1 Cr CHIK'B'AB'L - Mam Ostuncalco Bible
CHIK'B'AB'LNimu' ak'a'j yol tz'ib'a'n kyoju' kab'e' Kyu'jil Tqanil B'inchb'aj, ati ku'xni q'o'n jte'x yol, ex atitl ku'xni q'o'n tuk'i'l nim chik'b'ab'l kyi'ju' eb'aj, tku'x kyoju' tuj Samwel ex kyuj Nimaqkawil. Myanoq o'kx elni q'i'n kse'n tku'x kyoju' u'j lu. Ex ikyqe'xju' ak'a'j yol tku'x toj inkyq'o'n juntl tu'me'l ex juntl tnab'l. Toj jun tu'me'l, atzu' nyolina'xi'x ti'ju' kykawb'il Dab'i ex Salomon, ex ti'ju' tja Dyos ex ti'ju' k'u'lb'il, ex kyi'ju' pale nche ajb'en toj. Atzuntzu' nyolina'xi'x ti'ju' nuk'b'enkye ex kyaq'unju' pale. Toj juntl tu'me'l, nyolin ti'j qa a Dab'i kub' ximanteju' tja Dyos exju' k'u'lb'il inok toj, maskyepe' a Salomon jaw b'inchante.Aye' Josapat, Esekyiy ex Josiy nche ok te b'a'n yek'b'il tu'n nche niman te Qman Dyos, ex tu'n kyokslab'l kyoju' tq'ijlalil ch'uẍqe' ex tb'ajlenxi' junjun tq'ijlalil nel kypa'n kyib'u' tnam ti'j Dyos, nche ok b'inchaltexi'xtl ttenju' okslab'l ti'j Dyos. Oktilil tu'nju' xjansa'n tz'ib'al tu'n tyek'u'nte, qa tu'npetzunju' nim txqan xitb'il tzaj kyib'aju' aj Israel ex kyib'aju' aj Juda, kukx tten yolju' kyajni ttziya'n Qman Dyos teju' ttanam ex njapun tu'n. Intzaj qe tu'nju' ljo'ntoqu' k'u'lb'il mya tz'ilsa'n twitz Dyos.Kyoju' tnejel b'eljoj tnej toju' tnejel u'j, tku'xa'qe' kyb'iju' kyyajilb'en. Tuk'i'lju' tkamik Sawul ntzyeta'xi'xju' tqanil toju' tnej lajoj (cap. 10). Kyojtzu'n txqantl tnej (caps. 11-29) tku'xa'ju' tej tkawin Dab'i, exu' tej tb'ajtzaj xitb'il tib'aj exqe'ju' tkanb'ab'l. Tz'ib'a'nqe'ju' tze ex ab'j b'aj tzajpun telsa'n Dab'i tu'n tjaw b'inchetju' tja Dyos, ju' b'aj kyej tab'tzi'n te Salomon, ex chik'b'a'nqe'xi'x ja'lu kyoju' b'ajsb'il wajxaq tnej.
