Í-se-kiat-su 44

Í-se-kiat-su 44 - 現代台語譯本羅馬字版(TTVR)-闽南语

Tang-mn̂g Tio̍h Koaiⁿ--teh

1Hit-ê lâng chhōa góa tńg-lâi sèng-tiān gōa-tiâⁿ ê tang-mn̂g. Hit-ê mn̂g koaiⁿ--teh.

2Siōng Chú kā góa kóng, “Chit-ê mn̂g it-tēng tio̍h koaiⁿ--teh, bōe-ēng-tit phah-khui, put-chún jīm-hô-lâng tùi chia chhut-ji̍p, in-ūi góa Siōng Chú — Í-sek-lia̍t ê Siōng-tè í-keng tùi chit-ê mn̂g ji̍p--lâi. Chit-ê mn̂g tio̍h koaiⁿ--teh.

3Nā-sī ông, i thang lâi chē tī lāi-bīn, tī Siōng Chú bīn-chêng chia̍h hiàn--kè ê piáⁿ. M̄-kú, i tio̍h tùi gōa-tiâⁿ ê cháu-lông chhut-ji̍p.”

Chìn-ji̍p Sèng-tiān ê Kui-chek

4Jiân-āu, hit-ê lâng chhōa góa tùi pak-mn̂g lâi kàu sèng-tiān thâu-chêng. Tī hia, góa khòaⁿ-kìⁿ Siōng Chú ê êng-kng chhiong-móa I ê sèng-tiān; góa chiū phak lo̍h-khì thô͘-kha.

5Siōng Chú tùi góa kóng, “Jîn-chú ah, góa só͘ beh hoan-hù lí iú-koan Siōng Chú sèng-tiān ê kui-chek kap tiâu-lē, lí tio̍h siông-sè khòaⁿ, chù-ì thiaⁿ, koh kì tī sim-lāi; lí tio̍h chù-ì sím-mi̍h khoán lâng chiah ōe-ēng-tit tī sèng-tiān kap sèng-só͘ chhut-ji̍p.

6“Lí tio̍h kā hiah-ê pōe-ge̍k ê Í-sek-lia̍t-lâng kóng, ‘Chì-koân ê Siōng Chú án-ni kóng: Í-sek-lia̍t-lâng ah, góa bô beh koh jím-siū lín só͘ chòe it-chhè thang iàm-ò͘ⁿ ê sū.

7Lín teh hiàn cheng-siⁿ ê huih kap iû chòe góa chia̍h-mi̍h ê sî, kèng-jiân hō͘ hiah-ê seng-khu kap sim-lêng bô siū kat-lé ê gōa-cho̍k-lâng ji̍p-khì sèng-só͘, phah lâ-sâm góa ê sèng-tiān. Lín chòe chiah-ê thang iàm-ò͘ⁿ ê sū, ûi-pōe góa ê iok.

8Lín ka-kī bô tī góa ê sèng-só͘ chīn lín ê chit-chek, tian-tò kiò gōa-cho̍k-lâng tī sèng-só͘ thòe lín chip-hêng.

9“‘Góa — Chì-koân ê Siōng Chú án-ni soan-pò͘: Tòa tī Í-sek-lia̍t-lâng tiong-kan só͘-ū seng-khu kap sim-lêng bô siū kat-lé ê gōa-cho̍k-lâng, lóng put-chún chìn-ji̍p góa ê sèng-só͘.’”

Put-chún Chòe Chè-si ê Lī-bī-lâng

10Siōng Chú kóng, “Í-sek-lia̍t-lâng kiâⁿ bê-lō͘, khì pài in ê ngó͘-siōng ê sî, Lī-bī-lâng mā khì-sak góa; góa beh chiàu in ê chōe hêng-hoa̍t in.

11M̄-kú, góa beh hō͘ in tī góa ê sèng-só͘ sū-hōng, kò͘-siú sèng-tiān ê mn̂g, tī sèng-tiān chip-hêng chit-bū. In thang thòe jîn-bîn thâi sio-hòa-chè kap kî-tha chè-sū ê cheng-siⁿ, lûn-pan ūi jîn-bîn ho̍k-bū.

12M̄-kú, in-ūi chiah-ê Lī-bī-lâng bat ūi Í-sek-lia̍t-lâng chú-chhî pài ngó͘-siōng ê sū, hō͘ jîn-bîn poa̍h-tó hoān-chōe, só͘-í, góa tùi in li̍p-sè, in it-tēng tio̍h siū hêng-hoa̍t. Góa — Chì-koân ê Siōng Chú án-ni soan-kò.

13In bōe-tàng chhin-kūn góa, bōe-tàng chòe chè-si sū-hōng góa, bōe-tàng óa-kūn góa it-chhè ê sèng-mi̍h, á-sī chì-sèng ê mi̍h. Che chiū-sī in chòe thang iàm-ò͘ⁿ ê sū eng-kai sêng-siū ê kiàn-siàu.

14Góa beh chí-phài in kò͘-siú sèng-tiān, chòe sèng-tiān lāi-bīn eng-kai chòe ê sū-bū.”

