1¡Ajwalinjtzxwitju' Qman Dyos!
Kyq'onx chjonteye' te Dyos, qu'n majx b'a'nte,
qu'n tejumajxju' tk'u'jlalil.
2¿Alxi'xkye kb'entel tchik'b'ankyeju' tkanb'ab'l Qman Dyos?
¿Alxi'xkye k'ajwalilte kse'nxju' toklen?
3Tzalajb'ilte' kyeju' nkyb'incha'n tnik'alilti'j
ex kukx kyb'inchanteju'.
4Taye, chin tna'ntza aj tb'inchanteju'ya b'a'n teju' ttanama;
a chin tna'ku'ya ajtula kolol,
5tu'ntzun nka'yinteye' kytzalajb'ilju' tmajena sk'o'nqe' tu'na,
ex tu'n ntzalaje'
tuk'i'lju' ttanama.
6Matxi' qo b'inchan ile' kse'nkye qmane';
matxi' qokub' chukjiye'; matxi' qb'inchaju'ye' myab'a'n.
7Tej kyten qmane' toj Ejipt,
min okkyq'o'n kyoklenju' tb'inchb'ena tb'anilqexi'x;
ik'tna'lju' tk'u'jlalila kyu'n,
ex jawkyi'nkyib' ti'ja ttziju' Kyeq Ninnjab'.
8Atzunte Qman Dyos e'tkol,
xityek'u'n tipumal te ninb'ilteju' tb'i.
9Xittzak'u'nju' Kyeq Ninnjab' ex kyejten b'e tzqij toj.
Eb'jik'x tiq'i'n, t-xexi' ninnjab'
kse'n toj chq'ajlaj.
10Ikytzu'n e'tkola' kyeju' kyajq'oj,
te kyipumalju' ntoq walti'j kyk'u'j kyi'j.
11Eb'ajkyaj mulq'aju' kyajq'oj tjaq' ninnjab'
ex mixti'xte jun kyej anq'in.
12Atzuntzu' xa'kyoksla'na' tyol Qman Dyos ojetoq kyej ttziya'n kye
ex jawkyajwali'n tu'n b'itz.
13Lwiyxi'xtzun ik'kyna'lju' tb'inchb'en Dyos kyu'n,
ex min kyxima tu'n telkynik' ti'ju' tb'is tk'u'j Dyos.
14Kub' kyq'o'n Qman Dyos toj joyb'ilti'j
toj chq'ajlaj,
e'ok-il ti'j tu'n tb'inchanteju' kyajb'il.
15Atzunte Qman Dyos tzaj tq'o'nju' ntoq kyqani'n,
ex tzaj tq'o'n jun yab'il te b'iyol kyi'j.
16Tzaj tx'a'lti'j kyk'u'j ti'j Moyses toju' kyxmuj,
ex ikx ti'j Aaron, ju' xjansa'n tu'n Qman Dyos.
17Xi'tzun k'ab'chaj tx'otx'tz ex xiqoptz'aj Datan toj,
kyuk'i'lxi' jun k'loj xjal mujlikytzi tuk'i'l Ab'iram.
18¡Ojexi'x k'antju' q'aq' kyi'j kykyaqil!
¡Majx eb'aj tz'e'yju' b'inchal myab'a'n!
19Kub' kyb'incha'n jun tilb'ilal tman wakx t-xeju' witz Oreb',
jun witzileb' q'anpwaq b'incha'n toj q'aq', e' k'uluntzuntz twitz:
20¡kych'exb'eju' Dyos nim tajwalil
tuk'i'l tilb'ilal jun wakx nwan k'ul!
21Ik'tna'l Qman Dyos kyu'n, ju' klol kye,
extzun ojetoq che tb'incha nimaq techlal toj Ejipt,
22Ojetoq che tb'incha nim ti'xti' tb'anilqexi'x toj tx'otx' Kam
ex e'ti'xti' te lab'te'n toju' Kyeq Ninnjab'.
23Tma Qman Dyos tu'n kykub' t-xitu'n;
atzunte Moyses ju' sk'o'n tu'n, kub'san kyi'j
we'tzun ttx'u'jil Dyos tu'n,
ex min e'kub' t-xitu'n.
