Lō͘-ka Hok-im 23

Lō͘-ka Hok-im 23 - 現代台語譯本羅馬字版(TTVR)-闽南语

Iâ-so͘ tī Pí-lia̍p-to Bīn-chêng Siū Sím(Thài 27.1-2, 11-14; Khó 15.1-5; Iok 18.28-38)

1Choân-thé gī-oân lóng khiā--khí-lâi, kā Iâ-so͘ ah-khì Pí-lia̍p-to bīn-chêng.

2In chiū khòng-kò kóng, “Goán ū khòaⁿ-tio̍h chit-ê lâng teh bê-he̍k goán ê bîn-cho̍k, kìm-chí lâng la̍p-sè hō͘ Khái-sat, koh chū-chheng sī Ki-tok, sī Ông.”

3 Pí-lia̍p-to mn̄g Iâ-so͘ kóng, “Lí sī ‘Iû-thài-lâng ê Ông’ sī--bô?”

Iâ-so͘ ìn kóng, “Che sī lí kóng--ê.”

4 Pí-lia̍p-to chiū tùi hiah-ê chè-si-tiúⁿ kap kûn-chiòng kóng, “Góa chhâ bōe chhut chit-ê lâng ū sím-mi̍h chōe.”

5M̄-kú in kian-chhî kóng, “I tùi Ka-lī-lī kàu chia, tī Iû-thài choân-tōe kà-sī lâng, siàn-tōng bîn-chiòng.”

Iâ-so͘ tī Hi-lu̍t ê Bīn-chêng

6 Pí-lia̍p-to chi̍t-ē thiaⁿ--tio̍h, chiū mn̄g-khòaⁿ chit-ê lâng sī Ka-lī-lī-lâng á m̄-sī.

7I chi̍t-ē chai Iâ-so͘ sio̍k Hi-lu̍t-ông ê koán-hat, chiū kā I sàng-khì Hi-lu̍t hia; hit-sî Hi-lu̍t pún-lâng mā tī Iâ-lō͘-sat-léng.

8Hi-lu̍t khòaⁿ-tio̍h Iâ-so͘, hui-siông hoaⁿ-hí, in-ūi i bat thiaⁿ-tio̍h Iâ-so͘ ê tāi-chì, it-ti̍t ài-beh kìⁿ I, koh ǹg-bāng ōe-tàng khòaⁿ-tio̍h I kiâⁿ sîn-jiah.

9I mn̄g Iâ-so͘ chin chōe tāi-chì, Iâ-so͘ lóng bô ìn i.

10Chè-si-tiúⁿ kap keng-ha̍k-kàu-su khiā--khí-lâi, ke̍k-le̍k kā I khòng-kò.

11Hi-lu̍t kap i ê peng mā kā I bú-jio̍k, hì-lāng, jiân-āu koh kā I chhēng chi̍t niá chin súi ê tn̂g-phàu, chiah kā I sàng tńg-khì hō͘ Pí-lia̍p-to.

12Hi-lu̍t kap Pí-lia̍p-to pún-lâi ū oan-siû, tī hit chi̍t ji̍t soah pìⁿ-chòe pêng-iú.

Iâ-so͘ Siū Phòaⁿ Sí-hêng(Thài 27.15-26; Khó 15.6-15; Iok 18.39-19.16)

13 Pí-lia̍p-to tiàu-chi̍p chè-si-tiúⁿ, koaⁿ-oân, kap bîn-chiòng lâi,

14kā in kóng, “Lín ah chit-ê lâng lâi góa chia, khòng-kò I siàn-tōng bîn-chiòng. Taⁿ góa tī lín ê bīn-chêng ū kā I sím-mn̄g, chhâ lóng bô lín só͘ khòng-kò ê chōe.

15Hi-lu̍t mā jīn-tēng I bô chōe, chiah chiong I sàng tò-lâi lán chia. Khó-kiàn I bô chòe sím-mi̍h kai-sí ê tāi-chì.

16Só͘-í, góa beh ēng piⁿ kā I kà-sī chi̍t-ē, chiah pàng I khì.”

17Ta̍k-nî ê Pôaⁿ-kè-choeh, chóng-tok tio̍h chiàu kûn-chiòng ê iau-kiû pàng chi̍t ê hoān-lâng hō͘ in.

18Kûn-chiòng lóng hoah, “Chit-ê lâng tio̍h hō͘ I sí! Pàng Pa-lia̍p-pa hō͘ goán.”

