Os 6 - Mam Ostuncalco Bible

Naqx Inkyma'n aj Israel tu'n tanjtzkyi'j tk'etz Dyos

1Kukytzaje' kykyaqile', kutanj qi'j tk'etz Qman Dyos.

Ate xb'aj b'yonqe, ex ate kq'analqe;

maqo k'ixb'i tu'n ex okqo tq'ana'.

2Noq toj kab'e' oxe' q'ijx ktzajel tq'o'n jumajtl qchwinqlal,

qo jawil twab'a'n tu'n qanq'in twitz.

3¡Qq'onk tilil tu'n telqnik' te Qman Dyos!

Axxi'x tzulte Qman Dyos quk'i'l,

kse'n ajtjawu'l q'ij,

axxi'x kse'n ajttzaj jb'al nb'aj ak'u' tx'otx' tu'n

kse'n tnejel jb'al na'mxtoq tetz jb'alil.

Ttzaq'web'l Qman Dyos

4Chi Qman Dyos kjalu:

¿Titi' knb'incha'ye' kyeye' Eprayin ex Juda?

¿Titi' kche nse'ye'?

Iky kyk'u'jlalile' wi'je'.

Kse'n muj te prim,

ex kse'n ta'l che'w te b'a'n prim, texju' prim nkub'naj.

5Qu'mtzun aju' nyole' xpon kyeye' kyu'n nsanjelale',

iky sela' kse'n q'ankyaq b'iyul

majx ẍeb'aje' tu'n.

6Awe' wajb'il chin kyk'u'jlame',

myate' chojb'il tu'n tzaj kyq'o'ne' weye'

tz'elx kynik'e' qa ayine' Dyos,

myate' tu'n tkub' kyq'o'ne' chojb'il k'ok'sb'il nwitze'.

7Ikx ntanamju'ye' kse'n Adan,

matz'ik' tib'aju' nchaq'b'ile' ex min nb'intl.

8Matxi' tz'ok Kalaad te jun nintnam aj il,

matxi'xi'x b'aj txa'j toj tik'len chik'.

9Jun k'loj eleq' qekye' pale.

tokkywitz kyi'ju' xjal;

nche kub' kyb'yo'n xjal ex nche elq'an kyi'j

toj tb'eyil Sikyem.

10Matxi' wile' ti'xti' taq'wixi'x nkyb'incha'n aj Israel:

Matxi' tz'ok Eprayin te ajpajil,

ex ikx Israel matxi' txilpe ti'j.

11Ex ikxta Juda

matxi' kyej b'entti'j tq'ijlalil tz'e'ysb'il twitza.

Naqa xntch'exb'eye'

tchwinqlalju' ntaname' Israel.