Jer 22 - Mam Ostuncalco Bible

Tqanil kye toj tja nimaqkawil aj Juda

1Tzaj tma'n Qman Dyos weye': Kutku'xa toju' tja nimaqkawb'il ex pakb'anxa nyole' lu

2twitzju' nimaqkawil aj Juda, q'uqli toju' tq'uqb'il Dab'i, kyuk'i'lju' nche kawin tuk'i'l exqe' xjal te toju' nintnam, ikjalu: Kyb'intze' tyol Qman Dyos.

3Kyb'inchame' tnik'alilti'j ex toj tu'me'l toju' najb'il lu, kytzaqpime' yaju'n toj tq'ob'ju' yajulte, lalun kub'kyme'ssa'ne' najchaq xjal ex lalun kub' kyaju'ne', e'meb'a ex qya kyimni kychmil. Lan che kub' kyb'yo'ne' najchaq xjal toju' najb'il lu.

4Qama kyb'inchaye' nxinma'ne' lu kyeye', che tenb'el kawil kukxju' toju' tq'uqb'il Dab'i, che okex kyoj txqan karwaj ex kyi'j chej ttziju' tja nimaqkawb'il, lepchqe'kju' nche kawin tuk'i'l exqe' tnam xjal.

5Qatzun min xikyb'i'ne' oqxenb'il lu, xitjnitlte' tja nimaqkawb'il lu kjel. Ayine' Dyos Manb'aj nchin yolin, chiku'ya kye, chi Dyos.

6Qu'n lu ntma'n Qman Dyos ti'ju' tja nimaqkawil toj Juda ikjalu:

Ikju'ya weye' kse'n witz Kalaad,

kse'n ttxa'nwitz Lib'ano,

majxtzun kxe'l nma'ne' axxi'x kjel nq'o'na chq'ajlajtl,

mix-a'lo'tl knajal toja.

7Che tzajel nchq'o'ne' xjal iq'i'n kyb'iyb'il ti'ja,

xitulxteya.

Che b'ajel kytx'e'mu'n tb'anil tqankchana k'ute

che okyex kyq'o'ntzuntz toj q'aq'.

8Yajxi'tzuntl che b'jik'el xjal te chukchaq nimaqtnam tk'etzju' nintnam lu, ex che xjelul kyxolilex: ¿Tiqu'n xtb'incha Qman Dyos ja'lu teju' nintnam lu? chechiku'.

9Kxel tzaq'we'ntzuntz kye: Ma'na' kyej kykolb'e'n yol kyej b'entti'j tu'n Qman Dyos kyuk'i'l janche k'uluna', macheb'aj k'ulun kye txqantl dyos ex mache jawkynima'n, chi Dyos.

Tqanil tu'n Jeremiy ti'j Salum (Joakas)

10-11Lalun che oq'e' ti'ju' nimaqkawil Josiy,

Lalun che oq'e' tu'nju' tkamik;

xi' che oq'aye' ti'j Salum ju' tk'wal,

layx tz'anjtztlti'j,

layx til jumajtlju' jasitz'ja'.

Qu'n lu xtma Qman Dyos ti'j Salum, tk'wal Josiy, nimaqkawil toj Juda, ok toju' kawb'il tkyimlenxi' tman ex matz'ex toju' najb'il lu: lay tz'anjtzti'j,

12axtzu' kkyimela'te' toju' tnam jaxxa' q'i'na', ex lay tz'ok tka'yi'ntlju' tx'otx' lu.

Tqanil ti'j Joakyim

13¡Malayxwita, tuk'i'l taq'wixil ex mixya toj tnik'alilti'j

xjawa' tb'incha'na tjaya te kawb'il exqe' nimaq ja,

nche oktq'o'na xjal aq'unal

ex min ntchjo'na tekyq'ij!

14Intma'na: Kjawil nb'incha'n jun nin tja nkawb'ile',

kuky'i'l nimaq mqo'n toju' kol jawl, chija.

Ex e'kyajtq'o'na tokexspik'un,

b'jo'ktq'o'na k'ute kyi'ju' ttapiyil

ex kyeq tk'wa' oktq'o'na.

15¿Ma a nimaqkawilju' toj twitza

k'uteyile ti'ju' tja?

B'a'n sanq'ina'te tmana

tnik'alti'j toqna'te nb'incha'n ex tzinun,

qu'mtzun b'a'n tena'.

