1 Cr 23 - Mam Ostuncalco Bible

Aye' aj Leb'i ex kyaq'un

1Tetzunj matxi'toq tijinxi'x Dab'i, oktq'o'n toklen Salomon ju' tk'wal te nimaqkawil toj Israel,

2ex eb'aj tb'u'yi'n kykyaqilju' nejenel kyxol aj Israel, exqe' pale ex aj Leb'i.

3Jawtzun kyajlalu' aj Leb'i, tzajx kyuk'i'lju' te junaq lajoj (30) kyab'q'i, ex japun kyajlal toj kyajmutx' o'lajojk'al (38,000).

4Kyxoltzu'n ja'lu, e'okq'o'n oxemutx' (24,000) q'elte ttxa'nju' aq'untl toju' tja Dyos, o'lajk'al (6,000) tu'n kyok te ajb'el toj kawb'il ex te ajkawil,

5lajk'al (4,000) tu'n kyok xq'uqil ttzija, ex lajk'al (4,000) tu'n kyb'itzan te Qman Dyos kyuk'i'lju' chnab' xitq'o'n b'incha' Dab'i.

6Eb'ajkub' taq'pu'n Dab'i toj tneji'n kse'nxju' kyajlal tk'wal Leb'i: aye' Werson, Kyeat ex Merari.

7Aye' tk'wal Werson ja'lu: Ladan ex Simi.

8Oxe' tk'wal Ladan ten: tnejil Jeyel, ex Setam ex Joel.

9Ex oxe' tk'wal Simi ten, aye': Selomit, Asyel ex Aran. Aye'tzun nejenelju' kyxolu' tyajajil Ladan.

10Kyaje' tk'wal Simi ten, aye': Jaat, Sisa, Jewus ex B'erya.

11Atoq tnejelu' Jaat, atzun tkab'u' Sisa; aye'tzunkye' Jewus ex B'erya mya nim kyk'wal ten, qu'mtzun naq te jun ja xjal e'oka' q'o'n toju' ajb'eb'l.

12Kyaje' tk'wal Kyeat ten, aye': Amram, Isar, Eb'ron ex Usyel.

13Aye'tzu'n tk'wal Amram aye' Aaron ex Moyses. Ate Aaron jaw t-sk'o'n Dyos tu'n kykub' tq'o'n oyaj xjanqe'xi'x, tu'n tkub' ttz'e'ysa'n sturak twitz Qman Dyos, tu'n tajb'en te ex tu'n txi' kyqani'n ky'i'wb'il kukxju', aju' aq'untl lu tu'n kyb'inchante Aaron kyuk'i'lju' tk'wal kukxju'.

14Ex ikx eku'x q'o'n Moyses kyuky'i'lju' tyajajil toj kyajlalju' tnej aj Leb'i.

15Aye' tk'wal Moyses ja'lu: Werson ex Elyeser.

16A Seb'wel tnejel tk'wal Werson.

17Atzu'n Reab'iy tnejel tk'wal Elyeser, ex mixti' e'tentl tk'wal; atzunte Reab'iy nim tk'wal ten.

18A Selomit tnejil tk'wal Isar.

19Aye' tk'wal Eb'ron ja'lu: tnejil Jeraiy, tkab' Amariy, toxi'n Jaasyel, tkyaji'n Jekaman.

20Aye'tzu'n tk'wal Usyel ja'lu: tnejel Mikaiy, tkab' Isiy.

21Aye' tk'wal Merari aye' Mali ex Musi. Aye'tzu'n tk'wal Mali aye': Eleasar ex Kyis.

22Kyim Eleasar ex mixti'x ten jun tk'wal q'a: naq tmyal e'ten, ju' e'mje kyuk'i'lu' tk'wal Kyis ju' kytiy.

23Ex oxe' tk'wal Musi ten, aye': Mali, Eder ex Jeremot.

24Aye'tzun tyajajil Leb'iju', kse'nxju' kyb'aj toj junjun ja, tz'ib'a'n kyb'i tej tjawju' kyajlal, nejenelqe', tzajx kyuk'i'lju' te winqi'n kyab'q'i, ju' intoq che ajb'en toju' aq'untl toj tja Dyos.

25Ojetoq tma Dab'i: Matxi' tzaj tq'o'n Qman Dyos nak'b'il teju' ttanam ex atzu' ktenb'ela' tejumajx toj Jerusalen.

26Qu'mtzun lay tzik' kyiq'i'n jumajtl aj Leb'iju' ja xb'alun te Dyos exqe' ti'xti' nche ajb'en toj k'u'lb'il, chij.

27Iktzu'n, kse'nxju' b'ajsb'il tyol Dab'i, jaw kyajlalju' aj Leb'i tzajx kyuk'i'lju' matxi'toq che el winqi'n ab'q'i,

28e'kyajtentzuntz tu'n kyajb'en kyeju' pale tyajajil Aaron, tu'n kyb'inchanteju' aq'untl toju' tja Dyos, twi' pe'n ex kyoju' ja, ex tu'n kyjsoq'inteqe' ti'xti' xjanqe' ex tu'n kyb'inchante txqantl aq'untl toju' tja Dyos.

29Toj kyq'ob' ta'qe'toqu' wab'j xjansa'n intoq kub' txoli'n, e' arin te oyaj ti'j twitz awal k'ok'e'kywitz, e'wab'j muqin mixti' ttx'amal, e'oyaj tzq'ajsa'n toj k'wil k'ok'e' kyxe, e'tq'otjil wab'j, ex tkyaqilju' malb'il ex echb'il.

30Expe' ati tu'n kyten tkyaqil q'ij toju' tja Dyos, prim ex qale, tu'n kyq'on chjonte ex tu'n kyajwalinte Qman Dyos,

31ex tu'n tkub' kyq'o'n tkyaqilju' chojb'il k'ok'sb'il twitz Qman Dyos kyoju' q'ij te ojb'il, kyoju' ninq'ij te ak'a'j xjaw ex kyoju' ninq'ij nimaq kyoklen, tu'n kyajb'en kukxju' te Qman Dyos kse'nxju' kyajlal nnojqelan.

32Ex toj kyq'ob'toq ta' tu'n tka'yitju' ja xb'alun te mujb'ab'ltib'il tuk'i'l Dyos exju' ja xjan, intoq che ajb'en toju' tja Dyos kyuk'i'lju' kyitz'in ex kytzik, tyajajil Aaron.