Iâ-lī-bí-su 26

Iâ-lī-bí-su 26 - 現代台語譯本羅馬字版(TTVR)-闽南语

Iâ-lī-bí Siū Sím-mn̄g

1 Iok-se-a ê kiáⁿ Iok-ngá-kèng khai-sí choh Iû-tāi-ông ê sî, Siōng Chú tùi Iâ-lī-bí kóng,

2“Siōng Chú án-ni kóng: Lí tio̍h khì khiā tī Siōng Chú sèng-tiān ê tiâⁿ, chiong góa bēng-lēng lí tio̍h kóng ê ōe kā hiah-ê tùi Iû-tāi ta̍k-ê siâⁿ-tìn lâi kèng-pài Siōng Chú ê lâng kóng; liân chi̍t kù to m̄-thang bô kóng.

3Khó-lêng in ōe thiaⁿ, ta̍k-ê lâng ōe lī-khui in siâ-ok ê tō-lō͘, án-ni góa chiū beh kái-piàn sim-ì, bô beh in-ūi in siâ-ok ê hêng-ûi kàng chai-hō hō͘ in.

4“Lí tio̍h kā in kóng, ‘Siōng Chú án-ni kóng: Lín nā bô beh thiaⁿ-thàn góa ê ōe, bô beh chun-hêng góa pan-pò͘ hō͘ lín ê lu̍t-hoat,

5bô beh thiaⁿ-thàn góa phài góa ê po̍k-jîn chèng sian-ti lâi lín chia só͘ kóng ê ōe, góa chi̍t-piàn koh chi̍t-piàn phài in lâi, lín iû-goân m̄ thiaⁿ,

6só͘-í góa beh hō͘ chit-keng sèng-tiān kap Sī-lô kâng-khoán, hō͘ chit-ê siâⁿ chiâⁿ-chòe tōe-chiūⁿ bān-cho̍k chiù-chó͘ ê tùi-siōng.’”

7 Iâ-lī-bí tī Siōng Chú ê sèng-tiān kóng chiah-ê ōe, chè-si, sian-ti, kap só͘-ū ê jîn-bîn lóng ū thiaⁿ--tio̍h.

8Iâ-lī-bí chiong Siōng Chú bēng-lēng i tio̍h tùi só͘-ū ê jîn-bîn kóng ê ōe kóng soah, chè-si, sian-ti, kap jîn-bîn kā i lia̍h--khí-lâi, kóng, “Lí kai sí!

9Lí sī-án-chóaⁿ lī-iōng Siōng Chú ê miâ kóng ū-giân, kóng chit-keng sèng-tiān ōe chhin-chhiūⁿ Sī-lô, chit-ê siâⁿ it-tēng ōe pha-hng, bô lâng tòa?” Só͘-ū ê jîn-bîn chiū lóng chi̍p óa-lâi Siōng Chú ê sèng-tiān, kā Iâ-lī-bí ûi--teh.

10 Iû-tāi ê koaⁿ-oân thiaⁿ-tio̍h chiah-ê tāi-chì, chiū tùi ông-kiong chiūⁿ-lâi Siōng Chú ê sèng-tiān, chē tiàm Siōng Chú sèng-tiān ê Sin-mn̂g mn̂g-kháu.

11Chè-si, sian-ti tùi koaⁿ-oân kap jîn-bîn kóng, “Chit-ê lâng tio̍h kā chhú sí-hêng. I kóng ū-giân kong-kek chit-ê siâⁿ; lín mā ū thiaⁿ-tio̍h i án-ni kóng.”

12 Iâ-lī-bí chiū tùi hiah-ê koaⁿ-oân kap jîn-bîn kóng, “Siōng Chú phài góa thoân-ta̍t I ê ōe, kong-kek chit-keng sèng-tiān kap chit-chō siâⁿ; chiū-sī thoân-káng lín tú-chiah thiaⁿ--tio̍h hiah-ê ōe.

13Taⁿ lín tio̍h kái-piàn lín ê só͘-kiâⁿ-só͘-chòe, thiaⁿ-thàn Siōng Chú — lín ê Siōng-tè ê ōe, I chiū ōe kái-piàn sim-ì, chiong I só͘ soan-pò͘ beh kàng hō͘ lín ê chai-hō chhú-siau.

