1¡Kyq'onx chjonteye' te Qman Dyos!
¡Kypakb'anxju'ye' tb'i!
Kymanqe'xju'ye' tb'inchb'aj kye tnam.
2Che b'itzanqe' b'itze' te ninb'ilte.
¡Kyolinxju'ye' nimaq tb'inchb'en!
3Che tzalajxe' tu'nju' tb'i xjan.
¡Che tzalajxe'
aye'ye' nche jyone' ti'j Qman Dyos!
4Kyjyome' Qman Dyos, exju' tipumal;
kyjyome' toj tkyaqil kmuj.
5Kyna'nqe'tzju'ye' nimaq tb'inchb'en tb'anilqexi'x,
exqe'ju' tchaq'b'il kyajni tma'n;
6aye'ye' tyajajil Ab'raam ju' tmajin Dyos;
aye'ye' tk'wal Jakob', ju' sk'o'nqe'ye' tu'n.
7Ate Dyosju' Qman Dyos;
¡ate nkawin tib'aj tkyaqil twitz tx'otx'!
8Lay tzik'tna'lju' tyol kyejni b'entti'j tu'n
b'a'nqa jte'xku' wiq kyyajajil xjal mache ik' twitz tx'otx'
9aju' tyol kyej b'entti'j tuk'i'l Ab'raam,
ju' kyej ttziya'n te Isaak
10ex kyej tq'o'n te jun kawb'il te Jakob',
ex jun yol kyejni b'entti'j tejumajx kye aj Israel,
11tej tmante:
Kxe'l nq'o'ne' tx'otx' Kanaan teya
tu'n tok te tetzb'ila. Chij.
12B'a'nqa naq ch'i'ntoq kyb'aj,
jte' ajb'etun toju' tx'otx' Kanaan,
13intoq che ik' toj jun nintnam ex nche pon toj juntl
ex intoq che pon toj jun kawb'il ex inche'x toj juntl,
14min taj Qman Dyos tu'n kyb'aj yajla'n,
expe' xitab'tzi'n kyeju' nimaqkawil:
15Lalun tzaq'pon kyq'ob'e' kyi'ju' sk'o'nqe' wu'ne'
ex lalun che oktene' yajulkye nsanjelale'. Chij kye.
16Tzaj tq'o'n we'yaj toju' tx'otx' Kanaan,
tkyaqilju' kywa eltiq'i'n.
17Matxi'toqtzun txitnejb'a'npun Jse kywitz,
xikyk'a'yi'n te majen.
18Eb'aj k'ixb'sa'n tqan kyu'n xpatx'k'uxb'il;
¡okk'lo'n tqul tu'n k'uxb'il!
19Ok Jse toj joyb'ilti'j tu'n tyol Dyos,
tzmaxi'j tjapunju' yol ojetoq tma Jse.
20Tchaq'ju' nimaqkawil intoq kawin kyib'aj txqan xjal,
tu'n ttzaqpet Jse;
21oktq'o'n te nejenel toj tja
ex tib'aj tkyaqilju' atitoq te,
22tu'n t-xnaq'tzan kyeju' nejenel ex tijwnaq
tu'n kyok ati kynab'l.
23Yajxi'tzuntel ul Israel, aju' Jakob',
ex najan kse'n jun ajb'etun toj Ejipt,
toju' tx'otx' Kam.
24Tb'incha Qman Dyos tu'n tchmet-xi'x kyajlalju' ttanam,
ex tu'n kyok kuwqe'xi'x kyekywitzju' aj Ejipt.
25Tb'inchatzun tu'n kyok miltz'uju' aj Ejipt
ti'ju' ttanam
ex tu'n kykub' kysb'u'nju' tmajen Dyos.
26Exi'tzun tchq'o'n Dyos Moysestz ju' tmajen,
tuk'i'l Aaron ju' ojetoq che jaw t-sk'o'n,
27eb'enttzun techlaltz kyu'n toj chq'ajlaj:
¡nimaq ti'xti' te lab'te'n kyb'incha toju' tx'otx' Kam!
28Tzaj tq'o'n Dyos qxopin ex majx kyej qtakye',
mixtzunti'x xi'ju' tyol toj kywinqilu' aj Ejipt.
29Eb'jaw b'entju' nin a' te chik' tu'n,
ex e'kub'tb'yo'nju' kyiẍ toj;
30kub' tnojsa'n toju' tnam kyu'n tz'u'nxtx'o,
expe' ikx ja nwtana' nimaqkawil.
31Yolin Qman Dyos, tzajtzun b'ent txqan ta'jin chejtz ex us naku'j muj
majxkub' noju' tx'otx' Ejipt kyu'n.
32Tzaj tq'o'n saqb'aqun te t-xel jb'al,
tuk'i'l tqan taq' q'aq' tib'aju' tx'otx' Ejipt.
33B'aj tyaju'n kyawal ex tqan kylob'aj iw;
¡eb'aj ttoqi'n tze toj Ejipt!
34Yolin Dyos, ex eb'ju'l ẍt'ikt'u'l;
¡txqanxi'xtoq kyb'aj, layxtoq b'ent kyajlet!
35¡Eb'jo'kten walteju' k'ul toj kojb'il
ex tkyaqilju' awal atitoq twitzu' tx'otx'!
36¡E'kub'tb'yo'n tnejel k'wa'lb'aj tojile junjun ja,
toju' tx'otx' Ejipt!
37Yajxi'tzuntel etzti'n Qman Dyos ttanam
tuk'i'l nim q'anpwaq ex saqpwaq,
ex mixti'te jun yab'wit kyxolju' tnej kyyajajil tej kyetz.
38Ojexi'x che tzalaju' aj Ejipt tej kyka'yinte kyb'je'tz,
qu'n matxi'toq che yajti tu'n kpaj.
39Tzaj tq'o'n Qman Dyos jun tnej muj e'wb'ilkye
ex jun tnej q'aq' spik'b'alteju' kyb'e te qonik'an.
40Xikyqani'n kychi', ex tzaj tq'o'n kychi' tz'chin,
eb'aj wan tu'n b'a'nxi'x ti'ju' kywa tzaj tq'o'n toj kya'j.
41Tjaqju' pik, ex etzchitj a' toj
b'et kse'n jun nin a' toj chq'ajlaj.
42Qu'n tzaj tna'nju' tyol xjan
tzaj ttziya'n te Ab'raam ju' tmajin.
43Ikytzun eb'je'tza' tiq'i'n Dyos ttanam sk'o'nqe' tu'n,
tuk'i'l sich' te tzalajb'il,
44ex tzaj tq'o'n kytx'otx' txqantl tnam kye
tuk'i'lxi' twitz kyaq'unb'en,
45tu'ntoq kyjapunju' tkawb'il Qman Dyos kyu'n
ex tu'n txi' kyb'i'n t-xnaq'tzb'il.
¡Ajwalinjtzxwit Qman Dyos! Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
