Si-phian 113 - 現代台語譯本羅馬字版(TTVR)-闽南语

Kì-liām Chhut Ai-ki̍p

1Ha-lé-lú-iah, chheng-chàn Siōng Chú!

Siōng Chú ê po̍k-jîn ah, lín tio̍h chheng-chàn,

chheng-chàn Siōng Chú ê miâ.

2Goān Siōng Chú ê miâ siū chheng-chàn,

tùi hiān-chāi kàu éng-oán.

3Tùi ji̍t chhut kàu ji̍t lo̍h ê só͘-chāi,

Siōng Chú ê miâ eng-kai siū chheng-chàn.

4Siōng Chú thóng-hat bān-kok;

I ê êng-kng pí thiⁿ khah koân.

5Siáⁿ-lâng ōe-tàng kap Siōng Chú — lán ê Siōng-tè pí?

I chē tī chì-koân ê só͘-chāi,

6àⁿ lo̍h-lâi khòaⁿ thiⁿ kap tōe.

7I tùi tîn-ai ko-seng sàn-chhiah-lâng,

tùi pùn-sò-tui thê-poa̍t khiàm-kheh ê lâng;

8I hō͘ in pôe-phōaⁿ kùi-cho̍k,

kap pún-kok ê kùi-cho̍k chòe-hé chē.

9I hō͘ bōe seng-io̍k ê hū-jîn-lâng ū ka-têng,

chòe chin chōe jî-lú ê lāu-bú lâi hoaⁿ-hí.

Ha-lé-lú-iah, chheng-chàn Siōng Chú!

Learn More About Us