1Nman Dyos, matxi' tz'oka te kolb'ilqeye'
toj tkyaqil tab'q'iyil.
2Atxi'x na'mxtoq kyb'aj b'entju' witz
ex na'mxtoq tb'entju' tx'otx' ex tkyaqilju' ati twitz,
atxi'x toju' tq'ijlalil ojtxi'xi'x
ex toju' tq'ijlalil tzul,
axteju'ya Dyos.
3In nanjkyi'ju' xjal toj quq tu'na
ajtmanteya kjalu: Kutanj kyi'je' toj quq aye'ye' xjal. Chija.
4Axxi'x, iky kab'k'al lajnaq (1,000) ab'q'iju' teya,
kse'n q'ij ewi.
¡Ikyqe'ju' kse'n jte' kmoj xq'uqb'il toj qonik'an!
5Inche'x b'alalan tu'na naku'j tu'n tnimal a',
ex inik' kyna'l naku'j jun witzik';
6ikyqe'ju' kse'n k'ul inche b'echin te prim,
ajtzun tok qale nche kub' tzqij ex nche kyim.
7Axxi'x, inqo b'aje' tu'nju' ttx'u'jila,
¡inqo' kyej chukjiye' tu'n!
8Q'ancha'l qexi'xju' qile'
ex qb'inchb'ene' myab'a'n twitza.
9Axxi'x, tkyaqilju' qchwinqlale'
kb'ajel tu'n ttx'u'jila;
naq jun jiq'chanx nche ik'a'ju' qab'q'iye'.
10Oxnaq lajoj (70) ab'q'iju' qchwinqlale' njapun;
qatzun majx kuwqo'ye' njapun toj kyajnaq;
atzu'n qama qo tene' nimtoj
naqx yajb'il ex aq'untl ntzaj tq'o'n qeye'.
¡Lwiyxi'x nche b'jik'ju' ab'q'i, ikxu' kse'n ayo'ye'!
11¿Alxi'xkye ojtzqilte tipumal ttx'u'jila?
¿Alkye ojtzqilteju' tq'oja?
12Qo' t-xnaq'tzama tu'n qximane' ti'ju' qchwinqlale' ch'i'ntoj,
tu'ntzun qanq'ine' tuk'i'l nab'l.
13¡Nman Dyos, kutanjtz ti'ja quk'i'le'!
¿Jtojtzun tzula?
¡q'aq'antz tk'u'ja qi'je' ayo'ye' tmajena!
14Qo' tnajsama tu'n tk'u'jlalila ajtjawu'l q'ij,
tu'ntzun qb'itzane' toj tzalajb'il toj tkyaqilju' qchwinqlale'.
15Q'ontz b'a'npun ab'q'iya te tzalajb'il qeye'
kse'nqe' ab'q'i te yajb'il matxi' tzik'x qu'ne'.
16¡B'inchama tu'n kyka'yinteju' tmajena kyuk'i'lju' kyyajajil
ju' tb'inchb'ena ex tajwalila!
17Awtju' t-xtalb'ila Nman Dyos,
kub'ten qib'aj.
¡B'a'nwt tz'ela' qaq'une' twitza!
¡Iku', b'inchama tu'n telb'a'nju' qaq'une'! Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
