Pr 30 - Mam Ostuncalco Bible

Tyol Awur

1Yol tu'n Awur, tk'wal Jakye aj Masa. Yolin Awur te Ityel ex tuk'i'l Ukalex tma kjalu:

2Oqinkxwe' mixti' ch'i'n xnaq'tzb'il we,

mixti'x nchin ximan ch'iwe' kse'nkye q'a.

3Mixti' ẍinxe' toj xnaq'tzb'il,

ex mixti'x xnaq'tzb'ile' ti'j Dyos.

4¿alkye oje japun toj kya'j ex kb'u'ltl?

¿Alkye nb'ent ttzyunte kyq'iq' toj tq'ob'?

¿alkye nb'ajxju' ninnjab' toj tpinpa't?

¿Ex alkye kyej b'inchante tnaqachil tx'otx'?

¿Titi' tb'i, ex titi' tb'iju' tk'wal, qa b'i'n tu'na?

5Xq'uqi'n qekye' q'uqli kyk'u'j ti'j Qman Dyos tu'n;

qu'n ate' tyol ax b'a'n tu'n tqe qk'u'j ti'j.

6Lalun tz'ok t-tz'aqtza'na tyol

tu'ntzun lalun tz'ok q'o'na chalyol.

7Oje txi' nqanine' kab'e' ti'xti' teya nman Dyos;

b'inchama xtalb'il q'ontza weye' na'mxku' nkyime':

8Pa'mila chajyolil wi'je',

ex lay chin q'inumaxe' ex mya' yajxi'x;

chin tpa'mila ti'ju' noq nkub'naj, noq o'kx q'ontzju'ya nwaye' atl junjun q'ij.

9Qu'n qa ninxi'x ati weye', jaku' tzik'tna'la wu'ne'

ex jaku' nmaye' qa min ojtzqi'na wu'ne';

exqa yajqinxixe' jaku' chinxe' elq'al

ex jaku' tz'el tch'ixawa wu'ne'.

10Lalun yolina myab'a'n ti'j jun lq'o'n majin teju' tajaw,

qu'n jaku' tzajttxko'n toj twi'ya ex kyajtela.

11Ati wiq xjal nche yolin taq'wix ti'j kma'n

ex minti' nkynima'n ktxu.

12Ate'qe' xjal nkma'n qa mixti' kyil,

extzun min nanjtzti'j kyanmi.

13nimte' nok tq'o'ntib' nim toklen,

ex ntnima'ntib' twitzju' prow.

14Ate'qe' xjal naku'j k'uẍtx'e'nb'ilqe' kywitzte

aye'tzu'n kyka naku'j kuchilqe',

nche ajb'en kyu'n tu'n kyb'aj

kkyaqilju' xjal prowqe' twitz tx'otx'.

15Kab'e' talju' xton toj ttxa'n txkup,

o'kx nb'enti kyu'n, tu'n kyqanin ti'xti'.

Ati kab'e' oxe' ti'xti' te,

ex mixti' nqe tk'u'j.

16Aju' muqb'il, kux ntqani'n kyimni,

aju' ttxu k'u'jb'aj min nalan, tajb'il tal,

exju' tzqij tx'otx', mixti' nak'

exju' Q'aq', kukx tokx siju' toj.

17Aju' xjal nxmayin ti'j tman

ex minti' nokslan te ttxu matxi' tijin,

b'a'ntzunte' tu'n tetz q'i'n twitz kyu'n joj

ex tu'n tb'aj ch'yo'n kyu'n t'iw.

18Ati oxe' ti'xti', mujqa kyaje',

inchin lab'tiye' kyi'j ex min kane toj nwitze':

19Se'n taq'wi nlipanju' pich' twitz kya'j,

ex se'ntaq'wi nb'etju' kan twi' pik,

Se'ntaq'wi nb'etju' b'ark tib'aj ninnjab'

ex se'ntaq'wiju' mejeb'le'n exju' itz'je'n.

20Aju' qya ajpajil nanq'in kjalu:

in wan, ex nb'aj ttxjo'n ttzi

extzun a tyolju' mixti' wil.

21Oxe' tu'me'lju' xjal, kyaje' pena'te',

layx tzik'x qu'n ex majx nb'aj chukji twitz tx'otx' kyu'n:

22Aju' lq'o'n majin nok te nimaqkawil,

exju' xjal mixti' tnab'l nim ti'xti' te,

23Aju' qya etzni xla'ja'n tja tchmil,

in mje jumajtl

exju' lq'o'n qya te majin nel tiq'i'n toklenju' tajaw qya.

24Ati kyaje' txkup twitz tx'otx' tal k'ok'e'qe'

inxi'xpe' nche ximan kyekywitzju' xjal ati knab'l:

25aye'kye' snik, jun chquj txkup mixti' kyipumal

inpe' kb'uyi'nkye' kwa toj q'ijal;

26Aye'ju' saqb'in, mya'xix nim kyb'aj ex mixti' kyipumal

in b'entju' kyja toj pik;

27aye'ju' txil, mixti' knejel,

ex inche b'et tojxi'x tu'me'l ex nk'u'mile kten.

28Aye' xmatx nb'ent kytzyet toj qq'ob'

najliqe' toj kyja nimaqkawil.

29Ati oxe' ti'xti' mujqa kyaje' min nche' xob',

exju' che b'et majx kb'anilqe':

30Aju' b'alun, a txkupju' nimxi'x tipumal ex xob'ajilx,

min nkub' oq, ex minti' nxob' kye xjal;

31aju' tmanek' achb'ajil ka'yin, exju' tman chib'

ikxju' nimaqkawil nejli kywitzju' t-xjal te q'oj.

32Qa tu'n t-xnakyila njaw tnima'n tib'a.

ex makub' tena ximilte myab'a'n, ximanku'ya b'a'nxi'x

33qama jaw ttz'amina lech, kb'entel mantekyiy,

qama xkyipun ttxa'na kuw ktzajel chik' toj,

ex ikxtzun qama tz'oktena ik'lelte juntl njyon q'oja.