Si-phian 37

Si-phian 37 - 現代台語譯本羅馬字版(TTVR)-闽南语

Tāi-pi̍t ê si.Gī-lâng kap Chōe-jîn ê Kiat-kio̍k

1M̄-thang in-ūi chòe pháiⁿ ê lâng sim-lāi put-pêng;

m̄-thang oàn-tò͘ hêng-ûi put-gī ê lâng;

2in-ūi in chhin-chhiūⁿ chháu chin kín chiū ta--khì,

chhin-chhiūⁿ chhiⁿ-chhùi ê hoe-chháu lian--khì.

3Tio̍h óa-khò Siōng Chú lâi chòe hó,

tiàm tī chit-ê thó͘-tōe an-ku-lo̍k-gia̍p.

4Tio̍h in-ūi Siōng Chú lâi hoaⁿ-hí;

I ōe boán-chiok lí ê sim-goān.

5Tio̍h chiong lí ê lō͘-tô͘ kau-thok Siōng Chú,

óa-khò I, I ōe kā lí sêng-choân.

6I ōe hō͘ lí ê gī chhin-chhiūⁿ kng hoat-chhut;

lí ê chèng-ti̍t chhin-chhiūⁿ tiong-tàu ê ji̍t-thâu.

7Tio̍h chēng-chēng tī Siōng Chú bīn-chêng thun-lún thèng-hāu;

m̄-thang in-ūi pháiⁿ-lâng ê kè-bô͘ sêng-kong lâi put-pêng.

8M̄-thang siū-khì, tio̍h khì-sak tōa siū-khì;

m̄-thang put-pêng, chiah bián tì-kàu chòe pháiⁿ.

9In-ūi chòe pháiⁿ ê lâng ōe siū châu-bia̍t;

thèng-hāu Siōng Chú ê lâng ōe sêng-siū só͘ èng-ún ê thó͘-tōe.

10Pháiⁿ-lâng chin kín chiū ōe bô--khì;

lí siông-sè chhâ i ê só͘-chāi, mā chhē bōe tio̍h.

11M̄-kú khiam-pi ê lâng ōe sêng-siū só͘ èng-ún ê thó͘-tōe,

hióng-siū hoân-êng hô-pêng.

12Pháiⁿ-lâng siat-kè beh hāi gī-lâng,

thòng-hūn i, tùi i kā-gê-chhiat-chhí.

13Chú ōe kā i thí-chhiò,

in-ūi chai i siū pò-èng ê ji̍t-chí teh-beh kàu.

14Pháiⁿ-lâng pu̍ih to khui keng,

beh táⁿ-tó khùn-khó͘ sàn-chhiah ê lâng,

thâi-sí hêng-ûi chèng-ti̍t ê lâng.

15In ê to ōe chha̍k ji̍p-khì ka-kī ê sim;

in ê keng ōe siū at-tn̄g.

16Gī-lâng só͘-ū--ê sui-jiân chin chió,

mā pí pháiⁿ-lâng ū chin chōe châi-hù khah hó.

17Pháiⁿ-lâng ê chhiú-kut ōe siū at-tn̄g,

m̄-kú Siōng Chú hû-chhî gī-lâng.

18Siōng Chú koàn-kò͘ oân-choân ê lâng ê nî-ji̍t;

in ê sán-gia̍p ōe-tàng éng-oán pó-chûn.

19In tī hoān-lān ê sî bōe tì-kàu kiàn-siàu,

tī ki-hng ê ji̍t ōe tit-tio̍h pá-chiok.

20Chóng-sī pháiⁿ-lâng ōe bia̍t-bông.

Siōng Chú ê tùi-te̍k ōe ká-ná iá-hoe siā--khì,

chhin-chhiūⁿ hé-hun siau-sòaⁿ.

21Pháiⁿ-lâng kā lâng chioh, m̄ hêng;

gī-lâng khóng-khài si-sià.

22Siōng Chú sù-hok ê lâng ōe sêng-siū só͘ èng-ún ê thó͘-tōe;

siū I chiù-chó͘ ê lâng ōe bia̍t-bông.

23Siōng Chú hō͘ gī-lâng ê kha-pō͘ ún-kò͘;

I hoaⁿ-hí in ê só͘-kiâⁿ-só͘-chòe.

24In tio̍h-tak mā bōe poa̍h-tó,

in-ūi Siōng Chú ēng chhiú hû in.

25Góa chêng siàu-liân taⁿ nî-lāu,

m̄-bat khòaⁿ-tio̍h gī-lâng siū pàng-sak,

i ê hō͘-tāi chòe khit-chia̍h.

26I put-sî khóng-khài si-sià, hoaⁿ-hí chioh--lâng;

i ê kiáⁿ-sun tit-tio̍h chiok-hok.

27Tio̍h kū-choa̍t pháiⁿ, chòe hó-sū,

chiū ōe éng-oán an-jiân khiā-khí.

28Siōng Chú ì-ài kong-pêng,

bōe pàng-sak I sèng ê chú-bîn.

In éng-oán siū pó-hō͘;

m̄-kú pháiⁿ-lâng ê kiáⁿ-sun ōe siū châu-bia̍t.

29Gī-lâng ōe sêng-siū só͘ èng-ún ê thó͘-tōe,

éng-oán tiàm tī hia.

30Gī-lâng ê chhùi kóng tì-hūi;

i ê chi̍h tâm-lūn kong-pêng.

31Siōng-tè ê lu̍t-hoat tī i sim-lāi;

i ê kha lóng bōe ta̍h-thu̍t.

32Pháiⁿ-lâng kim-kim teh siòng gī-lâng,

siàu-siūⁿ beh thâi i.

33Siōng Chú bōe pàng i lo̍h tī pháiⁿ-lâng ê chhiú,

sím-phòaⁿ ê sî i bōe siū tēng-chōe.

34Tio̍h thèng-hāu Siōng Chú, chun-siú I ê tō-lō͘,

I chiū ko-seng lí, hō͘ lí sêng-siū só͘ èng-ún ê thó͘-tōe;

lí ōe khòaⁿ-tio̍h pháiⁿ-lâng siau-bia̍t.

35Góa khòaⁿ-kìⁿ kiông-pō ê pháiⁿ-lâng heng-ōng,

chhin-chhiūⁿ chhiū tī ka-kī ê thó͘-tōe bō͘-sēng.

36Ū lâng tùi hia keng-kè, khòaⁿ leh, i bô--khì lah;

góa chhē mā chhē lóng bô.

37Siông-sè khòaⁿ oân-choân chèng-ti̍t ê lâng,

in-ūi ài hô-pêng ê lâng ū hó ê chiong-lâi.

38M̄-kú hoān-hoat ê lâng ōe chòe-chi̍t-ē bia̍t-bông;

pháiⁿ-lâng chòe-āu ōe siū châu-bia̍t.

39Chóng-sī gī-lâng tùi Siōng Chú tit-tio̍h chín-kiù;

hoān-lān ê sî, I chòe in ê pī-lān-só͘.

40Siōng Chú pang-chān in, chín-kiù in;

I kiù in, tháu-pàng in thoat-lī pháiⁿ-lâng,

in-ūi in óa-khò I tit-tio̍h pó-hō͘.

Si-phian 37 - 現代台語譯本羅馬字版(TTVR)-闽南语

Learn More About Us