1Tzaj yolin Qman Dyos weye', ex tma:
2Kutxi'tla tk'etzju' witz Seyir ex yolin ti'j toj nb'iye'.
3Q'manxa te:
A ntma'n Qman Dyos ja'lu;
chin okyele' te tajq'oja,
witz Seyir,
ex kb'el ntz'e'ysa'n twitza
kjel nq'o'na ch'q'ajlaj ex xitjnitl.
4Che kjel nxitu'ne' nimaqtnam toja,
ex naq jun chq'ajlajtla kjel.
K'eleltzun tnik'tza qa ayine' Dyos Manb'aj.
5Oje tz'oka ajq'oj tejumajx kyi'j aj Israel, q'ojina kyi'j tej ttz'e'yset kywitz b'a'nxi'x tu'n tpaj kyil.
6Oktzun xel nma'nwe' axxi'x, ayine' Dyos Manb'aj, kxel nq'o'na toj kamik, ex k'okyel lpeju' kamik ti'ja. Ati tila tu'n tkyima, ex kjyonjtzela tu'n kamik.
7Naq chq'ajlajtla kjel nq'o'ne' ex xitjnitl, witz Seyir, ex lay waje' tu'n tik' jun xjal tk'etza.
8Knb'incha'ye' tu'n kyb'aj noju' witz teya ex ttxa'n b'us, e' tb'ya'ya ex nimaq a', kyu'n kyimni che b'ajelkyim toj q'oj.
9Kjel nq'o'na chq'ajlajtl tejumajx, ex mix-a'lo' knajal kyoju' nimaqttanama. K'eleltzun kynik'tze' qa ayine' Dyos Manb'aj.
10Tmaya: K'okyelte' tnam Israel kyuk'i'lju' kab'e' tkawb'il weye'; chin okyele' te tajaw, b'a'nqa najli Dyos atzu', chija.
11Ayintzunwe', Dyos Manb'aj, kxe'l nma'ne' ayinku'ye', knb'incha'ye' ti'ja kse'nxju' ttx'u'jila, ex tq'oja ex ik'b'ilkye aj Israel tu'na. Oktzun k'elel kynik'tz ajtkub' ntz'e'ysa'ne' twitza.
12Ktla'tzuntza qa b'i'ntl wu'ne' ayine' Dyos Manb'aj, tkyaqilju' tyasb'ila tmaya kyi'ju' witz toj Israel. Tmaya: ¡Jun chq'ajlajqe', ja'lo che mankul qu'n! chija.
13Xitjqo'n ttziya tyolina wi'je', ex el ttzaqpi'n taq'a wi'je'. Nb'iku'we'.
14A kxe'l nma'ne' lu, ayine' Dyos Manb'aj: Kykyaqil twitz tx'otx' che tzalajel ajtkub' nxitu'na.
15Ojexi'x tzalaja tej tkub' xitetju' tx'otx' tk'am Israel te tetzb'il, ikxtzun kb'ajelju' ti'ja: kjela te jun chq'ajlaj, witz Seyir, tx'otx' Edom. Oktzun k'elel kynik'tze' qa ayine' Dyos Manb'aj, chi Dyos.
Who We AreWhat We EelieveWhat We Do
2025 by iamachristian.org,Inc All rights reserved.