19Chit-ê Pa-lia̍p-pa in-ūi tī siâⁿ-lāi chok-loān koh thâi-lâng chiah siū koaiⁿ-kaⁿ.

20 Pí-lia̍p-to siūⁿ-beh pàng Iâ-so͘, chiū koh sòe-ho̍k chèng-lâng.

21M̄-kú in tōa-siaⁿ hoah, “Kā tèng si̍p-jī-kè! Kā tèng si̍p-jī-kè!”

22 Pí-lia̍p-to tē-saⁿ piàn tùi in kóng, “Sī-án-chóaⁿ? I ū chòe sím-mi̍h pháiⁿ tāi-chì? Góa chhâ bōe chhut I ū kai-sí ê chōe. Só͘-í, góa beh ēng piⁿ kā I kà-sī chi̍t-ē, chiah pàng I khì.”

23Put-kò kûn-chiòng kian-chhî, tōa-siaⁿ iau-kiû kā Iâ-so͘ tèng si̍p-jī-kè, chòe-āu in ê siaⁿ soah khah iâⁿ.

24Pí-lia̍p-to chiū soan-phòaⁿ, chiàu in ê iau-kiû khì chip-hêng,

25pàng in só͘ iau-kiû hit-ê in-ūi chok-loān, thâi-lâng, hō͘ lâng koaiⁿ-kaⁿ ê Pa-lia̍p-pa, kā Iâ-so͘ kau hō͘ in, chiàu in ê ì-sù khì chhú-lí.

Iâ-so͘ Siū Tèng Si̍p-jī-kè(Thài 27.32-44; Khó 15.21-32; Iok 19.17-27)

26Hiah-ê peng-sū ah Iâ-so͘ chhut--khì ê sî, tú-hó ū chi̍t ê Kó͘-lī-nāi-lâng miâ kiò-chòe Se-bûn tùi chng-kha lâi. In kā i lia̍h--lâi, chiong si̍p-jī-kè khǹg tī i ê keng-thâu hō͘ i giâ, tè Iâ-so͘ ê āu-bīn kiâⁿ.

27Ū chi̍t tōa-tīn bîn-chiòng tè Iâ-so͘, kî-tiong ū chi̍t-kóa hū-jîn-lâng ūi-tio̍h I tûi-heng pi-siong thî-khàu.

28Iâ-so͘ oa̍t-thâu tùi in kóng, “Iâ-lō͘-sat-léng ê hū-jîn-lâng ah, m̄-bián ūi-tio̍h góa thî-khàu; tio̍h ūi lín ka-kī kap lín ê kiáⁿ-jî thî-khàu!

29In-ūi ji̍t-chí teh-beh kàu, lâng ōe kóng, ‘Bōe hoâi-īn, m̄-bat siⁿ-kiáⁿ, m̄-bat hō͘ gín-á chia̍h-lin ê hū-jîn-lâng chin ū hok-khì!’

30Hit-sî, lâng ōe tùi tōa-soaⁿ kóng:

Kā goán teh--lo̍h-lâi!

Tùi sió-soaⁿ kóng:

Kā goán khàm--lo̍h-lâi!

31In-ūi in tùi oa̍h--teh ê chhiū-ba̍k to ōe án-ni chòe, tùi ta--khì ê chhiū-ba̍k kiám bōe koh-khah lī-hāi?”

32Lēng-gōa nn̄g ê hoān-lâng mā hō͘ lâng ah-khì kap Iâ-so͘ chòe-hé chhú sí-hêng.

33In kàu chi̍t ê só͘-chāi kiò-chòe “Thâu-khak-óaⁿ”, chiū tī hia kā Iâ-so͘ tèng si̍p-jī-kè, mā tèng hit nn̄g ê hoān-lâng, chi̍t ê tī chiàⁿ-pêng, chi̍t ê tī tò-pêng.

34Iâ-so͘ kóng, “Pē ah, sià-bián in, in-ūi in m̄ chai in teh chòe sím-mi̍h.”

Āu-lâi in thiu-chhiam pun Iâ-so͘ ê saⁿ.

35Bîn-chiòng khiā tī hia teh khòaⁿ. Hiah-ê Iû-thài-lâng ê léng-siù kā I thí-chhiò, kóng, “I kiù pa̍t-lâng; I nā-sī Siōng-tè só͘ kéng-soán ê Ki-tok, tio̍h kiù ka-kī!”

36Hiah-ê peng-sū mā kā I hì-lāng, kiâⁿ óa--khì, the̍h chhò͘ hō͘ I,

37kóng, “Lí nā-sī ‘Iû-thài-lâng ê Ông’, tio̍h kiù lí ka-kī!”

