Ez 20 - Mam Ostuncalco Bible

Njapunte Dyos tyol aye'tzu'n aj Israel pi'sqe'

1E'pon junjun tijwnaq aj Israel xjelul te Qman Dyos toj lajoj tajlal tjweyi'n xjaw te twuqi'n ab'q'i, ex e'kub' qe nwitze'.

2Tzajtzun yolin Qman Dyos weye', ex tma:

3Ichan, yolina kyeju' tijwnaq aj Israel ex q'manxa kye: A ntma'n Dyos ja'lu: ¿Ma'tzun che ulkye' xjelul weye'? Ayinku'we' Dyos Manb'aj chin q'malte axxi'x, lay waje' tu'n kyxjelune' weye'.

4Q'onqe'kta toj xjel aya ichan; q'onqe'ka toj xjel, ex na'nxa kye jni'xju' ti'xti' taq'wiqe'x kyb'inchaju' kyman.

5Q'manxa kye: A ntma'n Dyos ja'lu: Tej tjaw nsk'o'ne' Israel, kyej ntziya'ne' jun kyelu' tyajajil ex kub' nyek'u'n wib'e' kye toj Ejipt. Xinma'ne' kye toj junkmuj nim toklen: Ayine' Dyos Manb'aj kyib'aj.

6Waq'wib'e' tu'n kyetzwiq'i'ne' toj Ejipt toju' q'ij lu, ex tu'n kyxi' wiq'i'ne' toju' tx'otx' ojetoq njoye' kye, jun tb'anil tx'otx', ¡aju' tx'otx' tb'anilxi'x kyxol kykyaqil!

7Ex nchaq'e' kye kykyaqilx tu'n tel kyik'o'n kywitzleb' taq'wixqexi'x ex tu'n lalun kytz'ilsa kyib' kyu'n kywitzleb' aj Ejipt, qu'n ayine' Dyos Manb'aj Kydyos.

8Aye'tzunkye jawkyiq'i'nkyib' wi'je', ex min kyaj tu'n nxikyb'i'ne'; min kyaj tu'n kykyaj kyxonju' kydyos taq'wixqe'xi'x ex min e'kyaj kyik'o'n kywitzleb' aj Ejipt. Kub' nxima'ne' toj ntx'u'jile' kyi'j tu'n ntz'e'ysanteye' kywitz toj Ejipt tzmaxi'j ajtelb'aj ntx'u'jile' kyi'j.

9Atzunju' nb'inchaye' tu'n tnimanjtz nb'iye', tu'ntzun lalun chin kyaje' taq'wix kywitzju' nimaqtnam janajla'qe', qu'n kywitzju' nimaqtnam lu nyek'uya' wib'e' kye ex ojetoq txinma'ne' kye tu'n kyetzwiq'i'ne' toj Ejipt.

10Eb'je'tz wiq'i'ne' toj Ejipt ex exi' wiq'i'ne' toj chq'ajlaj;

11atzuntzu' e'xa' nyek'u'ne' nkawb'ile' ex nchaq'b'ile' kye, aju' nq'onte chwinqlal kyeju' nche b'inchante.

12Ex b'ajx nyek'u'ne' q'ij te ojlab'l kye, ju' atitoq tu'n tok te jun techlal qxole' kyuk'i'l, ex jun nab'ab'lte qa ayine' Dyos Manb'aj, ojetoq che nxjansa'ye' te weye'.

13Aye'tzunkye jawkyiq'i'kyib' wi'je' toj chq'ajlaj, ex min e'xikyb'i'n nkawb'ile'; b'je'l kyik'o'nju' chaq'b'il xinq'o'ne' kye, tu'ntoq kyb'inchante, ex tu'ntoq tten kychwinqlal, majxkub' kyyaju'n q'ij te ojlab'l. Kub' nxima'ntzuntze' tu'n ttzaj ntzaqpi'ne' ntx'u'jile' kyi'j ex tu'n kykub' nnajsa'ne' atzu', toj chq'ajlaj,

14naqtzun tu'nju' ninb'ilte nb'iye' min nb'inchaye', tu'n lalun chin kyaje' taq'wix kywitzju' txqantl nimaqtnam ojetoq kyil se'ntaq'wi kyetz wiq'ine' toj Ejipt.

15Ex xinma'ne' kye toj chq'ajlaj qa laytoq che okxwiq'i'ne' toju' tx'otx' ojetoq txinq'o'ne' kye, aju' tb'anilxi'x kyetwitz tkyaqil, tb'anilxi'x tawal ntzaj,

16qu'n eb'je'l kyik'o'n nchaq'b'ile', min exikyb'incha'n nkawb'ile' ex kub' kytxa'ju'n q'ij te ojlab'l, qu'n xi' oka'ten kyk'u'j kyi'ju' kywitzleb'.

