Lv 16 - Mam Ostuncalco Bible

Tq'ij najsb'il

1Yolin Qman Dyos tuk'i'l Moyses kykyimlenxi' kab'e' tk'wal Aaron, ju' e'kyim tu'n tpaj exi'lq'exi'x twitz Qman Dyos.

2Tzaj tma'n Qman Dyos te Moyses tu'n t-xitma'n te Aaron, ju' ttzik:

Mixti' tu'n tokx alkyexku' kmoj toju' ja xjan ati ti'jxi'ju' xb'alun te aq'pub'l ex twitz tjpelju' kax k'ub'lteju' yol kyejni b'entti'j, tu'ntzun lalun Kyim; qu'n knyek'u' wib'e' toj muj tib'aju' tjpel kax.

3Ati tu'n tokx Aaron toju' ja xjan tuk'i'l jun qpoj tman wakx te chojb'il tu'n tpaj il ex jun tman rit tu'n tkub' tq'o'n te chojb'il k'ok'sb'il.

4Ati tu'n tok toksa'nkju' t-xb'alun ku'j sed xjansa'n, ktxu'nju' t-xmilal tu'n kalsonsiy sed, ex tokju' k'alb'il tk'u'j ex ẍipb'il twi' sed. Xjansa'nqe'ju' xb'alun lu, qu'mtzun ati tu'n ttxjontetib' tu'n a' na'mtoq kyok toksa'n.

5Atzu'n kye' aj Israel ktzajel kyq'o'n kab'e' chib' te Aaron te chojb'il tu'ntpaj il, ex jun tman rit tu'n tkub' q'et te chojb'il k'ok'sb'il.

6Kb'el tq'o'ntzun tman wakxtz te chojb'il tu'n tpaju' til, tu'ntzun tkub'najsetju' til ex kyilju' toj tja.

7Yajxi'tzuntl kche tzajel tiq'i'nju' kab'e' chib' ex che kb'eltq'o'n nwitze' ttziju' Ja te Mujb'ab'ltib'il;

8kxel t-se'ntzuntz tu'n teltnik' kyi'ju' kab'e' tman chib' lu alkyeju' weye' ex alkye kxel tzaqpet tu'n t-xi' tiqa'n kyil xjal.

9Aju' chib' xkub' tz'aq weye', kb'eltq'o'n Aaron te chojb'il tu'n tpaj il;

10atzunju' chib' xkub' tz'aq tu'n t-xi' tzaqpet, kb'eltq'o'n itz' nwitze' ayine' Dyos Manb'aj tu'ntzun tnajset kyilju' tnam, okxe'l tzaqpettzuntz ex kxel q'et toj chq'ajlaj.

11Kb'eltq'o'n Aaron ju' qpoj tman wakx te chojb'il teku' tu'n tpaj il, tu'n tnajsetju' til ex kyilju' toj tja.

12Ktzajel tiq'i'ntzun jun xq'aq'b'iltz nojni tu'n ttxalq'aq' tzajni tib'aju' q'olb'eb'l ati nwitze', ex kab'e' txab' sturak k'ok'sb'il chen, ex kxe'l tiq'i'n ti'jxi'ju' xb'alun te aq'pub'l;

13k'okyex tq'o'nju' sturak tib'aju' q'aq' nwitze', ex kb'el noj ti'ju' tjpel kax k'ub'lteju' yol kyejni b'entti'j tu'n t-sb'elju' sturak. Laytzun kyim Aarontz ikju'.

14Ex kjawil tiq'i'n ch'i'n tchk'elju' qpoj tman wakx, kxel twitxk'a'ntzuntz tu'n twitq'ob' tib'aju' tjpel kax tu'me'l tjawetzq'ij. Ex kxel twitxk'a'n wuq maju' chik' tu'n twitq'ob' twitz tjpelju' kax,

15yajxi'tzuntl kb'el tb'yo'nju' chib' te chojb'il tu'n tpaj kyilju' tnam ex k'okex tiq'i'nju' chik' ti'jxi'ju' xb'alun te aq'pub'l; atzuntzu' kb'el twitxk'a'n tib'aj ex twitzju' tjpel kax, kse'nxju' tb'incha tu'nju' tchk'el qpoj tman wakx.

16Iktzu'n kt-ẍtilsa'ju' ja xjan te tkyaqilju' kytz'ilil, kypi'sal ex kyil aj Israel. Ex ikx tu'n tb'inchanteju' ti'ju' Ja te Mujb'ab'ltib'il, ju' ati kyxol tuk'i'lju' kytz'ilil.

