Si-phian 27 - 現代台語譯本羅馬字版(TTVR)-闽南语

Tāi-pi̍t ê si.Sìn-khò Siōng Chú

1Siōng Chú sī góa ê kng, góa ê chín-kiù,

góa iáu tio̍h kiaⁿ siáⁿ-lâng?

Siōng Chú sī góa sìⁿ-miā ê pó-chiong,

góa iáu tio̍h kiaⁿ siáⁿ-lâng?

2Sui-jiân pháiⁿ-lâng kong-kek góa, tùi-te̍k thun-chia̍h góa,

in lóng ōe poa̍h-tó sit-pāi.

3Sui-jiân tāi-kun chat-iâⁿ pau-ûi,

góa ê sim ia̍h bōe kiaⁿ-hiâⁿ.

Sui-jiân tùi-te̍k hoat-tōng chiàn-cheng,

góa iû-goân an-ún chū-chāi.

4Góa tùi Siōng Chú kiû chi̍t hāng tāi-chì,

chí-ū tùi I kiû chit-hāng:

Hō͘ góa chi̍t-sì-lâng tiàm tī Siōng Chú ê chhù,

tī sèng-tiān gióng-bōng I ê êng-kng, chhē-kiû I ê chí-sī.

5Góa tú-tio̍h hoān-lān ê sî, I ōe kā góa chhàng tī pò͘-pîⁿ lāi;

I ōe pó-hō͘ góa, hō͘ góa bih tī I chhù-lāi.

I ōe kā góa khǹg tī chio̍h-pôaⁿ téng,

6hō͘ góa ê thâu gia̍h-koân, chhiau-kè pau-ûi góa ê tùi-te̍k.

Góa beh tī I ê pò͘-pîⁿ hoan-ho͘ hiàn-chè;

góa beh chhiùⁿ-koa o-ló Siōng Chú.

7Siōng Chú ah, góa kiû-kiò ê siaⁿ kiû lí thiaⁿ,

kiû lí lîn-bín góa, ìn-tap góa!

8Góa ê sim tùi góa kóng,

“Tio̍h lâi tiâu-kìⁿ I.”

Siōng Chú ah, góa lâi tiâu-kìⁿ lí.

9Kiû lí m̄-thang bīn oa̍t-cháu m̄ chhap góa,

m̄-thang siū-khì kóaⁿ lí ê po̍k-jîn.

Lí it-ti̍t sī góa ê pang-chān.

Chín-kiù góa ê Siōng-tè ah,

kiû lí m̄-thang kū-choa̍t góa, pàng-sak góa.

10Siat-sú góa ê pē-bú khì-sak góa,

Siōng Chú mā it-tēng ōe siu-liû góa.

11Siōng Chú ah, kiû lí chí-sī góa eng-kai kiâⁿ ê lō͘,

in-ūi tùi-te̍k teh tng-tán, kiû lí chhōa góa kiâⁿ pîⁿ-tháⁿ ê lō͘.

12M̄-thang chiàu tùi-te̍k ê sim-goān kā góa kau hō͘ in,

in-ūi in ēng gūi-chèng khióng-hat góa.

13Góa chhim-sìn chi̍t hāng sū:

Góa iáu oa̍h--teh ê ji̍t ōe hióng-siū Siōng Chú ê un-hūi.

14Tio̍h sìn-khò Siōng Chú!

Tio̍h ióng-kám chòng-táⁿ!

Tio̍h sìn-khò Siōng Chú!

Learn More About Us