Iok-pek-kì 10

Iok-pek-kì 10 - 現代台語譯本羅馬字版(TTVR)-闽南语

1Góa oa̍h kah chin siān;

góa beh chīn-chêng thò͘-lō͘,

kóng-chhut sim-lāi ê khó͘-thàng.

2Góa beh tùi Siōng-tè kóng:

M̄-thang kā góa tēng-chōe,

tio̍h hō͘ góa chai, lí sī-án-chóaⁿ khòng-kò góa.

3Lí ap-chè, khòaⁿ-khin lí ka-kī ê chhiú só͘ chō--ê,

tian-tò kah-ì pháiⁿ-lâng ê kè-bô͘;

lí án-ni chòe tùi lí ū sím-mi̍h lī-ek?

4Lí ê ba̍k-chiu kiám sī lâng ê ba̍k-chiu?

Lí teh khòaⁿ kiám chhin-chhiūⁿ lâng teh khòaⁿ?

5Lí ê ji̍t-chí kiám chhin-chhiūⁿ lâng ê ji̍t-chí?

Lí ê nî kiám chhin-chhiūⁿ lâng ê nî?

6Lí ná ōe chhin-chhiūⁿ lâng tiâu-cha góa ê kè-sit,

tui-kiù góa ê chōe-kò?

7Lí chai góa bô-chōe,

mā chai bô lâng ōe-tàng kiù góa thoat-lī lí ê chhiú.

8Lí ê chhiú chhòng-chō góa, sok-chō góa,

soah chhin-chhiú beh húi-bia̍t góa.

9Kiû lí kì--tit, lí ū ēng thô͘ chō góa;

lí beh koh hō͘ góa kui tī thô͘-hún sī--bô?

10Lí hō͘ góa ê lāu-pē ū cheng-le̍k siⁿ góa,

hō͘ góa tī lāu-bú ê pak-tó͘ lāi sêng-thai.

11Lí ēng phê kap bah hō͘ góa chhēng,

ēng kut kap kun kā góa liân-chiap.

12Lí sù oa̍h-miā kap chû-ài hō͘ góa;

lí koàn-kò͘ pó-choân góa ê sìⁿ-miā.

13Chiah-ê sū lí lóng chhàng tī sim-lāi,

m̄-kú góa chai che sī lí ê ì-sù:

14Góa nā hoān-chōe, lí ū teh chù-ì,

bōe khòaⁿ góa chòe bô-chōe.

15Góa nā chòe pháiⁿ, chiū ū chai-hō;

góa nā bû-ko͘, mā m̄-káⁿ gia̍h-thâu--khí-lâi;

góa siū-chīn khó͘-lān,

móa-sim kiàn-siàu.

16Góa chi̍t-ē gia̍h-thâu, lí chiū chhin-chhiūⁿ sai tui-sat góa,

koh-chài tùi góa hián-chhut lí khó-phàⁿ ê ui-le̍k.

17Lí koh kiò sin ê chèng-jîn khòng-kò góa,

chhin-chhiūⁿ kun-peng chi̍t-tūi sòa chi̍t-tūi kong-kek góa,

ke-thiⁿ lí tùi góa ê siū-khì.

18Sī-án-chóaⁿ lí hō͘ góa chhut bú-thai?

Góa lêng-khó iáu-bē hō͘ lâng khòaⁿ--tio̍h chiū sí--khì.

19Án-ni góa tùi khí-thâu chiū ná-chhin-chhiūⁿ bô chûn-chāi,

chi̍t-ē chhut bú-thai chiū sàng-ji̍p bōng.

20Góa koh oa̍h mā bô-jōa-kú;

kiû lí mài chhap--góa, hō͘ góa ū chi̍t-si-á an-lêng.

21-22Góa bô kú chiū beh lī-khui,

beh khì sí-ìm ê só͘-chāi,

hia o͘-o͘-àm-àm, hūn-hūn-tūn-tūn,

liân kng to o͘-àm;

góa chi̍t-ē khì chiū bōe koh tńg--lâi.

Iok-pek-kì 10 - 現代台語譯本羅馬字版(TTVR)-闽南语

Learn More About Us