Khé-sī-lio̍k 22

Khé-sī-lio̍k 22 - 現代台語譯本羅馬字版(TTVR)-闽南语

1Thiⁿ-sài koh pò góa khòaⁿ oa̍h-miā-chúi ê hô, chhin-chhiūⁿ chúi-chiⁿ hiah-ni̍h kng-liāng, tùi Siōng-tè kap Iûⁿ-ko ê pó-chō hia lâu--chhut-lâi,

2thong-kè siâⁿ tiong-sim ê koe-lō͘. Hô ê siang-pêng ū oa̍h-miā-chhiū, ōe kiat ké-chí cha̍p-jī piàn, ta̍k kò-ge̍h kiat chi̍t piàn, chhiū-hio̍h ōe chòe i-tī lia̍t-pang ê lō͘-ēng.

3Siâⁿ-lāi lóng bōe koh ū chiù-chó͘.

Siōng-tè kap Iûⁿ-ko ê pó-chō ōe tī siâⁿ-lāi; I ê po̍k-jîn ōe kèng-pài I,

4mā ōe khòaⁿ-kìⁿ I ê bīn; I ê miâ ōe siá tī in ê thâu-hia̍h.

5Bōe koh ū mî--sî; in bô su-iàu teng ê kng á-sī ji̍t-thâu, in-ūi Chú Siōng-tè ōe kā in chiò-kng, in ōe éng-éng-oán-oán chiáng-koân.

Ki-tok Lâi-lîm

6Thiⁿ-sài kā góa kóng, “Chiah-ê ōe chin-si̍t khó-khò. Hit-ūi kám-tōng chèng sian-ti ê Chú Siōng-tè ū chhe I ê thiⁿ-sài chiong it-tēng sûi-sî ōe hoat-seng ê tāi-chì chí-sī I ê chèng po̍k-jîn.”

7Iâ-so͘ kóng, “Khòaⁿ ah, góa liâm-piⁿ lâi. Chun-siú chit-pún chheh ū-giân ê ōe ê lâng chin ū hok-khì!”

8Góa Iok-hān, chiū-sī chhin-sin ū thiaⁿ--kìⁿ koh khòaⁿ-kìⁿ chiah-ê sū hit-ê lâng. Góa thiaⁿ--tio̍h koh khòaⁿ--tio̍h liáu-āu, chiū phak lo̍h-khì tī chiong chiah-ê sū chí-sī góa ê thiⁿ-sài kha-chêng beh kā i pài.

9Put-kò i kā góa kóng, “Choa̍t-tùi m̄-thang! Góa kap lí, í-ki̍p kap lí pîⁿ-pîⁿ chòe hiaⁿ-tī ê sian-ti kap chun-siú chit-pún chheh ê ōe ê lâng, lóng pîⁿ-pîⁿ chòe po̍k-jîn. Lí tio̍h pài Siōng-tè!”

10I koh kā góa kóng, “M̄-thang chiong chit-pún chheh ū-giân ê ōe hong-ba̍t, in-ūi ū-giân si̍t-hiān ê sî-khek kūn lah.

11Hō͘ put-gī ê lâng kè-sio̍k chòe put-gī; hō͘ ù-òe ê lâng kè-sio̍k ù-òe; hō͘ gī ê lâng kè-sio̍k si̍t-hêng kong-gī; hō͘ sèng-kiat ê lâng kè-sio̍k sèng-kiat.”

12Iâ-so͘ kóng, “Khòaⁿ ah, góa liâm-piⁿ lâi! Góa beh tòa pò-siúⁿ lâi, chiàu ta̍k-ê lâng ê hêng-ûi kā i hôe-pò.

13Góa sī A-ní-hoat kap A-bí-ka, sī khí-thâu kap soah-bé, sī khai-sí kap kiat-sok.”

14Chiong tn̂g-phàu sóe chheng-khì hiah-ê lâng chin ū hok-khì, in ū tit-tio̍h koân thang chia̍h oa̍h-miā-chhiū ê ké-chí, koh thang tùi chiah-ê mn̂g ji̍p-siâⁿ.

15Hiah-ê káu-lūi, kiâⁿ siâ-su̍t--ê, îm-loān--ê, thâi-sí-lâng--ê, pài ngó͘-siōng--ê, kap it-chhè ài kóng pe̍h-chha̍t koh chòe sū kan-chà--ê, lóng tio̍h lâu tī siâⁿ-gōa.

16“Góa — Iâ-so͘ í-keng chhe góa ê thiⁿ-sài, tī chiah-ê kàu-hōe chiong chiah-ê sū tùi lín choh-chèng. Góa sī Tāi-pi̍t ê Kun, sī i ê hō͘-tāi, sī kng-liāng ê Khé-bêng-chhiⁿ.”

17Sèng Sîn kap Sin-niû lóng kóng, “Lâi!”

Thiaⁿ--kìⁿ ê lâng tio̍h kóng, “Lâi!”

Chhùi-ta ê lâng tio̍h lâi!

Ì-ài ê lâng thang pe̍h-pe̍h niá-siū oa̍h-miā-chúi.

18Góa kā ta̍k-ê thiaⁿ-tio̍h chit-pún chheh ū-giân ê ōe ê lâng kéng-kò: Nā ū lâng kā i ke-thiⁿ, Siōng-tè ōe chiong chit-pún chheh só͘ kì ê chai-hō ke-thiⁿ hō͘ i.

19Nā ū lâng san-tû chit-pún chheh ū-giân ê ōe, Siōng-tè mā ōe tùi chit-pún chheh só͘ kì oa̍h-miā-chhiū kap Sèng-siâⁿ ê hok-hūn san-tû i ê hūn-gia̍h.

20Ūi-tio̍h chiah-ê sū choh-chèng Hit-ūi kóng, “Tio̍h, góa liâm-piⁿ lâi!”

Amen! Chú Iâ-so͘ ah, chhiáⁿ lâi!

21Goān Chú Iâ-so͘ ê un-tián kap lín tāi-ke tông-chāi!

Khé-sī-lio̍k 22 - 現代台語譯本羅馬字版(TTVR)-闽南语

Learn More About Us