Si-phian 118

Si-phian 118 - 現代台語譯本羅馬字版(TTVR)-闽南语

Ūi Sèng-lī Kám-siā Siōng Chú

1Tio̍h kám-siā Siōng Chú, in-ūi I chì-siān;

I ê chû-ài sòa kàu éng-oán!

2Goān Í-sek-lia̍t kóng,

“I ê chû-ài sòa kàu éng-oán!”

3Goān A-lûn chè-si ê ke kóng,

“I ê chû-ài sòa kàu éng-oán!”

4Goān só͘-ū kèng-ùi Siōng Chú ê lâng kóng,

“I ê chû-ài sòa kàu éng-oán!”

5Tī gûi-kip ê sî, góa kiû-kiò Siōng Chú,

Siōng Chú chiū ìn-tap góa, kái-kiù góa.

6Siōng Chú kap góa tông-chāi, góa bōe kiaⁿ-hiâⁿ;

lâng ōe-tàng kā góa án-chóaⁿ?

7Siōng Chú ūi góa, chòe góa ê pang-chān;

góa ōe khòaⁿ-tio̍h góa ê tùi-te̍k siū pò-èng.

8Chhē Siōng Chú chòe pī-lān-só͘

pí óa-khò lâng khah hó!

9Chhē Siōng Chú chòe pī-lān-só͘

pí óa-khò thóng-tī-chiá khah hó!

10Lia̍t-kok kā góa pau-ûi,

góa hōng Siōng Chú ê miâ kā in châu-bia̍t!

11In pau-ûi góa, tùi sì-bīn ûi-khùn góa;

góa hōng Siōng Chú ê miâ kā in châu-bia̍t!

12In chhin-chhiūⁿ phang kā góa pau-ûi,

chhin-chhiūⁿ hé sio chhì-phè án-ni sio góa;

góa hōng Siōng Chú ê miâ kā in châu-bia̍t!

13In chhut-la̍t chhia góa, hō͘ góa hiám poa̍h-tó,

m̄-kú Siōng Chú pang-chān góa.

14Siōng Chú sī góa ê khùi-la̍t, góa beh chhiùⁿ-koa chheng-chàn;

I kā góa kái-kiù.

15Tī Siōng Chú chú-bîn ê pò͘-pîⁿ lāi ū khái-soân ê hoan-ho͘,

“Siōng Chú ê chiàⁿ-chhiú hián-chhut tōa koân-lêng!

16Siōng Chú ê chiàⁿ-chhiú gia̍h-koân-koân;

Siōng Chú ê chiàⁿ-chhiú hián-chhut tōa koân-lêng!”

17Góa bōe tì-kàu sí, ōe oa̍h--lo̍h-khì,

thang kóng-khí Siōng Chú ê chok-ûi.

18Siōng Chú giâm-giâm koán-kàu góa,

chóng-sī bô hō͘ góa tì-kàu sí.

19Kā góa khui kong-gī ê mn̂g,

hō͘ góa thang ji̍p-khì kám-siā Siōng Chú.

20Chit-ê mn̂g sī Siōng Chú ê mn̂g,

chí-ū chèng-ti̍t ê lâng ōe-tàng ji̍p--khì.

21Siōng-tè ah, lí ū ìn-tap góa, góa beh kám-siā lí,

in-ūi lí hō͘ góa tit-tio̍h kái-kiù.

22Khí-chhù sai-hū khì-sak ê chio̍h,

í-keng chiâⁿ-chòe siōng tiōng-iàu ê ki-chio̍h.

23Che sī Siōng Chú ê chok-ûi;

lán khòaⁿ--khí-lâi kám-kak chin kî-biāu.

24Che sī Siōng Chú só͘ tēng ê ji̍t-chí;

lán tio̍h hoaⁿ-hí, tio̍h khèng-chiok!

25Siōng Chú ah, goán kiû lí, kiû lí kái-kiù goán!

Siōng Chú ah, goán kiû lí, kiû lí hō͘ goán heng-ōng!

26Hōng Siōng Chú ê miâ lâi Hit-ūi eng-kai siū chheng-chàn!

Goán tùi Siōng Chú ê tiān chiok-hok lí.

27Siōng Chú sī Siōng-tè,

I hō͘ lán kng-bêng.

Tio̍h gia̍h chhiū-ki chham-ka khèng-tián,

iû-hêng lâi kàu chè-tôaⁿ ê sì-kak-thâu hia.

28Lí sī góa ê Siōng-tè, góa beh kám-siā lí;

lí sī góa ê Siōng-tè, góa beh soan-iông lí ê úi-tāi.

29Tio̍h kám-siā Siōng Chú, in-ūi I chì-siān;

I ê chû-ài sòa kàu éng-oán.

Si-phian 118 - 現代台語譯本羅馬字版(TTVR)-闽南语

Learn More About Us