Lī-bī-kì 19

Lī-bī-kì 19 - 現代台語譯本羅馬字版(TTVR)-闽南语

Iú-koan Sèng-kiat kap Chèng-gī ê Tiâu-lē

1Siōng Chú koh bēng-lēng Mô͘-se

2tio̍h tùi Í-sek-lia̍t choân-thé hōe-chiòng soan-pò͘:

Lín tio̍h hun-pia̍t-choh-sèng, in-ūi góa Siōng Chú — lín ê Siōng-tè sī sèng.

3Lín ta̍k-ê lâng lóng tio̍h kèng-tiōng lín ê lāu-bú lín ê lāu-pē. Lín tio̍h siú góa ê An-hioh-ji̍t. Góa sī Siōng Chú — lín ê Siōng-tè.

4Lín m̄-thang khì-sak góa khì pài ngó͘-siōng, mā m̄-thang ūi-tio̍h ka-kī chù-chō sîn-siōng. Góa sī Siōng Chú — lín ê Siōng-tè.

5Lín thâi cheng-siⁿ hiàn chòe pêng-an-chè hō͘ Siōng Chú ê sî, tio̍h chiàu kui-lē hiàn chè-mi̍h thang hō͘ Siōng Chú chiap-la̍p.

6Chè-mi̍h tio̍h tī hōng-hiàn hit-ji̍t á-sī keh-ji̍t chia̍h; kàu tē-saⁿ ji̍t nā iáu ū chhun, tio̍h ēng hé sio-tiāu.

7Lâu kàu tē-saⁿ ji̍t ê chè-mi̍h sī bô chheng-khì; nā ū lâng chia̍h, i ê hōng-hiàn chiū bōe tit-tio̍h chiap-la̍p.

8Chia̍h ê lâng, lóng tio̍h tùi ka-kī ê chōe hū chek-jīm; in-ūi i siat-to̍k hiàn hō͘ Siōng Chú hun-pia̍t-choh-sèng ê mi̍h; hit-ê lâng tio̍h tùi jîn-bîn ê tiong-kan kek-chhut.

9Lín siu-sêng ngó͘-kok, hn̂g-piⁿ--ê m̄-thang koah-liáu-liáu, lak--lo̍h-lâi--ê mā m̄-thang khioh.

10Siu-sêng phû-tô, m̄-thang bán-liáu-liáu, lak--lo̍h-lâi--ê mā m̄-thang khioh; tio̍h lâu hō͘ sàn-chhiah-lâng kap chhut-gōa-lâng. Góa sī Siōng Chú — lín ê Siōng-tè.

11M̄-thang thau-the̍h; m̄-thang chà-khi; m̄-thang kóng pe̍h-chha̍t.

12M̄-thang hōng góa ê miâ chiù ké-chōa lâi siat-to̍k lí ê Siōng-tè ê miâ. Góa sī Siōng Chú.

13M̄-thang khi-ap lí ê tông-pau; m̄-thang chhiúⁿ-toa̍t in ê mi̍h; m̄-thang kā kang-lâng ê kang-chîⁿ lâu keh-mî.

14M̄-thang chiù-mē hī-khang bô thiaⁿ--kìⁿ ê lâng. M̄-thang hē mi̍h-kiāⁿ tī sit-bêng ê lâng ê thâu-chêng hāi i poa̍h-tó. Tio̍h kèng-ùi lí ê Siōng-tè. Góa sī Siōng Chú.

15Lín sím-phòaⁿ m̄-thang bô kong-tō; m̄-thang phian-thán sàn-chhiah-lâng, mā m̄-thang khòaⁿ ū koân-sè ê lâng ê bīn-sek; tio̍h chiàu kong-tō sím-phòaⁿ lí ê tông-pau.

16M̄-thang sì-kòe chō-iâu tiòng-siong lâng; m̄-thang chòe gūi-chèng hāi-sí lâng. Góa sī Siōng Chú.

17M̄-thang sim-lāi oàn-hūn chhù-piⁿ; tio̍h sêng-khún chí-chek i ê chhò-gō͘, chiah bián tio̍h ūi i ê chōe hū chek-jīm.

18M̄-thang kā lí ê tông-pau pò-ho̍k, mā m̄-thang khioh-hūn; tio̍h thiàⁿ chhù-piⁿ chhin-chhiūⁿ thiàⁿ ka-kī. Góa sī Siōng Chú.

