Si-phian 51 - 現代台語譯本羅馬字版(TTVR)-闽南语

Tāi-pi̍t kap Poa̍t-sī-pa tâng-pâng í-āu, sian-ti Ná-tan lâi kìⁿ i, i chòe chit-siú si, kau hō͘ sèng-ga̍k-tiúⁿ.Kî-kiû Sià-bián

1Siōng-tè ah, lí ê thiàⁿ bōe kái-piàn, kiû lí lîn-bín góa!

Lí ū hong-hù ê chû-ài, kiû lí chhat-siau góa ê chōe-kò!

2Kiû lí sóe-tû góa it-chhè ê chōe,

sóe-chheng góa ê chōe-ok.

3Góa chai ka-kī ê kè-sit;

góa ê chōe-ok put-sî tī góa ê ba̍k-chiu chêng.

4Góa ū tek-chōe lí, góa tek-chōe--ê sī lí;

góa ū chòe lí khòaⁿ-chòe siâ-ok ê tāi-chì.

Só͘-í, góa siū lí sím-phòaⁿ sī tong-jiân,

siū lí chek-hoa̍t sī eng-kai.

5Góa tī bú-thai chiū ū chōe,

chhut-sì hit-ji̍t chiū-sī chōe-jîn.

6Lí ì-ài--ê sī lāi-sim sêng-si̍t;

kiû lí kà-sī góa, hō͘ góa sim-lāi ū chin-chiàⁿ ê tì-hūi.

7Kiû lí sóe-tû góa ê chōe, hō͘ góa chheng-khì;

kiû lí kā góa sóe chheng-khì, hō͘ góa pí seh khah pe̍h.

8Kiû lí hō͘ góa thiaⁿ-kìⁿ hoaⁿ-hí khoài-lo̍k ê siaⁿ,

hō͘ lí phah-chhùi ê kut-thâu koh-chài hoaⁿ-hí khoài-lo̍k.

9Kiû lí bīn oa̍t-cháu bô khòaⁿ góa ê chōe;

kiû lí chhat-siau góa it-chhè ê chōe-ok.

10Siōng-tè ah, kiû lí ūi góa chhòng-chō sûn-kiat ê sim;

kiû lí sù góa sin koh tiong-sêng ê sim-lêng.

11M̄-thang kóaⁿ góa lī-khui lí ê bīn-chêng;

m̄-thang tùi góa siu-hôe lí sèng ê sîn.

12Kiû lí hō͘ góa têng-sin hióng-siū lí kiù-un ê hoaⁿ-hí,

hō͘ góa ê sim-lêng goān-ì sūn-ho̍k lí.

13Góa beh chiong lí ê tō-lō͘ chí-sī hoān kè-sit ê lâng,

hō͘ chōe-jîn thang kui-ǹg lí.

14Chín-kiù góa ê Siōng-tè ah, kiû lí bián-tû góa ê sí-chōe,

hō͘ góa thang tōa-siaⁿ chheng-chàn lí ê chín-kiù.

15Chú ah, kiû lí khui góa ê chhùi;

góa beh chheng-chàn lí.

16Lí bô ài seng-lé, nā ài, góa hoaⁿ-hí hiàn;

góa nā hiàn sio-hòa-chè, lí mā bô hoaⁿ-hí.

17Siōng-tè ah, lí só͘ ài ê chè sī thòng-hóe ê sim-lêng;

iu-siong thòng-hóe ê sim, lí hoaⁿ-hí chiap-la̍p.

18Siōng-tè ah, kiû lí ēng chû-ài hó khoán-thāi Sek-an,

tiông-kiàn Iâ-lō͘-sat-léng ê siâⁿ-chhiûⁿ.

19Hit-sî, lí beh chiap-la̍p ha̍p-gî ê seng-lé, choân hù ê sio-hòa-chè;

lâng beh chiong gû-káng hiàn tī lí ê chè-tôaⁿ.

Learn More About Us