Má-khó Hok-im 13

Má-khó Hok-im 13 - 現代台語譯本羅馬字版(TTVR)-闽南语

Iâ-so͘ Ū-giân Sèng-tiān Siū Húi-hoāi(Thài 24.1-2; Lō͘ 21.5-6)

1Iâ-so͘ tùi Sèng-tiān chhut--lâi ê sî, ū chi̍t ê bûn-tô͘ tùi I kóng, “Lāu-su, lí khòaⁿ, chio̍h chiah-ni̍h tōa tè! Kiàn-tio̍k-bu̍t chiah-ni̍h tông-hông!”

2Iâ-so͘ kā in kóng, “Lín teh khòaⁿ chiah-ê tōa ê kiàn-tio̍k-bu̍t o͘h. Tī chia, chiah-ê lóng ōe siū thiah-húi, thiah kah bô chi̍t tè chio̍h ōe tha̍h tī pa̍t-tè téng-bīn.”

Chai-lān kap Pek-hāi(Thài 10.17-22; 24.3-14; Lō͘ 21.7-19)

3Iâ-so͘ tī Kaⁿ-ná-soaⁿ-téng, bīn ǹg Sèng-tiān teh chē ê sî, Pí-tek, Ngá-kok, Iok-hān, kap An-tek-lia̍t su-hā kā I mn̄g,

4“Chhiáⁿ kā goán kóng, chit-ê tāi-chì sím-mi̍h sî ōe hoat-seng? Chiah-ê it-chhè ê tāi-chì teh-beh oân-sêng ê sî ū sím-mi̍h tiāu-thâu?”

5Iâ-so͘ chiū kā in kóng, “Tio̍h kín-sīn, chiah bián siū bê-he̍k.

6Ū chin chōe lâng ōe lī-iōng góa ê miâ lâi, kóng ‘Góa chiū-sī Ki-tok’ lâi bê-he̍k chin chōe lâng.

7Lín thiaⁿ-tio̍h chiàn-cheng í-ki̍p chiàn-cheng ê hong-siaⁿ ê sî, m̄-bián kiaⁿ. Chiah-ê tāi-chì it-tēng ōe hoat-seng, m̄-kú chiong-kio̍k iáu-bē kàu.

8In-ūi bîn-cho̍k ōe khí-lâi kong-kek bîn-cho̍k, kok-ka kong-kek kok-ka. Chin chōe só͘-chāi ū tōe-tāng, ū ki-hng. Chiah-ê tāi-chì put-kò sī chhui-chūn thàng-thiàⁿ ê khai-sí.

9“Lín ka-kī tio̍h kín-sīn, lín ōe hō͘ lâng kau hō͘ gī-hōe, tī hōe-tn̂g siū piⁿ-phah. Lín ōe ūi-tio̍h góa ê iân-kò͘ khiā tī chóng-tok kap kun-ông ê bīn-chêng, tùi in chòe kiàn-chèng.

10M̄-kú hok-im it-tēng tio̍h tāi-seng thoân hō͘ bān-bîn.

11In kā lín lia̍h-khì kau hō͘ hoat-têng ê sî, m̄-bián seng hoân-ló beh kóng sím-mi̍h, hit-sî lín tit-tio̍h sím-mi̍h chí-sī chiū chiàu án-ni kóng, in-ūi teh kóng--ê m̄-sī lín ka-kī, sī Sèng Sîn.

12Hiaⁿ-tī ōe chhut-bōe hiaⁿ-tī, hō͘ i sí; lāu-pē mā ōe án-ni tùi-thāi kiáⁿ-jî. Kiáⁿ-jî ōe khí-lâi kong-kek pē-bú, kā in hāi-sí.

13Lín ōe in-ūi góa ê miâ hō͘ chèng-lâng oàn-hūn, m̄-kú jím-nāi kàu chòe-āu ê lâng ōe tit-tio̍h kiù.”

Tōa Chai-lān(Thài 24.15-28; Lō͘ 21.20-24)

14“Tng lín khòaⁿ-tio̍h hit-ê ‘Khó-ò͘ⁿ ê Húi-bia̍t-chiá’ khiā tī m̄ eng-kai khiā ê só͘-chāi — tha̍k ê lâng tio̍h bêng-pe̍k chit-kù ōe ê ì-sù — hit-sî tī Iû-thài ê lâng tio̍h tô-cháu khì soaⁿ-lāi;

15tī chhù-téng--ê, m̄-thang lo̍h--lâi, mā m̄-thang ji̍p-khì chhù-lāi the̍h mi̍h-kiāⁿ;

16tī hn̂g--ni̍h-ê, m̄-thang tńg-khì hiahⁿ gōa-saⁿ.

