Iâ-lī-bí-su 47 - 現代台語譯本羅馬字版(TTVR)-闽南语

Iú-koan Hui-lī-sū

1 Ai-ki̍p-ông kong-kek Ka-sat í-chêng, Siōng Chú chiam-tùi Hui-lī-sū-lâng, tùi sian-ti Iâ-lī-bí kóng-ōe.

2Siōng Chú kóng,

“Lí khòaⁿ, pak-hng ê hô-chúi tiòng-koân,

chiâⁿ-chòe chi̍t tiâu hoàn-lām ê tōa-hô,

im-kè choân-tōe kap kî-tiong só͘-ū--ê,

khàm-kè siâⁿ kap siâⁿ-lāi ê chū-bîn;

lâng beh hoah-hiu,

kéng-lāi ê chū-bîn lóng tōa-siaⁿ thî-khàu.

3Chòe lāu-pē--ê chi̍t-ē thiaⁿ-tio̍h chiàn-bé bé-tôe ê siaⁿ,

chiàn-chhia hō͘ tōe tín-tāng ê siaⁿ,

chhia-lián kō--kè ê siaⁿ,

siang-chhiú chiū sng-nńg,

bô hoat-tō͘ oa̍t-tńg-sin kiù ka-kī ê gín-á.

4Sî-ji̍t chi̍t-ē kàu,

Siōng Chú ōe húi-bia̍t só͘-ū ê Hui-lī-sū-lâng,

siau-bia̍t chhun--lo̍h-lâi beh pang-chān Thài-ní kap Se-tùn ê lâng;

Siōng Chú beh húi-bia̍t Hui-lī-sū-lâng,

siau-bia̍t Ka-hui-thok hái-tó só͘ chhun ê chū-bîn.

5 Ka-sat thì kng-thâu pi-siong,

A-si̍t-ki-lûn mā o͘-iú--khì ah.

Tī pêng-goân só͘ chhun ê Hui-lī-sū-lâng ah,

lín koah ka-kī ê seng-khu ai-siong, beh kàu tī-sî?

6Lín kiò kóng, ‘Siōng Chú ê to-kiàm ah,

lí kàu tī-sî chiah ōe an-chēng?

Tio̍h kiu ji̍p-khì to-siù, m̄-thang koh tín-tāng.’

7I ná ū khó-lêng an-chēng leh?

Siōng Chú bēng-lēng i khì kong-kek A-si̍t-ki-lûn,

kong-kek tòa tī hái-piⁿ ê chū-bîn;

góa Siōng Chú phài i khì, chit-kiāⁿ sū í-keng tiāⁿ-tio̍h.”

Learn More About Us