Iok-pek-kì 35 - 現代台語譯本羅馬字版(TTVR)-闽南语

1 Í-lī-hō͘ koh kóng:

2Lí kóng, “Góa tī Siōng-tè ê bīn-chêng sī bû-ko͘.”

Lí án-ni kóng kiám ū tō-lí?

3Lí kóng, “Góa nā bô hoān-chōe, tùi góa ū sím-mi̍h hó-chhù?”

Lí án-ni kóng kiám ū sím-mi̍h lī-ek?

4Góa beh tùi lí kap lí hiah-ê pêng-iú ìn-tap.

5Lí gia̍h-ba̍k khòaⁿ thiⁿ,

khòaⁿ hit-ê pí lí khah-koân ê kiong-chhong.

6Lí nā hoān-chōe, ōe hāi-tio̍h Siōng-tè sím-mi̍h?

Lí ê chōe-kò nā ke-thiⁿ, tùi I ū sím-mi̍h éng-hióng?

7Lí nā chèng-ti̍t, ōe-tàng hō͘ I sím-mi̍h?

Á-sī I ōe tùi lí ê chhiú tit-tio̍h sím-mi̍h?

8Lí ê pháiⁿ hêng-ûi kan-ta ōe hāi-tio̍h chhin-chhiūⁿ lí chit-khoán lâng;

lí ê hó hêng-ûi mā kan-ta ōe lī-ek sè-kan-lâng.

9Lâng siū tōa ap-pek chiū âu-kiò,

siū koân-le̍k-chiá ap-chè chiū hoah-kiù.

10-11M̄-kú bô lâng mn̄g, “Góa ê Chhòng-chō-chú,

hō͘ lâng mî--sî chhiùⁿ-koa,

kà-sī lán ū tì-hūi chhiau-kè tōe-chiūⁿ ê cháu-siù,

hō͘ lán iâⁿ-kè khong-tiong ê pe-chiáu,

hit-ūi Siōng-tè tī tó-ūi?”

12Lâng âu-kiò, Siōng-tè bô kā in ìn-tap,

in-ūi in pháiⁿ koh kiau-ngō͘.

13Lām-sám ê ho͘-kiû, Siōng-tè m̄ thiaⁿ;

Choân-lêng-chiá mā m̄ chhap in.

14Lí kóng, lí khòaⁿ bōe tio̍h Siōng-tè;

tio̍h nāi-sim thèng-hāu, in-ūi lí ê àn-kiāⁿ í-keng tī I bīn-chêng.

15Taⁿ in-ūi I bô hoat siū-khì kā lí hêng-hoa̍t,

mā bô chhap lí ê chōe-kò,

16só͘-í, Iok-pek lí chiah khui-chhùi o͘-pe̍h kóng,

kóng chin chōe bô tì-sek ê ōe.

Learn More About Us