Chè-si

15“Í-sek-lia̍t-lâng kiâⁿ bê-lō͘ lī-khui góa hn̄g-hn̄g ê sî, Lī-bī chi-cho̍k Sat-tok hō͘-tāi ê chè-si iû-goân chīn in tī góa sèng-só͘ ê chit-chek. Só͘-í, chí-ū in thang chhin-kūn góa, sū-hōng góa; in beh tī góa ê bīn-chêng, hiàn cheng-siⁿ ê iû kap huih hō͘ góa. Góa — Chì-koân ê Siōng Chú án-ni soan-pò͘.

16Chí-ū in thang chìn-ji̍p góa ê sèng-só͘, tī góa ê chè-tôaⁿ sū-hōng, chòe góa kau-tài ê chit-bū.

17In tùi mn̂g ji̍p-khì lāi-tiâⁿ ê sî, tio̍h chhēng iù-môa-pò͘ ê saⁿ; in tī lāi-tiâⁿ kap sèng-tiān sū-hōng ê sî, m̄-thang chhēng iûⁿ-mn̂g chòe ê i-ho̍k.

18In tio̍h tì iù-môa-pò͘ ê thâu-kun, chhēng iù-môa-pò͘ chòe ê lé-khò͘; io m̄-thang hâ tòa, chiah bián lâu-kōaⁿ.

19In chhut-lâi gōa-tiâⁿ hōe-chiòng hia í-chêng, tio̍h seng chiong tī sèng-tiān sū-hōng chhēng ê lé-ho̍k thǹg--khí-lâi, khǹg tī sèng ê pâng-keng, jiân-āu chhēng pa̍t-chióng saⁿ, chiah bián in ê saⁿ hō͘ hōe-chiòng chiâⁿ-chòe sèng.

20“Chè-si m̄-thang thì kng-thâu, mā m̄-thang lâu tn̂g thâu-mn̂g; thâu-mn̂g tio̍h siu-chián.

21Chè-si beh ji̍p-khì lāi-tiâⁿ ê sî, bōe-ēng-tit lim-chiú.

22Chè-si bōe-ēng-tit kap it-poaⁿ ê kóaⁿ-hū á-sī lî-hun ê hū-jîn-lâng kiat-hun, kan-ta thang kap Í-sek-lia̍t-lâng ê chāi-sek-lú á-sī chè-si ê kóaⁿ-hū kiat-hun.

23“Chè-si tio̍h kàu-tō góa ê chú-bîn sím-mi̍h sī sèng, sím-mi̍h sī sio̍k; hō͘ in chai sím-mi̍h sī chheng-khì--ê á-sī bô chheng-khì--ê.

24Nā ū sò͘-siōng su-iàu chè-si chhâi-koat, chè-si tio̍h chun-chiàu góa ê bēng-lēng sím-phòaⁿ. Chè-si tio̍h tī góa só͘-ū ê choeh-kî chun-siú góa ê tiâu-lē kap kui-chek, koh siú góa ê An-hioh-ji̍t chòe sèng-ji̍t.

25“Tû-liáu kè-sin ê lâng sī ka-kī ê pē-bú, kiáⁿ-jî, hiaⁿ-tī, á-sī bē chhut-kè ê chí-bē, chè-si m̄-thang óa-kūn si-thé, hō͘ ka-kī bô chheng-khì.

26I kiat-chēng liáu-āu, tio̍h koh tán chhit ji̍t,

27chiah thang chìn-ji̍p sèng-só͘ ê lāi-tiâⁿ; i tī sèng-só͘ sū-hōng góa í-chêng, tio̍h ūi ka-kī hiàn sio̍k-chōe-chè. Góa — Chì-koân ê Siōng Chú án-ni soan-pò͘.

28“Chè-si ū sán-gia̍p; góa chiū-sī in ê sán-gia̍p. Tī Í-sek-lia̍t, m̄-bián hō͘ in sím-mi̍h sán-gia̍p; góa chiū-sī in ê sán-gia̍p.

29Sò͘-chè, sio̍k-chōe-chè, pê-chōe-chè ê chè-mi̍h beh chòe chè-si ê chia̍h-mi̍h; Í-sek-lia̍t-lâng hiàn hō͘ góa--ê, lóng beh kui-sio̍k in.

30Thâu-chúi ê lông-chok-bu̍t kap hiàn hō͘ góa ê chè-mi̍h, lóng kui hō͘ chè-si. Lín tio̍h ēng thâu-chúi ê be̍h-á chòe ê thâu chi̍t tè bô chham kàⁿ ê mī-oân hō͘ chè-si; án-ni góa chiū beh sù hok-khì hō͘ lín.

31Pe-chiáu á-sī cháu-siù, bô-lūn sī chū-jiân sí--ê, á-sī hō͘ iá-siù thiah-li̍h--ê, chè-si lóng m̄-thang chia̍h.”

Í-se-kiat-su 44 - 現代台語譯本羅馬字版(TTVR)-闽南语

Learn More About Us