19Tio̍h chun-siú góa ê kui-lē. M̄-thang hō͘ bô kâng-lūi ê cheng-siⁿ kau-phòe; m̄-thang chiong nn̄g khoán chéng-chí iā tī kâng chi̍t khu hn̂g; m̄-thang chhēng nn̄g khoán pò͘-liāu chit ê saⁿ.

20Lú-pī iáu-bē siū-sio̍k tit-tio̍h chū-iû, m̄-kú í-keng tēng-hun, nā ū lâng kap i su-thong, nn̄g ê lâng tio̍h siū hêng-hoa̍t; m̄-kú m̄-thang kā in chhú-sí, in-ūi hit-ê lú-pī iáu-bē tit-tio̍h chū-iû.

21Hit-ê ta-po͘-lâng tio̍h hiàn pê-chōe-chè, khan chi̍t chiah mî-iûⁿ-káng lâi hōe-bō͘ mn̂g-kháu, chòe pê-chōe-chè hiàn hō͘ Siōng Chú.

22Chè-si tio̍h ēng pê-chōe-chè ê iûⁿ-káng, tī Siōng Chú bīn-chêng kā i sio̍k-chōe; hit-ê lâng hoān ê chōe chiū tit-tio̍h sià-bián.

23Lín chìn-ji̍p Ka-lâm-tōe liáu-āu, chai-chèng ta̍k-chióng ké-chí-chhiū, saⁿ nî lāi, tio̍h khòaⁿ hiah-ê ké-chí chòe bô chheng-khì, bōe-ēng-tit chia̍h.

24Tē-sì nî só͘ kiat ê ké-chí lóng tio̍h hun-pia̍t-choh-sèng, piáu-sī tùi Siōng Chú ê kám-siā.

25Kàu tē-gō͘ nî, lín thang chia̍h hiah-ê ké-chí, hō͘ chhiū thang kiat khah chōe ké-chí. Góa sī Siōng Chú — lín ê Siōng-tè.

26M̄-thang chia̍h kâⁿ-huih ê mi̍h. M̄-thang kiâⁿ hoat-su̍t, mā m̄-thang pok-kòa.

27Pìn-piⁿ ê mn̂g m̄-thang thì, chhùi-chhiu mā m̄-thang siu.

28M̄-thang ūi sí-lâng koah-siong ka-kī ê seng-khu; seng-khu mā m̄-thang chhiah-jī. Góa sī Siōng Chú.

29M̄-thang bú-jio̍k lí ê cha-bó͘-kiáⁿ, hō͘ i chòe sī-biō ê chhiong-ki, chiah bián lín khì pài pa̍t-ê sîn-bêng, hō͘ chit-ê tōe chhiong-móa îm-loān.

30Lín tio̍h siú góa ê An-hioh-ji̍t, kèng-tiōng góa ê sèng-só͘. Góa sī Siōng Chú.

31M̄-thang khì chhē khan-bông--ê, mā m̄-thang khì mn̄g tâng-ki, toh-thâu, lâi phah lâ-sâm ka-kī. Góa sī Siōng Chú — lín ê Siōng-tè.

32Tī lāu-tōa-lâng ê bīn-chêng, tio̍h khiā--khí-lâi, mā tio̍h chun-kèng in; koh tio̍h kèng-ùi lí ê Siōng-tè. Góa sī Siōng Chú.

33M̄-thang khi-hū kià-ku tī lín ê tōe ê gōa-cho̍k-lâng;

34tio̍h tùi-thāi in chhin-chhiūⁿ tùi-thāi lín Í-sek-lia̍t tông-pau, thiàⁿ in chhin-chhiūⁿ thiàⁿ ka-kī; in-ūi lín mā bat chòe gōa-cho̍k-lâng kià-ku tī Ai-ki̍p-tōe. Góa sī Siōng Chú — lín ê Siōng-tè.

35M̄-thang ēng bô kong-tō ê chhioh, táu, chhìn-á phiⁿ--lâng.

36Tio̍h ēng kong-tō ê chhìn-á, pōng-chí, kap táu. Góa sī chhōa lín chhut Ai-ki̍p ê Siōng Chú — lín ê Siōng-tè.

37Lín tio̍h chhiat-si̍t chun-hêng góa ê kui-lē kap bēng-lēng. Góa sī Siōng Chú.

Lī-bī-kì 19 - 現代台語譯本羅馬字版(TTVR)-闽南语

Learn More About Us