17Tzajtzun laqj nk'u'je' kyi'j ex min e'kub' nnajsa'ne' toj chq'ajlaj.

18Xinma'ntzuntze' kyeju' kyk'wal tu'n lalun txikyb'incha'nju' ntoq xiq'ma'n kye kyu'n kyman, tu'n lalun txikyb'incha'n nchaq'unjtz kye, tu'n lalun kytz'ilsa kyib' kyu'n witzleb'.

19Xinma'ne' kye: Ayine' Dyos Manb'aj janche ajb'ena'ye'. Che japunxju' nkawb'ile' ex nchaq'b'ile' kyu'ne' kse'nxju' tz'ib'a'n,

20ex kynimanku'ye' q'ij te ojlab'l, xjanx toklen kyu'ne', tu'n tok te jun techal qxol kyuk'i'le'; k'eleltzun kynik'tze' qa ayine' Dyos Manb'aj janche ajb'ena'ye', nchije'.

21Ex ikyqe'xju' kyk'wal jawkyiq'i'kyib' wi'je'. Mixti'x exikynima'n nkawb'ile', mixti'x ejapun kyu'n ex min exikyb'incha'n nchaq'b'ile', ju' intq'o'n chwinqlal kyeju' nche'x b'inchante, ex kub' kytxa'ju'n q'ij te ojlab'l. Kub' nxima'ne' tu'n ttzaj nq'o'ne' ntx'u'jile' kyib'aj ex tu'n kykub' nnajsa'ne' atzu', toj chq'ajlaj, tu'n tiky' ntx'u'jile' kyi'j,

22nwe'tzune' naq tu'n ninb'ilte nb'iye', tu'n lalun chin kyaje' taq'wix kywitzju' nimaqtnam ojetoq kyil se'n e'etza' wiq'i'ne' toj Ejipt,

23xinma'ne' kye toj chq'ajlaj qa oktoq che kxe'l nsputi'ne' kyxolju' nimaqtnam twitz tx'otx',

24qu'n min ejapunju' nchaq'b'ile' kyu'n, eb'je'l kyik'o'n nkawb'ile', kub' kyyaju'n q'ij te ojlab'l ex o'kxtzu' oka' ten kywitz kyi'ju' kywitzleb' kyman.

25Expe' e'kub' nq'o'ne' myab'a'n kawb'il kyib'aj ex e'chaq'b'il mixti' chwinqlal kyu'n.

26E'kyaj ntzaqpi'ne' tu'n kytz'ilsante kyib' tu'n t-xikyiq'i'n oyaj kye witzleb', ex tu'n kyxi' kyq'o'n kyk'wal nimaqqe'tl te chojb'il. Nb'inchaye' lu tu'n ttzaj xob'el kyi'j ex tu'n telkynik' qa ayine' Dyos Manb'aj.

27Extzunta ichan, q'manxa kye aj Israel: a ntma'n Dyos ja'lu: ikyqe'xju' kymane' okkyq'o'n ntx'u'jile'; mixti'x xikyb'incha'n wajb'ile'.

28Tej kyokx wiq'i'ne' toju' tx'otx' ojetoq nmaye' tu'n txinq'o'ne' kye, naqnxi kyka'yi'n jun b'us nimin twe' mujqa jun tze pujin, b'ajkub' kyq'o'n chojb'il ex kyoyaj atzu', tu'ntzu'n oka' kyq'o'n ntx'u'jile', intoq kub' kyq'o'n ti'xti' k'ok'jsa'n ex intoq kub'kyqo'n kyoyaj b'in.

29Xinqani'ne' kye: ¿Ma atzun ja xjanju' kye witzleb' janche'xa'ye'? nchije'. Ex majx kyej tenju' tb'i te Ja Xjan kye Witzleb'.

30Q'manxa teju' tnam Israel: A ntma'n Dyos ja'lu: ¿Tiqu'n kyajb'ila'ye' tu'n kyktz'ilsante kyib'e' kse'nxkye ojtxi' kychmane'? ¿Tiqu'ntzun min nche k'ulune' weye', xi' nche k'ulunaye' kye witzleb' taq'wixqe'xi'x?

31Ajtkub' kyq'o'ne' kyoyaje' ex ajkykub' kytz'e'ysa'ne' kyk'wale' te chojb'il, ljo'nx kytz'ilsante kyib'e' tu'n kywitzleb'e'. ¿Extzun kyajb'iltle' tu'n kyule' xjelul weye' aj Israel? Axxi'x ayine' Dyos Manb'aj, lay waje' tu'n kyxjelune' weye'.

32Matxi' tz'okxten toj kynab'le' tu'n kyoke' se'nqe' txqantl nimaqtnam twitz tx'otx', nche k'ulun te tze ex te ab'j, kxa'tzunte' ikyju'.

