Í-sài-a-su 16

Í-sài-a-su 16 - 現代台語譯本羅馬字版(TTVR)-闽南语

Mô͘-ap ê Choa̍t-bāng

1Lín Mô͘-ap ê lān-bîn tio̍h tùi khòng-iá ê Se-la,

sàng iûⁿ-á chòe lé-mi̍h hō͘ Iâ-lō͘-sat-léng ê léng-siù.

2 Mô͘-ap ê jîn-bîn ōe tī A-lūn-hô bô bo̍k-te̍k lōa-lōa-sô,

chhin-chhiūⁿ chiáu-á hō͘ lâng tùi chiáu-á-siū kóaⁿ--chhut-khì,

ta̍k só͘-chāi liû-lōng, pe-lâi-pe-khì.

3In ōe tùi Iû-tāi-lâng kóng:

Lín tio̍h kā goán chí-kàu, kà goán tio̍h án-chóaⁿ chòe.

Kiû lín hō͘ lín ê ìm-ńg tī ji̍t--sî chhin-chhiūⁿ àm-mî,

kā goán chiah-ê tô-miā--ê khàm--khí-lâi,

hō͘ lān-bîn ê hêng-chong bô lâng chai.

4Kiû lín iông-ún siū kóaⁿ-tio̍k ê Mô͘-ap-lâng kap lín tòa,

thang chòe in ê pī-lān-só͘, hō͘ in bián siū húi-bia̍t.

Tng ap-pek thêng-chí,

phò-hoāi soah,

kiông-pō tùi kok-lāi siau-sit ê sî,

5 Tāi-pi̍t-ke ū chi̍t ūi ông ōe ēng sìn-si̍t thóng-tī,

i ê ông-ūi ōe ēng jîn-ài kian-li̍p;

i sī chhē-kiû kong-pêng,

si̍t-chián kong-gī ê sím-phòaⁿ-chiá.

6 Iû-tāi ê jîn-bîn kóng:

Thiaⁿ-kóng Mô͘-ap-lâng hui-siông kiau-ngō͘,

chū-ko chū-tāi, kiau-ngō͘ kàu-ke̍k;

in ê khoa-kháu lóng sī khang-khang.

7Só͘-í, Mô͘-ap tio̍h thî-khàu,

múi chi̍t ê Mô͘-ap-lâng tio̍h ūi Mô͘-ap thî-khàu.

Lín ōe in-ūi chia̍h bōe tio̍h Kiat-ní Hap-lia̍t-siat ê phû-tô-koaⁿ-oân ai-siong.

8 Hi-si̍t-pún ê chhân-hn̂g hong-hòe,

Se-pí-má ê phû-tô-chhiū ta--khì.

Lia̍t-kok ê kun-ông at-chi̍h phû-tô-chhiū siōng-hó ê ki;

hiah-ê ki bat chhun kàu Ngá-siā, soan-khì khòng-iá,

sīm-chì pôaⁿ-kè hái, khì kàu gōa-kok.

9Só͘-í, góa beh kap Ngá-siā chòe-hé ūi-tio̍h Se-pí-má ê phû-tô-chhiū thî-khàu.

Hi-si̍t-pún kap Í-lī-a-lī ah,

góa beh ēng ba̍k-sái kā lín koàn-ak,

in-ūi lín siu-sêng sêng-se̍k ê ké-chí

kap ngó͘-kok hoan-ho͘ ê siaⁿ í-keng soah.

10Hoaⁿ-hí khoài-lo̍k

í-keng tùi ké-chí-hn̂g siau-sit lah.

Tī phû-tô-hn̂g bô koh thiaⁿ-tio̍h koa-siaⁿ,

mā bô koh ū hoan-ho͘.

Bô koh ū lâng tī chiú-khut ta̍h chiú;

góa hō͘ hoan-ho͘ ê siaⁿ thêng-chí.

11Só͘-í, góa ê sim ūi-tio̍h Mô͘-ap pi-siong,

góa ê sim-tn̂g ūi-tio̍h Kiat-ní Hap-lia̍t-siat ai-siong,

chhin-chhiūⁿ khîm hoat-chhut ai-oàn ê siaⁿ.

12 Mô͘-ap-lâng sui-jiân piàⁿ-miā khì soaⁿ-thâu-tôaⁿ, koh khì in ê sèng-só͘ kî-tó, chóng-sī lóng bô-chhái-kang.

13Í-siōng sī í-chêng Siōng Chú só͘ kóng iú-koan Mô͘-ap ê ōe.

14Hiān-chāi Siōng Chú kóng, “Tī saⁿ nî lāi, chiàu chhiàⁿ-kang ê nî-hān, Mô͘-ap ê êng-hôa it-tēng ōe siau-sit, sui-jiân jîn-kháu hiah-ni̍h chōe, m̄-kú chhun--lo̍h-lâi ê lâng ōe chin chió, koh soe-jio̍k.”

Í-sài-a-su 16 - 現代台語譯本羅馬字版(TTVR)-闽南语

Learn More About Us