38Tī I ê thâu-khak téng ū chōe-chn̄g ê pâi-á siá “Chit-ê sī Iû-thài-lâng ê Ông”.

39Chòe-hé tèng ê hoān-lâng, ū chi̍t ê it-ti̍t kā Iâ-so͘ bú-jio̍k kóng, “Lí kiám m̄-sī Ki-tok? Kiù lí ka-kī mā kiù goán.”

40Lēng-gōa chi̍t ê kā i chek-pī kóng, “Lí kap I siâng-khoán siū-hêng, lí kiám m̄ kiaⁿ Siōng-tè?

41Lán siū-hêng sī kong-tō, in-ūi lán só͘ siū--ê sī chōe-kai-èng-tit, m̄-kú chit-ê lâng lóng m̄-bat chòe sím-mi̍h m̄-tio̍h.”

42I chiū tùi Iâ-so͘ kóng, “Iâ-so͘ ah, lí choh-ông lâi-lîm ê sî, chhiáⁿ ōe-kì-tit góa!”

43Iâ-so͘ kā i kóng, “Góa si̍t-chāi kā lí kóng, kin-á-ji̍t lí ōe kap góa chòe-hé tī Lo̍k-hn̂g.”

Iâ-so͘ ê Sí(Thài 27.45-56; Khó 15.33-41; Iok 19.28-30)

44Chha-put-to tiong-tàu ê sî, o͘-àm jia-khàm choân-tōe kàu ē-po͘ saⁿ tiám, ji̍t-thâu sit kng,

45Sèng-tiān lāi ê tiùⁿ-lî li̍h-chòe nn̄g pêng.

46Iâ-so͘ tōa-siaⁿ hoah, “Pē ah, góa chiong góa ê lêng-hûn kau-tài lí.” Kóng soah, chiū tn̄g-khùi.

47Chi̍t ê kun-koaⁿ khòaⁿ-tio̍h só͘ hoat-seng ê tāi-chì, kui êng-kng hō͘ Siōng-tè kóng, “Chit-ê lâng chin-chiàⁿ sī gī-lâng!”

48Chū-chi̍p tī hia teh khòaⁿ chit-ê tāi-chì ê chèng-lâng, khòaⁿ-tio̍h só͘ hoat-seng ê tāi-chì, lóng ná kiâⁿ ná tûi-heng pi-siong tńg--khì.

49Hiah-ê bat Iâ-so͘ ê lâng, í-ki̍p tùi Ka-lī-lī tè--lâi ê hū-jîn-lâng, lóng khiā tī hn̄g-hn̄g ê só͘-chāi khòaⁿ chiah-ê tāi-chì.

Iâ-so͘ ê An-chòng(Thài 27.57-61; Khó 15.42-47; Iok 19.38-42)

50Ū chi̍t ê lâng kiò-chòe Iok-sek; i sī gī-oân, sī chi̍t ê siān-liông chèng-gī ê lâng.

51I bô chàn-sêng kî-tha gī-oân ê kè-bô͘ kap hêng-tōng. I sī Iû-thài-lâng ê siâⁿ A-lī-má-thài ê lâng, it-ti̍t teh kî-thāi Siōng-tè-kok ê lâi-lîm.

52Chit-ê lâng khì kìⁿ Pí-lia̍p-to, chhéng-kiû chiong Iâ-so͘ ê ûi-thé hō͘ i.

53I chiong ûi-thé siu--lo̍h-lâi, ēng iù-môa-pò͘ pau, jiân-āu kā I an-chòng tī phah hó tī chio̍h-piah ê bōng lāi-bīn; chit-ê bōng lóng iáu m̄-bat ū lâng ēng.

54Hit-ji̍t sī Pī-pān-ji̍t, An-hioh-ji̍t tú-beh khai-sí.

55Tùi Ka-lī-lī kap Iâ-so͘ chòe-hé lâi hiah-ê hū-jîn-lâng tè Iok-sek khì. In chim-chiok khòaⁿ hit-ê bōng, khòaⁿ Iâ-so͘ ê ûi-thé án-chóaⁿ hē,

56chiū tńg-khì chún-pī phang-liāu kap phang-iû.

An-hioh-ji̍t, hiah-ê hū-jîn-lâng chiàu Lu̍t-hoat ê kui-tēng hioh-khùn.

Lō͘-ka Hok-im 23 - 現代台語譯本羅馬字版(TTVR)-闽南语

Learn More About Us