Is 15 - Mam Ostuncalco Bible

Tpakb'ab'lju' tzul kyi'j aj Moab'

1Tpakb'ab'lju' tzul ti'j tnam Moab':

Kub' xitu'n tnam Moab',

toju' qonik'an tkub' xitu'n Ar;

kub' xitu'n Moab',

toju' qonik'an tkub'xitu'n Kyir.

2Nche jawxju' xjal aj Dib'on oq'el

toju' ja te k'u'lb'il ati twi' witz.

Nche b'isun aj Moab' tu'nju' xitb'il

e' aj Neb'o ex aj Medeb'a.

Kykyaqilx sk'o'ji'n kywi',

ex jonile kyxmatzi.

3Nche b'etju' xjal kyoju' b'e tuk'i'l kyi'j te b'is;

nche ẍch'in kywi' ja tu'n tpaj b'is.

Kykyaqil nche oq' jachaq ta'qe' nim xjal

ex nche kub'aj tu'n kyoq'el.

4Nche qanin o'nb'il aj Esb'on ex aj Elale;

q'ojq'ojqe' tzmax toj Jaas ajkyẍch'in.

Qu'mtzun nche xob'ju' q'ojil aj Moab'

ex majx k'okyel xob'e' kyi'j.

5Nchin qanin o'nb'ile' ti'j Moab';

nche etz oqju' xjal ate' toj nche'x tzmax Soar ex tzmax Eklat-selisiy.

Nche jawx tk'u'j witz Luyit nche oq';

toj tb'eyil Oronaym

nche ẍch'in tu'n k'ixk'oj tu'nju' xitb'il.

6Matxi' che kyej tzqiju' xoch toj Nimrim,

tzqij qe'tlju' itzaj, kyimniqe'tlkye' k'ul,

mixti'tl jun t-xaq cha'x.

7Qu'mtzun nche b'uyin xjal kyq'inumal

ex nb'ajx kyiq'i'n tzmax ti'jxi' a' chjaj.

8Nẍchunju' sich' qanil o'nb'il

ti'jile tnaqachil Moab';

nche ponju' oq'e'n tzmajxtzu' toj Eklaym

ex tzmajxtzu' B'eer-elim.

9B'a'nqa nojniqe' xoch toj Dimon tu'n chik',

kxe'l nq'o'ne' txqantl kuw taq'wix tib'aj;

jun b'alun kxel ch'onkyeju' mache klet toj Moab',

exqe' mache kyej anq'in toj tx'otx' Moab'.