16Intoq tklo'n kyoklenju' prow ex jtz'o'nqe',

qu'mtzun b'a'n tena'.

Ikytzunte ojtzqi'n qi'nju'ye'.

Ayine' Dyos Manb'aj nchin yolin.

17Atzunta o'kx nb'ajxa' tk'u'ja

ti'j kanb'ab'l myab'a'n kanb'ab'ente,

inkub' tb'yo'na mixti' til,

ex nkub' tjtz'o'na ttanama ex toka yajulte, chi Dyos.

18Intma'n Qman Dyos ti'j Joakyin, tk'wal Josiy, nimaqkawil toj Juda, ikjalu:

Mix-a'lo'te k'oq'el ti'ja ajtkyima.

Mix-a'lo'te k'oq'el ex chiwt:

¡Malaywita witz'in mo ntzik! ¡Qab'a'nx twitza!

¡Taye! ¡Malayxwita nimaqkawil!, chiwt.

19Kb'elex mqu'na kse'n jun chej:

naq k'elex jwo'na

ti'jxi' Jerusalen.

Tqanil ti'j Jerusalen

20¡Aj Juda, kukyjaxe' twi' witz Lib'ano ex che ẍch'ine'!

¡Jawx toj kywi'ye' kywi' witz toj B'asan!

¡Che ẍch'inqe'ye' tzmajx ttxa'nwitz Ab'arim,

matxina' kub'kyi'j kykyaqilju' kyk'u'jlb'e'tza!

21Nyoline' kyeye' tej kyxi'ye' twitz jawl,

aye'tzunkye' min kyaje' tu'n kyb'inteye'.

Iktzun matxi' kyb'inchaju'ye' tzajx toj kyku'xumale':

¡Minkyjo'ne' tu'n ntzaj kyb'i'ne'!

22Che b'ajxe'l jub'cha'n kykyaqilju' kynejele' tu'n kyq'iq',

aye'tzu'n kyk'u'jlb'e'tza che elexq'i'n toj juntl tx'otx'.

Che b'elch'ixwiye' ex che b'el me'sa'ne'

tu'n tpaj tkyaqilju' kyb'inchb'aje' myab'a'n.

23Intzalaja ja'lo toju' tjaya,

kyoj k'ute tzajniq'i'n toj Lib'ano,

¡ajtzun ttzaj k'ixk'oj ti'ja kyajtela,

kse'n ajtitz'ji tal jun qya!, chi Dyos.

Tqanil tu'n Dyos te nimaqkawil Jekoniy

24Lu tyol Qman Dyos te Jekoniy, tk'wal Joakyin, nimaqkawil toj Juda, ikjalu: Kxe'l nma'ne' axxi'x wu'nxe': B'a'nqa jun xmilq'ob'ja ti'j nb'anq'ob'e' tu'n tok techel oklenj, jaku' tz'el nt'uxi'na,

25tu'n txinq'o'na toj kyq'ob' tajq'oja kyajb'il tu'n tkub' b'yo'na kyu'n, ju' inxi'x xob'a kye. Kxel nq'o'na te Nab'ukodonosor, nimaqkawil aj B'ab'ilon, ex kye aj Kaldey.

26Che kxelnq'o'ntzuntze' tuk'ilu' ttxuya toj jun tx'otx' jamyatzu' e'itz'ja'ye', axtzuntzu' che kyimela'ye' kykab'ile', chi Dyos.

27Layxna' tz'anjtzkye'kyi'j toju' tx'otx' jakyajb'ila'xi'x tu'n kyanjtz.

Nlab'ti t-sanjelal Dyos

28¿Ma iktzun Jekoniyju' kse'n pa'x xar mixti'x tajb'en,

kse'n jun toj tuja mix-a'lo'x nnajonte?

¿Tiqu'ntzun che elex xon kyuk'i'l tk'wal

toj jun tx'otx' min ojtzqi'n?

29¡Aya tx'otx', aya tx'otx', aya tx'otx',

b'intzju'ya tyol Qman Dyos!

30Lu ntma'n Qman Dyos:

Kytz'ib'anku'xe' ichan lu toju' kyu'jil tnam

naku'xwitloj jun ichan mixti' tk'wal,

jun ichan mak'ulb'an toju' tchwinqlal.

Qu'n mixti'x jun tk'wal

kpomel toju' tq'uqb'il Dab'i

tu'n tkawin jumajtl toj Juda, chi Dyos.