1Chin tkloma, Nman Dyos,
qu'n naqxi'x ch'inxtl njaq'wiye' toj a';
2kxi' nxi' mulq'aje' toj sob'on nim t-xe
ex mixjalojax tu'n nkub'a' we'ye'.
Matxi' chin ku'pune' t-xexi' a'
ex xi' nxi' iqane' tu'n tnimal a'.
3Matxi' ku'x tzqij toj nqule' tu'n tpaj nchin ẍch'ine' nim;
in ch'yon toj nqule';
¡matxi' che siktiju' nwitze'
ayob'ente Qman Dyos!
4Nimxi'x kyb'aju' nche el ik'unweye'
kyetwitzju' t-xya'mal nwi'ye', extzun mixti' wile';
matxi' che chmetju' wajq'oje,
aye'ju' naqx kyak'a'n nche okten yajlal weye'
ex inxi'x kyqani'n tu'n txi' wanjsa'n ti'ju'ye' mixti' sajwelq'a'ne'.
5Nman Dyos, b'i'nxi'x tu'na, xnakqine' twitza;
lay b'ent wewanteju'ye' wile' twitza.
6Taye, aya Dyos nimtipumal,
¡lalun tz'el kych'ixawju' q'uqlok kyk'u'j ti'ja
noqx tu'n npaje'!
aya Dyos nkyk'lu'n aj Israel,
¡lalun che kub'numju' nche jyon ti'ja
noqx tu'n npaje'!
7Noqx tu'n nk'u'jlalile' ti'ja inchin yajtiye';
matxi' tz'elxi' nch'ixawe';
8¡ikqinju'ye' kse'n jun xjal min ojtzqi'n twitz
kyeju' witz'ine' ex ntzike'!
9Xi' nkub' b'aje' tu'n xky'aqli'n ti'ju' tjaya;
machin ok ik'le'ne'
kyu'n nche ok ik'lenteya.
10Ajnkub' oq'e' ex aj nmewayine', inche xmayin weye';
11qa nnoknq'o'n wi'je' te b'is, tzeb'ajilqine' kye.
12Noq oqinkxe' nchin kub' kyyoli'n xjal,
exqe' tx'ujtenil in b'je'l kyb'itz xmayb'il weye'.
13Ayintzunwe', Taye, inchin kub'sane' teya.
Nman Dyos, ¡chin toniya ja'lo!
Naq tu'n tk'u'jlalila nimxi'x, ¡chin ttzaq'wentza!
Noq tu'nju' t-o'nb'ila kukxju', ¡chin tkloma!
14¡Lalun taja tu'n nxi' mulq'aje' toju' xoq'l!
¡Chin tkloma kyeju' nche el ik'unweye'
ex tu'n michinxa' mulq'aje' toju' a' nim t-xe!
15¡Lalun taja tu'n nxi' iqane' tu'n tnimal a'!
¡Lalun taja tu'n nxitjk'u'ne'
ttolob' a' nim t-xe!
16Nman Dyos, chin ttzaq'wetza;
¡b'a'nata ex nim tk'u'jlalila!
Chin tka'yitza, qu'n nimta tlaqb'il tk'u'j;
17¡Lalun tz'el tik'u'nju'ya tmajena lu!
¡Chin ttzaq'wetza lwiy, qu'n xob'ajilx atinqina'ye'!
18Lq'etza nk'etze' ex chin tkloma;
¡chin tkloma kyeju' wajq'oje!
19Ojtzqi'n tu'na jni'xju' matxi' chin ok ik'le'ne',
matxi'xi'x b'je'l nch'ixawe';
tojtzqi'nxi'xa alkyeqe' wajq'oje.
20Matxi' k'ixb'i wanmiye' tu'nju' nchinok ik'le'ne';
¡mixti'tl wipumale'!
Manjoye' jun q'uqb'al nk'u'je',
ex jun tu'n ttzaj q'aq'an tk'u'j wi'je', ex mixti' sokyal.
21Ku'x q'o'n b'i'yb'il toju' nwaye',
ex tej ttzaj k'waj wi'je' tzaj q'o'n b'inayr te nk'wa'ye'.
22¡Axwitju' kymes ex kywa nkukyq'o'n tu'n kytzalaj
jawb'ent te jun xpatxab' kye!
23¡B'inchama tu'n kykyaj moẍix
ex tu'n kylu'lunju' kyqan kukxju'!
24Tzaqpintzju'ya ttx'u'jila kyib'aj;
¡che b'ajxwit tu'n tq'oja ajtkb'u'l kanun!
25Kyajxwitju' kynajb'il te chq'ajlaj,
ex mix-a'lo'xwit najan toju' kyja;
26qu'n inkub' kyljo'n toj tq'iju' matxi' tzaj tb'is tu'na
ex inche xmayink ti'ju' b'ajni tk'ixb'sa'na.
27Anjsanxju'ya taq'wix kye, tu'nju' taq'wix nkyb'incha'n;
¡ex tu'n lalun kyk'amju' najsb'il kyil!
28¡Najsanku'xju'ya kyb'i toju' u'j te chwinqlal!
¡Lalun ku'x tq'o'na kyb'i jatku'xa' kyb'iju' tnik'alkyi'j!
29Ayintzunwe', yab'qine' ex nchin b'isune',
chin twab'aktza, Nman Dyos ex chin tkloma.
30Kjawil wajwali'ne' tb'i Dyos kyu'n b'itz
kwajwali'ye' tuk'i'l aq'b'il chjonte,
31Ex kjel tzalajxi'x Qman Dyos ti'j
kyetwitzju' chojb'il tman wakx
mujqa jun qpoj wakx kyuk'i'l tuk'a ex t-xky'eq
32Kche tzalajelju' nche b'isun aj txi' ka'yi'n ja'lu
ex kkuwixel kyanmiju' nche jyon ti'j Dyos;
33ina' che tzaj tb'i'nte Dyos prow
ex min nche eltik'o'n jpu'nqe' ju' teqe'.
34¡Kyajwalinktze' Qman Dyos kya'j, tx'otx' ex ninnjab',
ex kykyaqile' nche anq'ine' kyoj!
35-36Ate Qman Dyos kklolte Syon
ex che jawil tb'incha'n jumajtlu' nimaqtnam toj Juda.
Kkyetza' kyk'wal kymajinju' nintnam;
atzu' che najala' ex kytzyu' kytx'otx';
¡aye' nkyk'u'jla'n tb'i Dyos che najal toj! Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
