'na:

Mixti'tl k'ixk'oj wi'je' tu'n wnaq, min nchin alantle'.

Mixti'tl wale' q'a tu'n kych'iset

mixti'tl wale' txin tu'n kyxnaq'tzet, chiku'ya.

5Ajtpon tqanil kyej aj Ejipt,

che oq'el tu'nju' xb'aj kyi'j aj Tiro.

6Kkyma': Kukyxi'ye' Tarsis,

che oq'e' aye' najlqe'ye' mlaj.

7¿Ma atzun nintnam ja'lu ojtxi'xi'x

amiw kyoju' tzalajb'il ex tzeb'l?

¿Ma atzun ntoq b'etju'

tu'n txi' najal toj najchaq tx'otx'?

8¿Alkye xchaq'unte ja'lu tib'aj Tiro,

ninttanam nimaqkawil,

Tk'wal nimaqkawilqe' xk'aẍlel toj,

ex nimaq q'inunqe' nche xk'aẍlen kye?

9A Qman Dyos nimtipumal xq'mante

tu'n tkume'sset tkyaqilju' nimjtib'il

ex tu'n kykub'xoyet twitz tx'otx' kykyaqilju' yajul.

10Kyaq'unanku'ye' tx'otx' aj Tarsis,

qu'n mixti'tlte q'ojb'il.

11Matxit-se'n Qman Dyos tq'ob' tib'aj ninnjab',

mache b'ajlu'lun nimaqtnam tu'n

ex matchaq' tu'n kyb'ajxitu'n tkuwal Kanaan.

12Ex tzaj tma'n kye aj Sidon:

Kyq'onqe'kje' kytzalajb'ile' txin kub'niqe' jwo'ne'.

maskye mab'entkyxi'ye' tzmax Chipre,

layx b'ent kyojlane' atzu', chij.

13Kyka'yinxju'ye' tx'otx' lu,

aju' janche b'incheta' b'ark.

B'jaw kyb'incha'n kaldey ja nimaq kywe'

ex b'aj kyxitu'n tja nimaqkawb'il toj Sidon,

naqtx'anqa'n jatl ẍekyaj kyq'o'n.

Aye'kye ati kypaj, myaqekye' aj Asirya.

14Che oq'e', kyb'ark aj Tarsis,

qu'n matxi' kyajxitju' kyjaye' kuwsa'n.

15Tojtzu'n tq'ijlalil lu k'ik'eltna'l oxnaq lajoj (70) ab'q'i Tiro, toju' tq'ijlalil nanq'in jun nimaqkawil. Ajtzun tb'aju' oxnaq lajoj (70) ab'q'i, kb'inchetelju' ntma'n tb'itz qya ajpajil ti'j Tiro kjalu:

16Qya ajpajil ik'ni tna'la,

q'ima tchinab'a arpa, ex b'eta tojele nintnam,

q'ajtzama tb'anil chnab', ex b'itzana b'a'npun b'itz,

atzun qil qa matzajna'na, chij.

17Ajtzun tjapunju' oxnaq lajoj (70) ab'q'i, tzul jumajtl Qman Dyos tib'aj Tiro. Ktq'a' jumajtltib' ajpajil kyuky'i'l kykyaqil nimaqtnam twitz tx'otx'.

18Aye'tzu'n tkanb'ab'tl ti'ju' t-xk'aẍle'n che kxe'l tq'o'n te Qman Dyos; lay che'x k'uyet ex lay che kub'u'yi'n toj k'ub'lkye, che kxe'lq'et kyeju' nche ajb'en te Qman Dyos tu'n kylq'onte kywa nim ex kyxb'alun tz'uminqe'.