Sū-su-kì 16

Sū-su-kì 16 - 現代台語譯本羅馬字版(TTVR)-闽南语

Chham-sun tī Ka-sat

1 Chham-sun lâi Ka-sat, tī hia khòaⁿ-tio̍h chi̍t ê ki-lú, chiū kap i khùn.

2Ū lâng kā Ka-sat-lâng kóng, “Chham-sun lâi kàu lán chia.” In chiū thàu-mî kā i pau-ûi, kui-mî chēng-chēng tī siâⁿ-mn̂g bâi-ho̍k; in kóng, “Thiⁿ-kng lán chiū thang thâi i.”

3Chham-sun khùn kàu pòaⁿ-mî, khí--lâi, chiong siâⁿ-mn̂g ê mn̂g-sìⁿ, nn̄g ki mn̂g-khiā, kap mn̂g-kông, lóng thiah--khí-lâi, hē tī keng-thâu, giâ-khì Hi-pek-lûn tùi-bīn ê soaⁿ-téng.

4Āu-lâi, Chham-sun tī So-lia̍t Soaⁿ-kok ài-tio̍h chi̍t ê lú-chú Tāi-lī-la.

5Hui-lī-sū-lâng hiah-ê siú-léng khì chhē hit-ê lú-chú, kā i kóng, “Lí tio̍h kā Chham-sun làu-ōe, khòaⁿ i sī-án-chóaⁿ chiah-ni̍h ū khùi-la̍t; goán tio̍h án-chóaⁿ chòe, chiah ōe-tàng khah iâⁿ i, kā i pa̍k--khí-lâi, kā i chè-ho̍k. Goán ta̍k-ê lâng chiū hō͘ lí chi̍t-chheng chi̍t-pah tè gûn.”

6 Tāi-lī-la chiū kā Chham-sun kóng, “Chhiáⁿ lí kā góa kóng, lí sī-án-chóaⁿ chiah-ni̍h ū khùi-la̍t; tio̍h án-chóaⁿ chiah ōe-tàng kā lí pa̍k--khí-lâi, kā lí chè-ho̍k.”

7 Chham-sun ìn kóng, “Lâng nā ēng chhit tiâu iáu-bē ta ê soh-á kā góa pa̍k, góa chiū kap phó͘-thong-lâng siâng-khoán bô khùi-la̍t.”

8 Hui-lī-sū-lâng hiah-ê siú-léng chiū the̍h chhit tiâu iáu-bē ta ê soh-á hō͘ Tāi-lī-la, i chiū ēng che kā Chham-sun pa̍k--khí-lâi.

9Hit-sî í-keng ū lâng tī i ê lāi-pâng teh tng-tán; i hoah kóng, “Chham-sun, Hui-lī-sū-lâng lâi beh lia̍h--lí!” Chham-sun chiū chhoah-tn̄g soh, chhin-chhiūⁿ chhoah-tn̄g hé sio--kè ê môa-si; án-ni, i tōa khùi-la̍t ê pì-bi̍t lâng iû-goân m̄ chai.

10 Tāi-lī-la kā Chham-sun kóng, “Lí kā góa phiàn, kóng pe̍h-chha̍t. Taⁿ lí tio̍h kā góa kóng, án-chóaⁿ chiah ōe-tàng kā lí pa̍k--khí-lâi.”

11 Chham-sun ìn kóng, “Lâng nā ēng m̄-bat ēng--kè ê sin soh-á kā góa pa̍k, góa chiū kap phó͘-thong-lâng siâng-khoán bô khùi-la̍t.”

12 Tāi-lī-la chiū ēng sin ê soh-á kā i pa̍k--khí-lâi, tùi i kóng, “Chham-sun ah, Hui-lī-sū-lâng lâi beh lia̍h--lí!” Hit-sî, bâi-ho̍k ê lâng bih tī lāi-pâng; Chham-sun chiū chhoah-tn̄g pa̍k tī i chhiú-kut ê soh, chhin-chhiūⁿ chhoah-tn̄g chi̍t tiâu sòaⁿ.

13 Tāi-lī-la kā Chham-sun kóng, “Lí kàu taⁿ iáu phiàn góa, kóng pe̍h-chha̍t. Chhiáⁿ lí kā góa kóng, án-chóaⁿ chiah ōe-tàng kā lí pa̍k--khí-lâi?”

Chham-sun ìn kóng, “Lí nā chiong góa chhit kó͘ ê thâu-mn̂g kap chit-pò͘ ê sòaⁿ chit chòe-hé, ēng khi̍t-á tèng--teh, chiū ōe-tàng.”

14 Tāi-lī-la thàn Chham-sun teh khùn ê sî, chiong i ê thâu-mn̂g kap chit-pò͘ ê sòaⁿ chit chòe-hé, ēng khi̍t-á kò͘-tēng, jiân-āu hoah kóng, “Chham-sun ah, Hui-lī-sū-lâng lâi beh lia̍h--lí!” Chham-sun chhíⁿ--khí-lâi, chiong khi̍t-á, chit-pò͘-ki ê so kap sòaⁿ, chòe-chi̍t-ē pu̍ih--chhut-lâi.

15 Tāi-lī-la kā i kóng, “Lí bô chin-chiàⁿ sìn-jīm góa, ná ōe-tàng kóng lí ài góa? Lí í-keng phiàn góa saⁿ piàn, bô kā góa kóng, lí ê khùi-la̍t tùi tó-ūi lâi.”

16Tāi-lī-la ta̍k-ji̍t ēng ōe kā chhui kā pek, hō͘ i ê sim hoân kah beh sí.

