Ez 29 - Mam Ostuncalco Bible

Tqanilju' tzul ti'j Ejipt

1Tzaj yolin Qman Dyos weye' toj kab'lajoj (12) tajlal tlajoji'n xjaw te tlajoji'n ab'q'i, ex tma'n:

2-3Ichan, kutxi' twitz Paraon, nimaqkawil toj Ejipt, q'manxa toj nb'iye' te kjalu:

A ntma'n Qman Dyos ja'lu:

Chin okyele' te tajq'oja,

paraon, nimaqkawil toj Ejipt,

jun nintxkupa paqliya toju' nin a'

ex intma'na: weye' nin a' Nilo, ayine' nb'inchante.

4K'okyel nq'o'ne' xokb'il ti'j ttxa'na,

knb'incha'ye' tu'n kyb'jo'k ye' kyiẍ

ateqe' toju' nin a' ti'ju' txk'owila.

¡Kjawitz wiq'i'na toju' tnin a'ya

kyuk'i'lxi' kyiẍ yo'lqe'k ti'ju' txk'owila!

5K'elex nxona toj tchq'ajlaj,

kyuk'i'lxi' kyiẍ toju' tnin a'ya;

kb'el tz'aqa twitz tx'otx' toj q'ancha'l,

mix-a'lo'x kjawil q'inteya tu'n tkux mqu'na.

Knb'incha'ye' tu'n tb'aj ch'yo'na

kyu'n tojk'ul txkup ex kyu'n k'utz.

6Kykyaqilju' najlqe' Ejipt

k'elelkynik' qa ayine' Dyos Manb'aj.

Kyjoyju' aj Israel o'nb'il tuk'i'la,

atzunta oka kse'n jun ajlaj kye:

7Tej kyok ye' ti'ja

kub'toqja ex e'k'ixb'i tu'na;

tej kyajb'iltoq tu'n kyok ye' ti'ja,

kub'potz'ja ex e'kub' tz'aq tu'na.

8Qu'mtzun inma'ne', ayine' Dyos Manb'aj: Knb'incha'ye' tu'n kyul q'ojil ti'ja Ejipt, tuk'i'l k'uẍtx'e'nb'il, tu'n kyb'aj kub' b'yo'n t-xjala ex talu'na.

9Kjela naq chq'ajlajtl, ex k'elel kynik'ju' xjal qa ayine' Dyos Manb'aj. Tmaya qa teya a' Nilo exqa aya b'inchante.

10Ja'lo chin okyele' ajq'oj ti'ja ex ti'ju' taya. Kjela wu'ne' se'n chq'ajlaj xob'ajilx ex b'ajni xitj, tzajx Mikdol ponx Asuwan, ponx toj nqach tuk'i'l Etyopiy.

11Lay che ik'tl xjal ex txkup toja. Mix-a'lo'xte knajal toj kab'naq ab'q'i na'tz.

12K'okyela wu'ne' Ejipt te jun tx'otx' xitjnixi'x; che kjelten kab'naq ab'q'i nimaqttanama xitjniqe', xitjniqe'xi'x kyekywitz txqantl nimaqtnam xitjniqe', che b'je'lex wiq'i'ne' najlqe' toja ex che kxe'l nsputi'ne' kyoj txqantl tx'otx' ex nimaqtnam.

13Nxinma'ne', ayine' Dyos Manb'aj: tb'ajlenxi'tzu'n kab'naq (40) ab'q'i, che tzajel nb'uyi'ne' aj Ejipt kyoju' tx'otx' jamatxitoq che'xa' nsputi'ne'.

14Knb'incha'ye' tu'n tanjtzkyi'ju' aj Ejipt xini q'i'nqe' toj jitz'jtib'il ex tu'nkykub'najan toj tnayajkya'j te Ejipt, tojxu' kynajb'il tnejel, atzuntzu' ktenb'ela' jun kykawb'il mixti'x toklen.

15K'okyel te jun kawb'il naqch'i'n toklen kyxol kykyaqil, ex lay tentl tipumal kyib'aju' txqantl nimaqtnam. K'okyel tal b'o'sxi'x wu'ne', lay kawintl kyib'aj txqantl tx'otx';

16ex lay tz'okqetl kyk'u'j aj Israel ti'j Ejipt, qu'n tu'nju' lu k'elelkynik' myab'a'nju' kyxim tej kyxi' jyol o'nb'il atzu'. K'eleltzun kynik'tz qa ayine' Dyos Manb'aj, chi Dyos.

17Tzaj yolin Qman Dyos weye' toj jun tajlal tnejel xjaw teju' ab'q'i junaq wuq (27), tma:

18Matxi' che tzaj t-sma'n Nab'ukodonosor, nimaqkawil aj B'ab'ilon, t-xjal te q'oj ti'j Tiro; matxi'pe' kyej ẍle'jix toj kywi' kykyaqil ex matxi' b'jaw tx'a'kyix ti'j kyqul; extzun mixti'xte matxi' b'ent kyu'n kyuk'i'lju' t-xjal ti'j Tiro.

19Qu'mtzun inma'ne', ayine' Dyos Manb'aj, knb'incha'ye' tu'n tkub'ti'j Ejipt tu'n Nab'ukodonosor, ex tu'n kyb'je'l tiq'i'n tq'inumal ex tkyaqilju' atite; tu'ntzun tajb'en kb'je'lel talq'a'n te chojb'ilkye t-xjal te q'oj.

20Knb'incha'ye' tu'n tkub'ti'j Ejipt tu'n Nab'ukodonosor, chojb'ilteju' q'oj tb'incha ti'j Tiro, qu'n weye' saq'unana'. Ayine' Dyos Manb'aj nchin q'mante.

21Knb'incha'ye' tu'n tten tipumalju' tnam Israel toju' tq'ijlalil lu, ex tu'n tyolina Esekyel chik'lixi'x kye. K'eleltzun kynik'tz qa ayine' Dyos Manb'aj.