17Tī hiah-ê ji̍t-chí, ū sin-īn--ê kap hō͘ eⁿ-á chia̍h-lin ê hū-jîn-lâng hui-siông put-hēng!

18Tio̍h kî-tó, chiah-ê tāi-chì chiah bián tī tang-thiⁿ hoat-seng.

19In-ūi tī hiah-ê ji̍t-chí teh-beh ū chai-lān, sī tùi Siōng-tè chhòng-chō bān-mi̍h í-lâi m̄-bat ū--ê, chiong-lâi mā bōe koh ū.

20Chú nā bô kiám-chió hiah-ê ji̍t-chí, bô lâng ōe tit-tio̍h kiù; m̄-kú ūi-tio̍h I só͘ kéng ê soán-bîn, I í-keng ū kiám-chió hiah-ê ji̍t-chí.

21“Hit-sî, nā ū lâng kā lín kóng ‘Lín khòaⁿ, Ki-tok tī chia’, á-sī kóng ‘Lín khòaⁿ, I tī hia’, m̄-thang siong-sìn.

22In-ūi ū chi̍t-kóa ké Ki-tok kap ké sian-ti ōe chhut-hiān, kiâⁿ sîn-jiah kî-sū, nā ōe-tàng, liân soán-bîn to beh kā in bê-he̍k.

23Tio̍h kín-sīn; góa í-keng chiong it-chhè lóng seng kā lín kóng lah.”

Jîn-chú ê Lâi-lîm(Thài 24.29-31; Lō͘ 21.25-28)

24“Tī hit-ê chai-lān kè-liáu hiah-ê ji̍t-chí,

ji̍t ōe pìⁿ o͘-àm,

ge̍h bōe hoat-kng,

25chhiⁿ ōe tùi thiⁿ-téng lak--lo̍h-lâi,

thiⁿ-téng ê kng-thé lóng ōe iô-choah.

26Hit-sî, lâng ōe khòaⁿ-kìⁿ Jîn-chú chhiong-móa tōa koân-lêng kap êng-kng chē-hûn lâi-lîm.

27I ōe chhe-khián thiⁿ-sài tùi sì-hng, tùi tōe ê chit-pêng kàu thiⁿ ê hit-pêng chū-chi̍p I ê soán-bîn.”

Tùi Bû-hoa-kó-chhiū Ha̍k-si̍p(Thài 24.32-35; Lō͘ 21.29-33)

28“Tio̍h tùi bû-hoa-kó-chhiū ha̍k-si̍p: Ki puh-íⁿ hoat-hio̍h ê sî, lín chiū chai joa̍h-thiⁿ teh-beh kàu.

29Chhin-chhiūⁿ án-ni, lín khòaⁿ-tio̍h chiah-ê tāi-chì hoat-seng ê sî chiū chai Jîn-chú í-keng chiap-kūn, kàu mn̂g-kháu lah.

30Góa si̍t-chāi kā lín kóng, chit sè-tāi iáu-bē kè--khì, che it-chhè lóng ōe hoat-seng.

31Thiⁿ kap tōe ōe siau-sit, m̄-kú góa ê ōe choa̍t-tùi bōe siau-sit.”

Hit-ê Ji̍t, Hit-ê Sî, Bô lâng Chai(Thài 24.36-44)

32“Koan-hē hit-ê ji̍t, hit-ê sî, bô lâng chai; thiⁿ-téng ê thiⁿ-sài m̄ chai, Kiáⁿ mā m̄ chai, chí-ū Pē chai.

33Tio̍h kín-sīn, tio̍h kéng-séng, in-ūi lín m̄ chai hit-ê sî-khek sím-mi̍h sî ōe kàu.

34Chhin-chhiūⁿ ū chi̍t ê lâng beh chhut-gōa, chiong koân kau hō͘ po̍k-jîn, hun-phòe kang-chok hō͘ ta̍k-ê lâng, koh hoan-hù siú-ōe sió-sim kò͘-siú.

35-36Só͘-í, tio̍h kéng-séng, chiah bián chit-ke ê chú-lâng hut-jiân tńg--lâi, khòaⁿ-tio̍h lín teh khùn, in-ūi lín m̄ chai i sím-mi̍h sî ōe tńg--lâi, sī hông-hun á-sī pòaⁿ-mî, sī thiⁿ beh kng á-sī ji̍t chhut ê sî.

37Góa kā lín kóng ê ōe mā beh tùi chèng-lâng kóng: Tio̍h kéng-séng!”

Má-khó Hok-im 13 - 現代台語譯本羅馬字版(TTVR)-闽南语

Learn More About Us