17Chham-sun chiū chiong sim-lāi ê pì-bi̍t lóng kā i kóng, “Góa ê thâu-mn̂g lóng m̄-bat ēng thì-thâu-to thì--kè, in-ūi góa tùi chhut-sì chiū hōng-hiàn hō͘ Siōng-tè chòe Ná-sè-ní-lâng. Nā kā góa ê thâu-mn̂g thì--khí-lâi, góa ê khùi-la̍t chiū sit--khì, góa chiū bô la̍t, kap phó͘-thong-lâng siâng-khoán.”

18 Tāi-lī-la chai-iáⁿ Chham-sun chiong sim-lāi ê pì-bi̍t lóng kā i kóng, chiū chhe lâng khì kā Hui-lī-sū-lâng ê siú-léng kóng, “Chhiáⁿ lín koh lâi chi̍t piàn, in-ūi i í-keng chiong sim-lāi ê pì-bi̍t lóng kā góa kóng lah.” Hui-lī-sū-lâng ê siú-léng chiū tòa gûn khì Tāi-lī-la hia.

19Tāi-lī-la hō͘ Chham-sun khùn tī i ê kha-thâu-u, kiò chi̍t ê lâng lâi kā Chham-sun chhit kó͘ ê thâu-mn̂g thì--khí-lâi. Án-ni, Tāi-lī-la hō͘ Chham-sun sit-khì khùi-la̍t.

20Tāi-lī-la hoah kóng, “Chham-sun ah, Hui-lī-sū-lâng lâi beh lia̍h--lí!” Chham-sun chhíⁿ--khí-lâi, siūⁿ-kóng, “Góa beh chhin-chhiūⁿ chêng hit kúi piàn ka-kī keng-khui.” M̄-kú, i m̄ chai Siōng Chú í-keng lī-khui i.

21Hui-lī-sū-lâng kā i lia̍h--khí-lâi, ó͘ i ê ba̍k-chiu, tòa i khì Ka-sat, ēng tâng-liān kā i liān--teh, hō͘ i tī kaⁿ--ni̍h oe-bō.

22Chóng-sī i ê thâu-mn̂g thì--khí-lâi liáu-āu, koh chiām-chiām tn̂g--khí-lâi.

Chham-sun ê Sí

23 Hui-lī-sū-lâng ê siú-léng chū-chi̍p, beh hiàn tōa chè-sū hō͘ in ê sîn-bêng Tāi-kún, hoaⁿ-hí khèng-chiok; in kóng, “Lán ê sîn-bêng í-keng chiong lán ê tùi-te̍k Chham-sun kau tī lán ê chhiú.”

24Jîn-bîn khòaⁿ-tio̍h Chham-sun, chiū o-ló in ê sîn-bêng, kóng, “Lán ê tùi-te̍k húi-hoāi lán ê thó͘-tōe, thâi-sí chiok chōe lán ê lâng, taⁿ lán ê sîn-bêng í-keng chiong i kau tī lán ê chhiú.”

25In hui-siông khoài-lo̍k ê sî, kóng, “Kiò Chham-sun chhut--lâi, hō͘ lán hì-lāng thit-thô.” In chiū kā Chham-sun tùi kaⁿ--ni̍h ah--chhut-lâi; i chiū hō͘ lâng hì-lāng; in hō͘ i khiā tī nn̄g ki thiāu ê tiong-kan.

26Chham-sun kā khan i ê chhiú ê gín-á kóng, “Chhiáⁿ lí hō͘ góa bong-tio̍h thìⁿ biō ê thiāu, hō͘ góa óa--in.”

27Hit-sî biō-lāi lâm-lú khoeh kah móa-móa, Hui-lī-sū-lâng ê siú-léng mā lóng tī hia; tī biō-téng ê pîⁿ-tâi teh khòaⁿ Chham-sun hō͘ lâng hì-lāng ê lâm-lú, tāi-iok ū saⁿ-chheng lâng.

28 Chham-sun tùi Siōng Chú kiû-kiò, kóng, “Chì-koân ê Siōng Chú, kiû lí ōe-kì-tit góa. Siōng-tè ah, chit chi̍t piàn chiū hó, kiû lí sù góa khùi-la̍t, hō͘ góa ūi-tio̍h nn̄g lúi ba̍k-chiu tùi Hui-lī-sū-lâng pò-siû.”

29Chham-sun chiū lám thìⁿ biō ê nn̄g ki tiong-thiāu, chiàⁿ-chhiú lám chi̍t ki, tò-chhiú lám chi̍t ki.

30Chham-sun kóng, “Hō͘ góa kap Hui-lī-sū-lâng chòe-hé sí.” I khut-sin chhut tōa-la̍t, biō chiū tó, teh-sí hiah-ê siú-léng kap lāi-bīn só͘-ū ê lâng. Án-ni, Chham-sun chòe-āu thâi-sí ê lâng, pí oa̍h--teh ê sî thâi--sí-ê koh-khah chōe.

31 Chham-sun ê hiaⁿ-tī kap i lāu-pē ê chhin-cho̍k, lóng lo̍h-lâi siu i ê sin-si, kā i kng chiūⁿ-khì an-chòng tī Só-la kap Í-si̍t-tô ê tiong-kan, in lāu-pē Má-ná-a ê bōng. Chham-sun chòe Í-sek-lia̍t ê sū-su jī-cha̍p nî.

Sū-su-kì 16 - 現代台語譯本羅馬字版(TTVR)-闽南语

Learn More About Us