Bîn-sò͘-kì 17

Bîn-sò͘-kì 17 - 現代台語譯本羅馬字版(TTVR)-闽南语

A-lûn ê Koáiⁿ

1Siōng Chú tùi Mô͘-se kóng,

2“Lí tio̍h hoan-hù Í-sek-lia̍t-lâng, ta̍k chi-cho̍k ê siú-léng lóng tio̍h gia̍h in ê koáiⁿ-á lâi, lóng-chóng cha̍p-jī ki. Lí tio̍h tī in ê koáiⁿ-á siá in ê miâ.

3Lī-bī chi-cho̍k hit-ki koáiⁿ-á tio̍h siá A-lûn ê miâ; in-ūi ta̍k chi-cho̍k ê cho̍k-tiúⁿ lóng ū chi̍t ki koáiⁿ-á.

4Lí tio̍h chiong hiah-ê koáiⁿ-á the̍h-lâi hōe-bō͘, hē tī iok-kūi ê thâu-chêng, chiū-sī góa kap lín siong-hōe ê só͘-chāi.

5Góa só͘ kéng hit-ê lâng, i ê koáiⁿ-á ōe puh-gê; án-ni góa beh hō͘ Í-sek-lia̍t-lâng bōe koh bâi-oàn lín.”

6 Mô͘-se chiong chiah-ê ōe kā Í-sek-lia̍t-lâng kóng, ta̍k-ê chi-cho̍k ê siú-léng chiū chiong in ê koáiⁿ-á kau hō͘ Mô͘-se; chi̍t ê chi-cho̍k chi̍t ki, kiōng cha̍p-jī ki; A-lûn ê koáiⁿ-á mā tī hit tiong-kan.

7Mô͘-se chiū chiong hiah-ê koáiⁿ-á the̍h ji̍p-khì khǹg iok-kūi ê tiùⁿ-bō͘ lāi-bīn, hē tī Siōng Chú ê bīn-chêng.

8Keh-ji̍t, Mô͘-se ji̍p-khì khǹg iok-kūi ê tiùⁿ-bō͘, khòaⁿ-tio̍h Lī-bī chi-cho̍k A-lûn ê koáiⁿ-á í-keng puh-gê, siⁿ hoe-m̂, khui-hoe, kiat hēng-jîn.

9Mô͘-se tùi Siōng Chú ê bīn-chêng gia̍h hiah-ê koáiⁿ-á chhut--lâi, khì Í-sek-lia̍t ê chèng-lâng hia, hō͘ in khòaⁿ; ta̍k-ê cho̍k-tiúⁿ chiū khì gia̍h ka-kī ê koáiⁿ-á.

10Siōng Chú tùi Mô͘-se kóng, “Chiong A-lûn ê koáiⁿ-á khǹg tò-khì iok-kūi bīn-chêng, chòe chiah-ê pōe-ge̍k ê lâng ê kàm-kài. Án-ni in chiū bōe koh tùi góa hoat oàn-giân, mā bōe in-ūi án-ni lâi sí.”

11Mô͘-se chiū chiàu Siōng Chú ê bēng-lēng chòe.

12 Í-sek-lia̍t-lâng tùi Mô͘-se kóng, “Chhám ah! Goán ōe sí, ōe bia̍t-bông, goán ōe sí-liáu-liáu.

13Só͘-ū óa-kūn Siōng Chú ê hōe-bō͘--ê lóng ōe sí. Án-ni, goán ún sí--ê!”

Bîn-sò͘-kì 17 - 現代台語譯本羅馬字版(TTVR)-闽南语

Learn More About Us