33Axxi'x kxe'l nma'ne', ayine' Dyos Manb'aj, kb'el ntz'e'ysa'n kywitze' tu'n tipumal nq'ob'e' tu'n ntx'u'jile', ex chin kawile' kyib'aje'.

34Che tzajel nb'uyi'ne' kyxolju' tnam ex nimaqtnam jaslamuna' kyib'e', kb'el ntz'e'ysa'n kywitze' tu'n wipumale' tuk'i'l ntx'u'jile'.

35-36Che xe'l wiq'i'ne' toju' chq'ajlaj kye nimaqtnam ex k'okyel moje kywitz tu'n kyok toj xjel wu'ne', kse'n kyoknq'o'ne' ojtxi' kychmane' toj xjel toj chq'ajlaj te Ejipt. Ayine' Dyos Manb'aj nchin q'mante.

37K'ik'elnwitze' kyi'je' kse'n jun k'ik'lel nche b'ajtajla'n trit, ex che okyele' wu'ne' toju' yol kyejni b'entti'j.

38Che elel npa'ne' pi'sqe' kyxole' exqe' njaw kyiq'i'nkyib' wi'je', che elex wiq'i'ne' toju' junxi'tl tx'otx' janajla'qe' ja'lo; ex lay che okx toj tx'otx' Israel. K'eleltzun kynik'tze' qa ayine' Dyos Manb'aj, chi Dyos.

39Tnam aj Israel, a ntma'n Qman Dyos ja'lu:

¡kukyxi'ye' k'ulul kye kywitzleb'e...! Oktzun che b'ilkye' yajxi'tl weye', ex lay kub' kytxa'ju'ntle' nb'iye' xjan, tu'nwt tkub' kyq'o'ntle' kyoyaje' lu ex tu'nwt kyk'uluntle' kye kywitzleb'e.

40Kykyaqil aj Israel che k'ulul weye' twi' witz xjan, twi' witz nimxi'x twe' toj Israel, ju' ati toju' ntx'otx'e'. Ayine' Dyos Manb'aj, nchin q'mante. Atzuntzu' che nk'ma'ye' tu'n tkyaqil nk'u'je'; atzuntzu' kxela' nma'ne' kyeye' tu'n tul kyiq'ine' kyoyaje' ex tu'n ttzaj kyiq'i'ne' tnejel twitz kyawale' ex tkyaqilju' ati tu'n kyxjansanteye' weye'.

41Ajkyb'ajtzaj nb'uyi'ne' kyxolju' tx'otx' ex nimaqtnam jasputi'na' kyib'e' ja'lo, ex ajt-xinyek'u'ne' nxjanb'ile' kyxole' kywitz kykyaqilu' tnam, oktzun nk'ma'tze' kyoyaje' tk'ok'jalxi'x.

42Ex aj kyokx nq'o'ne' toj Israel, toju' tx'otx' oje nmaye' tu'n txinq'o'ne' kye ojtxi' kychmane', k'eleltzun kynik'tze' qa ayine' Dyos Manb'aj.

43Atzuntzu' ktzajela' kyna'ne' tkyaqilju' kyb'inchb'ene' myab'a'n matxi' b'aj kytz'ilsa'na' kyib'e', ktzajel molmon kyk'u'je' kyexe' ex tu'n txqan il xb'aj kyb'incha'ne'.

44Tnam aj Israel, kxa' weye' nb'incha'n kyeye' kse'nkye' nkyb'incha'n, awe' nb'incha'n tu'n tnimanjtzju' nb'iye', k'eleltzun kynik'tze' qa ayine' Dyos Manb'aj. Ayine' nchin q'mante, chi Dyos.

Tz'e'ysb'il witzb'aj toju' tx'otx' te tnayajkya'j

45Tzaj yolin Qman Dyos weye' ex tma:

46Ichan, kutanj ti'ja toj tnayajkya'j, ex yolinxa na'tz; q'manxa toj nb'iye' ti'ju' nimaq k'ul toju' tnej tx'otx' toj tnayajkya'j,

47ex q'manxa: intma'n Dyos kjalu: k'okyel ntxqo'ne' jun q'aq' ti'ja, kb'ajel twan tkyaqilju' tze cha'x tze ex tzqij toja; kk'antel q'aq' na'tz ex lay yupj, kttz'e'ysa' kywitz kykyaqilju' xjal ate' toja, toj tb'a'nq'ob'kya'j ex toj tnayajkya'j.

48Ex kykyaqil xjal che ka'yilte qa ayine' Dyos Manb'aj, ẍin oktxqonte. Ex lay yupju' q'aq', chi Dyos.

49Xi'tzun ntzaq'we'ne' te: ¡Taye, a nkyoli'n xjalju' qa naqnchin yoline' kyi'j ti'xti' mix-a'lo'x nkane' toj twitz! nchije'.