1T-xjansa Qman Dyos Siro te nimaqkawil,
tzaj t-xqno'n
tu'n tkawin kyib'aj nimaqtnam
ex tu'n tb'je'ltiq'i'n kyq'ojb'il nimaqkawil.
Nche tjqo'n Qman Dyos
kyjpel nimaqtnam te Siro
mix-a'lo' kb'entel tjpunte twitz.
Ex intma'n ja'lo te kjalu:
2Chin b'el nejwe' twitza,
che b'elntilu'ne' nimaqtapi
che okyex npa'ne' kyjpel nimaqtnam q'ank'uxb'ilqe'
ex che b'ajel ntoqi'ne' k'uxb'il kytzi tnam.
3Che kxe'lnq'o'ne' k'uwenj e'wa'nqe' teya,
q'inumal k'u'nqe' toj ewaj,
tu'n teltnik'a qa ayine' Dyos Manb'aj,
janche ajb'ena' aj Israel, intzaj ntxko'ne' tb'iya.
4Naqx tu'nelju nmajine' Jakob',
ti'ju' ntaname' Israel jawni nsk'o'ne',
matzaj ntxko'na
ex matxinq'o'ne' toklena ati teya ja'lo,
extzun min ojtzqi'nqine' tu'na.
5Ayinweju'ye' Dyos Manb'aj, mixti' juntl;
mix-a'lo'te juntl Dyos wi'jxi'ye'.
Mab'ajnxnaq'tza'na teju' q'oj
extzun min ojtzqi'nqine' tu'na,
6tu'n kyb'inte kykyaqil xjal te tjawetzq'ij ex te tkub'exq'ij,
qa mixti' juntl wi'jxi'ye'.
Ayinwe' Dyos Manb'aj, mixti'te juntl.
7Inul spik'un ex nok qxopin wu'ne',
intzaj nq'o'ne' b'a'n ex ntzaj nq'o'ne' xitb'il.
Wu'ne' tkyaqil ja'lu, ayine' Dyos Manb'aj.
Toklen Qman Dyos tib'aj tkyaqil8Ktzajel nq'o'ne' kanb'ab'l tzmax toj kya'j,
naku'j ẍmu's twitz kya'j ex jb'al toj muj,
kb'el twitz tx'otx';
ktwitza' kolb'il
ex kb'eltq'o'n tnik'alilti'j.
9Jun tx'otx' k'wil, mujqa juntl junxi'tl,
min nkub'ten tx'utjel tuk'i'lju' b'inchalte.
Min nxitma'n b'a'n tx'otx' teju' nnaq'unante:
¿Titi' nb'ajteya? chiwt,
ex min nxitma'n jun ti'xti' te b'inchalte:
Min nb'entta taq'unan, chiwt.
10Expe' mixti' tu'n tel tik'u'n jun k'wal tman
tu'nju' xk'walanjtz twitzju' tx'otx' tu'n.
11Intma'n Qman Dyos xjan kye aj Israel
ju' b'inchankye ikjalu:
¿Oktzun che xjelulkye' weye' kyi'ju' nk'wale',
mujqa tu'n ttzajkyma'ne' weye' se'n tu'me'l tu'n kyxi' nb'incha'ne' waq'une'?
12Ayine' nb'inchante tx'otx' exqe' najlaqe' twitz,
xinslik'u'ne' kya'j kyu'n nq'ob'e'
ex nchaq'e' tu'n kyb'jawb'ent kykyaqilu' che'w.
13Ayine' ntzaj chq'onte Siro tu'n tkanb'an,
ex knb'incha'ye' tu'n telb'a'n tkyaqilju' tb'e;
ate kjawil b'inchantetl nintaname'
ex che ttzaqpi'ju' b'ajxni q'i'nqe' toj juntl tnam,
lay tqani chojb'ilte ex mixti'te tu'me'l t-xel, chi Dyos.
Aku' Qman Dyos nimtipumal xyolin.
14Intma'n Qman Dyos kye aj Israel kjalu:
Kkyq'a'kyib'ju' aq'unal toj kojb'il aj Ejipt,
e' xk'aẍlel aj Etyopiy,
exqe' xjal aj Sab'a nimaq kywe',
toj tq'ob'a ex che okyel te tmajena lq'o'n;
k'lo'nqe' toj xpatx'k'uxb'il lepchqe'k ti'ja,
che b'elmeje twitza ex che kub'sal twitza:
Axxi'x atite Dyos kyxole',
ex mixti' juntl, mixti' juntl dyos, chechiku', chi Dyos.
15Atzunta jun Dyos min q'ancha'l,
jun Dyos kolol kyi'j aj Israel.
16Kykyaqilju' nche b'inchan witzleb'
k'elel kych'ixaw, ex che b'elẍkyeqax.
17Aye'tzunkye' aj Israel e'tkol Qman Dyos,
eklet tu'n tejumajx,
ex milo tu'ntela' tch'ixaw ex tu'n tkub' ẍkyeqax.
18Intma'nju' b'inchante kya'j,
aku' Dyos ex tajaw tkyaqil,
aju' kub'inchante kya'j,
aju' kyej kuwsante,
aju' kub' b'inchante, tu'n kynajan xjal twitz
mya tu'nwt tten mixti' ati twitz, kjalu:
Ayinwe' Dyos Manb'aj ex mixti' juntl.
19Mya toj ewaj nchin yolina'we' ex mya toj qxopin twitzju' tx'otx'.
Mixti'we' nxima'n kyeju' tyajajil Jakob':
Chin kyjyome' ja mixti' jun ti'xti', nchiwte'.
Axwe' chin yolin, ayine' Dyos Manb'aj,
o'kxwe' tnik'alilti'j in nma'n, chi Dyos.
Toklen Qman Dyos Kywitzju' Witzleb'20Kukytzaje' ex kyb'uyim kyib'e',
kykyaqile' ẍe'kyaj anq'ine' kyeju' tnam.
Xnakqe'kye' xjal njaw kyiqa'n kywitzleb' tze toj prosesyon
ex nche kub'ten k'ulil twitz jun dyos
layx che klet tu'n.
21Che yolinqe'ye' ex kymantze' yek'b'il,
qa kyajb'ile' che xjelune' kyxolilexe':
¿Alkye q'mante ja'lu ttzajlenx t-xe tnejel?
¿Alkye q'mante atxi'x ojtxi'?
¿Mya myayintzunqine', ayine' Dyos Manb'aj?
Mixti' juntl Dyos wi'jxi'ye'.
Mixti'te juntl Dyos nkanb'an ex nkolon kse'n ayine'.
22Kukytzaje' wuk'i'le' tnam
ate'qe'ye' ttxa'n tx'otx', kche nkla'ye',
ayinwe' Dyos, ex mixti' juntl.
23Oje nma jun nyole' tu'n tb'inchet,
jun yol te kanb'ab'l tu'n tjapun,
ex kjapumelju' yol lu:
kykyaqil che b'elmeje nwitze',
ex kykyaqil kkyma' jun kyol toj nb'iye' tu'n tjapun kyu'n
24ex kkyma': O'kx tuk'i'l Qman Dyos
ta'te kanb'ab'l ex ipumalj, chechiku'.
Kykyaqilju' nche el ik'un weye'
k'elel kych'ixaw.
25Tkyaqilju' tnam Israel kkanb'al wu'ne'
ex ktzalajel wi'je', chi Qman Dyos.
Who We AreWhat We EelieveWhat We Do
2025 by iamachristian.org,Inc All rights reserved.
