Si-phian 7 - 現代台語譯本羅馬字版(TTVR)-闽南语

Iú-koan Piān-ngá-bín-lâng Kó͘-si̍t ê tāi-chì, Tāi-pi̍t tùi Siōng Chú chhiùⁿ ê koa.Kî-kiû Kong-gī ê Sím-phòaⁿ

1Siōng Chú — góa ê Siōng-tè ah, kiû lí chòe góa ê pī-lān-só͘ pó-hō͘ góa;

kiû lí kái-kiù góa thoat-lī it-chhè tui-kóaⁿ góa ê lâng!

2Nā bô, in ōe chhin-chhiūⁿ sai thiah-li̍h góa,

thiah kah chhùi-kô͘-kô͘ mā bô lâng thang kiù góa.

3-4Siōng Chú — góa ê Siōng-tè ah, góa ê chhiú nā ū chòe m̄-tio̍h,

ū tùi pêng-iú ēng pháiⁿ pò hó,

á-sī bô-iân-bô-kò͘ chhiúⁿ-toa̍t te̍k-tùi góa ê lâng;

góa nā ū chòe chiah-ê tāi-chì,

5chiū chhut-chāi tùi-te̍k jip góa, kàu lia̍h-tio̍h góa,

chiong góa ê sìⁿ-miā ta̍h tī thô͘-kha,

chiong góa ê chun-giâm pìⁿ-chòe thô͘-hún.

6Siōng Chú ah, kiû lí khí--lâi, hoat-chhut siū-khì,

khiā khí-lâi tùi-hù góa tùi-te̍k ê tōa siū-khì;

kiû lí ūi-tio̍h góa chhíⁿ--khí-lâi, chiàu lí ê chí-ì sím-phòaⁿ.

7Goān bān-bîn lóng chū-chi̍p tī lí chiu-ûi;

goān lí chē tī pó-chō tī-lí in.

8Siōng Chú sím-phòaⁿ bān-bîn.

Siōng Chú ah, kiû lí chhâi-phòaⁿ,

phòaⁿ góa chòe gī, tēng góa bô chōe.

9Kiû lí hō͘ pháiⁿ-lâng bōe koh chòe pháiⁿ, hō͘ gī-lâng khiā-chāi;

in-ūi kong-gī ê Siōng-tè kàm-chhat lâng ê sim-tn̂g.

10Siōng-tè sī góa ê tún-pâi;

I chín-kiù sim chèng-ti̍t ê lâng.

11Siōng-tè sī kong-gī ê sím-phòaⁿ-koaⁿ;

I ta̍k-ji̍t tùi put-gī ê lâng hoat siū-khì.

12Lâng nā m̄ hoán-hóe, I ōe bôa I ê to,

giú-khui I ê keng chún-pī hó-sè.

13I chún-pī tì-miā ê bú-khì;

I siā--ê sī hé ê chìⁿ.

14Lí khòaⁿ, pháiⁿ-lâng tô͘-bô͘ siâ-ok,

hoâi-īn to̍k-hāi, siⁿ-chhut kan-chà.

15I ó͘ khut, ku̍t hō͘ i chhim,

kèng-jiân poa̍h-lo̍h ka-kī siat ê hām-chíⁿ.

16I ê to̍k-hāi ōe tò-tńg kàu ka-kī ê thâu-khak;

i ê kiông-pō ōe lak tī ka-kī ê thâu-khak téng.

17Góa beh in-ūi Siōng Chú ê kong-gī kám-siā I;

góa beh chheng-chàn Siōng Chú — Chì-koân Siōng-tè ê miâ.

Learn More About Us