24Yajxi'tzuntel el kyik'o'n jun tx'otx' tb'anilxi'x,
ex min xikyoksla'nju' ojetoq tma Qman Dyos kye;
25e'yolin taq'wix ti'j Qman Dyos kyoj kypach
ex min xikyb'i'nju' tchaq'b'il.
26Jawtzun tiq'i'n Qman Dyos tq'ob' ex majx tma'n kye
qa oktoq che kb'el tb'yo'n toj chq'ajlaj,
27qa oktoq che b'eltb'yo'nju' kyyajajil
ex oktoq che kxe'l t-slamu'n kyxolju' tnam nche niman kye txqantl dyos.
28Eb'jo'k te tmajen k'a'yi'n B'aal-peor,
ex eb'aj wan ti'ju' chojb'il kub' kyq'o'n kywitzju' dyos mixti' kyimniqe'.
29Okkyq'o'n ttx'u'jil Qman Dyos tu'n kyb'inchb'en taq'wix,
tzajtzun jun tx'u'j yajb'iltzu' kyi'j.
30Jawtzun tiq'i'ntib' Pinees ex kub' tb'yo'nju' xjal intoq b'inchan il,
we'tzun tx'u'j yajb'iltz.
31B'a'n ela'ju' tb'incha toj twitz Dyos,
intzaj tna'n kukxju' atl junjun tnej kyyajajil nche b'jik'.
32Ex okkyq'o'n ttx'u'jil Qman Dyos
ttziju' a' Merib'a,
tu'ntzun kypaj
toq'wix kyaja' Moyses,
33qu'n tzaj ttx'u'jil Moyses tu'n kpaj
ex min ximan kyi'ju' tyol e'tma.
34Min e'kub' kyxitu'nju' tnam
ju' tchaq' Qman Dyos kye tu'n kyxitet.
35B'ajxpe' kysmo'nkyib',
kyuk'i'lju' nche niman kye txqantl dyos
ex b'je'l kykno'nju' intoq kyb'incha'n:
36ek'ulun kywitzju' kywitzileb' txqantl tnam
Qu'mtzun ekub'a' xitu'n,
37e'xikyq'o'n kyk'wal ex kymyal
te chojb'il kyeju' tajaw il lu.
38Kub' kyqo'n kychk'elju' mixti' kyil,
kychk'elju' kyk'wal ex kymyal,
ex kub' kyq'o'n te chojb'il kywitz witzileb' toj Kanaan.
B'aj txa'jju' tx'otx' lu toj chik',
39eb'aj tz'ilix ex e'ok ajpajil twitz Dyos
tu'n kpaju' kyb'inchb'en myab'a'n.
40Tzaj ttx'u'jil Qman Dyos kyi'ju' ttanam,
ex eb'je'l t-suchu'nju' teqe';
41E'kyaj tkolb'e'n toj kyq'ob'ju' nche niman kye txqantl dyos,
ex kub'kyi'j kyu'n kyajq'oj;
42e'kub'jtz'o'n,
e'kub' yaju'n b'a'nxi'x tjaq' kykawb'ilju' kyajq'oj.
43B'a'npun maj e' klonjtz tu'n Qman Dyos,
aye'tzunkye min xikynima'nju' t-xim
tu'nxtzunju' kyb'inchb'en myab'a'n ekub'a' yajta'.
44Tu'npe'tzunju', tej kytzaj tka'yi'n nche yajti
ex tej tb'inte nche oq',
45tzaj tna'nju' tyol kyej b'entti'j kyuk'i'l
ex tch'exb'eju' t-xim,
qu'n nimxi'x tk'u'jlalil kyi'j:
46¡tb'incha tu'n ttzaj q'aq'an kyk'u'ju' kyajq'oj kyi'j
tu'ntzun b'a'nku' kyilwi tu'n!
47¡Qo' tkloma Nman Dyos!
¡Qo' tb'uyitza kyxolu' nimaqtnam
tu'ntzun qajwalinteju'ye' tb'iya xjan,
tu'ntzun qajwalinteya toj tzalajb'il!
48¡Nimanjtzxwit Qman Dyos, nkyk'lu'n aj Israel,
toj tkyaqil tab'q'iyil!
¡Kykyaqilxwit che q'mante: Ikxwitju'!.
¡Ajwalinjtzxwit Qman Dyos! Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