14Góa leh, góa í-keng tī lín ê chhiú-thâu, lín khòaⁿ beh án-chóaⁿ kā góa chhú-lí, chiū chiàu lín khòaⁿ-chòe tio̍h--ê, hó--ê kā góa chhú-lí.

15M̄-kú lín tio̍h khak-si̍t chai, lín nā kā góa chhú-sí, lín chit-ê siâⁿ í-ki̍p chiah-ê chū-bîn tio̍h taⁿ hāi-sí bû-ko͘ ê lâng ê sìⁿ-miā ê chek-jīm, in-ūi Siōng Chú chin-chiàⁿ ū phài góa lâi lín chia, chiong chiah-ê ōe lóng kóng hō͘ lín chai.”

16Koaⁿ-oân kap choân-thé bîn-chiòng chiū tùi chè-si kap sian-ti kóng, “Chit-ê lâng bô eng-kai kā i chhú-sí, in-ūi i hōng Siōng Chú — lán ê Siōng-tè ê miâ tùi lán kóng-ōe.”

17Ū chi̍t-kóa kok-lāi ê tiúⁿ-ló khiā--khí-lâi, tùi chū-chi̍p ê bîn-chiòng kóng,

18“Hi-se-ka-ông thóng-tī Iû-tāi ê sî, Mô͘-lī-siat-lâng Bí-ka tùi Iû-tāi jîn-bîn kóng ū-giân, kóng, ‘Siōng Chú — Bān-kun ê Thóng-sòe án-ni kóng:

Sek-an ōe chhin-chhiūⁿ chhân-hn̂g hō͘ lâng lôe,

Iâ-lō͘-sat-léng ōe pìⁿ-chòe thô͘-tui,

chit-ê tiān ê soaⁿ ōe pìⁿ-chòe chhiū-nâ ê soaⁿ-lûn-á.’

19 Iû-tāi-ông Hi-se-ka kap Iû-tāi jîn-bîn kiám ū kā Bí-ka chhú-sí? Hi-se-ka kiám m̄-sī kèng-ùi Siōng Chú, ū kiû Siōng Chú lîn-bín, Siōng Chú chiū kái-piàn sim-ì, bô chiong I goân-lâi só͘ kóng ê chai-hō kàng-lo̍h? Lán hiān-chāi soah beh ka-kī jiá chai-hō.”

20Lēng-gōa ū chi̍t ê Ki-lia̍t Iâ-lîm-lâng, kiò-chòe O͘-lī-a, sī Sī-má-ngá ê kiáⁿ; i hōng Siōng Chú ê miâ kóng ū-giân, kap Iâ-lī-bí kâng-khoán kóng ū-giân kong-kek chit-chō siâⁿ kap chit-ê kok-ka.

21Iok-ngá-kèng-ông kap i ê kun-koaⁿ, koaⁿ-oân thiaⁿ-tio̍h O͘-lī-a ê ōe liáu-āu, ông siūⁿ-beh kā i chhú-sí. O͘-lī-a chi̍t-ē thiaⁿ-kìⁿ chit-ê siau-sit chiū kiaⁿ, tô-cháu khì Ai-ki̍p.

22Iok-ngá-kèng-ông phài A-kek-pho ê kiáⁿ Í-lī-ná-tan chhōa kúi-nā ê lâng khì Ai-ki̍p,

23kā O͘-lī-a tùi Ai-ki̍p lia̍h tńg-lâi kau hō͘ Iok-ngá-kèng-ông; ông chiū kā i chhú-sí, chiong i ê sin-si hiat tī pêng-bîn ê bōng-tōe.

24M̄-kú, Sa-hoan ê kiáⁿ A-hi-kam pó-hō͘ Iâ-lī-bí, bô chiong Iâ-lī-bí kau hō͘ jîn-bîn chhú-sí.

Iâ-lī-bí-su 26 - 現代台語譯本羅馬字版(TTVR)-闽南语

Learn More About Us