17Akxku' ati Aaron toju' ja xjan tu'n tk'monteju' najsb'il il tzmaxi'j ajtetz, mix-a'lo' te ktenb'el toju' Ja te Mujb'ab'ltib'il. Ajtzun tk'monteju' najsb'il til, kyilju' toj tja ex kyil tkyaqilju' tnam Israel,

18k'eletztzuntz tu'n t-xi' ẍtilsalteju' q'olb'eb'l ati nwitze'. Ktzajel tiq'i'n ch'i'n kychk'elju' qpoj tman wakx ex tman chib', ex k'okel t-sun kyi'j tuk'a ex ti'jile q'olb'eb'l,

19ex kxel twitxk'a'n wuq maju' chik' tu'n twitq'ob' tib'aju' q'olb'eb'l. Iktzu'n kẍtilsetela'ju' tu'n teju' kytz'ilil aj Israel, ex kt-xjansa'.

20Ajtzun kyb'aj t-ẍtilsa'n Aaron ju' ja xjan, Ja te Mujb'ab'ltib'il exju' q'olb'eb'l, kxe'l tma'n tu'n ttzaj iq'i'n chib' itz'x

21ex kb'eltq'o'n tq'ob' tib'aj twi'ju' alu'mj, kxel tpa'ntzuntz tkyaqil kyil aj Israeltz tib'aj, tkyaqilju' kyb'inchb'aj taq'wix ex tu'nju' njaw kyi'nkyib' wi'je'. Iktzu'n che kb'ela' tq'o'nju' il tib'aj twi'ju' tman chib'. Ex jun xjal kxel q'inte tu'n t-xi' ttzaqpi'n toj chq'ajlaj.

22Iktzu'n aj t-xi' tzpetju' tman chib' toj chq'ajlaj, kxe'l tiq'i'n tkyaqilju' kyil jamixti'qe' xjal najla'qe'.

23Oktzun k'okyex Aarontz toju' Ja te Mujb'ab'ltib'il ex k'elel tiq'i'nju' t-xb'alun sed, ju' oktq'o'n tej tokx toju' ja xjan, kjel tq'o'ntzuntz atzu'.

24Axtzuntzu' kttxja'tib' tu'n a' toju' ja xjan, toklenxi'tzun tq'o'nju' t-xb'alun, k'eletz tu'n tkub' tq'o'nju' toyaj k'ok'sb'il, extzunju' kb'eltq'o'n tu'nelju' tnam, iktzu'n ktk'ma' najsb'il til ex kyilju' tman.

25Kb'el ttz'e'ysa'n t-untilju' chojb'il tu'n tpaj il tib'aj q'olb'eb'l;

26atzunju' xxi' q'inteju' chib' tu'n t-xi' tzaqpet toj chq'ajlaj kttx'ja' t-xb'alun ex kttxja'tib' tu'n a', b'a'ntzun tu'n tokxtzuntz toju' najb'il.

27Aye'tzu'n qpoj tman wakx ex tman chib' e'kub' q'et te chojb'il tu'ntpaj il, ju' xi' iq'etu' kychk'el toju' ja xjan tu'n tk'metju' najsb'il il, che kxe'l iq'et ti'jxi' najb'il, aye'tzu'n kytz'umal, kychib'jil ex kytxa, che b'eltz'e'yset.

28Ati tu'n ttxjonte t-xb'alunju' xjal kb'el tz'e'ysankye ex tu'n ttxjontetib' tu'n a', b'a'ntzun tu'n tokxtz toju' najb'il.

29Majx kjeltenju' kawb'il lu kyeye': ati tu'n kmewayine' toj tlajoji'n q'ij tajlalju' twuqi'n xjaw ex mixti' jun aq'untl tu'n kyb'inchanteye', kykyaqilx aj Israel exqe' najchaq xjal najliqe' kyxole',

30qu'n kyk'ma'ju'ye' najsb'il kyile' nwitze' ayine' Dyos Manb'aj toju' q'ij lu, che kjele' ẍtilun te tkyaqilju' kyile'.

31Jun kawb'ilte' majx kjelten: k'okelju' q'ij lu nim toklen kyeye' te ojlab'l ex te mewayi'n.

32Aju' pale jawni sk'o'n ex matxi' txiq'o'n toklen tu'n tok te t-xelju' tman te pale kb'inchalteju' tu'me'l tu'n tknetju' najsb'il il; k'okyel tq'o'nju' t-xb'alun sed xjansa'n

33ex ktb'incha'ju' ẍtilsab'l teju' ja xjanxi'x, exju' Ja te Mujb'ab'ltib'il, ex teju' q'olb'eb'l, ex ktk'ma' najsb'ilte kyilju' pale ex najsb'ilte kyil kykyaqilju' tnam.

34Jun kawb'ilte' lu majx kjelten kyeye': kb'el ik'set jumaju' tu'me'l tu'n tnajset kyil aj Israel nkyb'incha'n toj ab'q'i, chi Qman Dyos.

Ex b'inchet kse'nxju' ojetoq tman Qman Dyos te Moyses.