Si-phian 35

Si-phian 35 - 現代台語譯本羅馬字版(TTVR)-闽南语

Tāi-pi̍t ê si.Kiû Pang-chān ê Kî-tó

1Siōng Chú ah, kap góa cheng-lūn ê lâng, kiû lí kap in cheng-lūn;

kap góa kau-chiàn ê lâng, kiû lí kap in kau-chiàn.

2Kiû lí the̍h tōa-sòe ê tún-pâi khí-lâi pang-chān góa,

3ēng chhiuⁿ tùi-hù tui-kóaⁿ góa ê lâng.

Kiû lí tùi góa kóng, “Góa sī lí ê Chín-kiù-chiá.”

4Kiû lí hō͘ siàu-siūⁿ góa sìⁿ-miā ê lâng siū lêng-jio̍k kiàn-siàu;

kiû lí hō͘ kè-bô͘ hām-hāi góa ê lâng thiat-thè làu-khùi.

5Kiû lí hō͘ in chhin-chhiūⁿ hō͘ hong chhe ê chho͘-khng,

ū Siōng Chú ê sù-chiá kā in kóaⁿ-sòaⁿ.

6Kiû lí hō͘ in ê lō͘ àm koh ku̍t,

ū Siōng Chú ê sù-chiá kā in tui-kóaⁿ.

7In bô-iân-bô-kò͘ àm-siat lô-bāng beh tng góa,

ku̍t hām-khiⁿ beh hāi góa ê sìⁿ-miā.

8Kiû lí hō͘ chai-hō tī bô phah-sǹg ê sî lîm-kàu in sin-chiūⁿ;

lí hō͘ in àm-siat ê lô-bāng tîⁿ-tio̍h ka-kī,

poa̍h-lo̍h hit lāi-bīn siū hāi.

9Án-ni, góa ê sim ōe in-ūi Siōng Chú khoài-lo̍k,

in-ūi I ê kiù-un hoaⁿ-hí.

10Góa kui-ê lâng lóng beh kóng,

“Siōng Chú ah, bô lâng ōe-tàng kap lí pí!

Lí chín-kiù khùn-khó͘--ê thoat-lī pí i khah kiông ê lâng,

chín-kiù khùn-khó͘ sàn-chhiah--ê thoat-lī chhiúⁿ-toa̍t i ê lâng.”

11Hiong-ok ê kiàn-chèng-jîn khiā--chhut-lâi;

in chhâ-mn̄g góa m̄-chai ê sū.

12In tùi góa ēng pháiⁿ pò hó,

hō͘ góa ko͘-khó͘-bû-chō͘.

13M̄-kú, in phòa-pīⁿ ê sî, góa chhēng môa-saⁿ pi-siong,

khek-khó͘ kìm-chia̍h, ūi-tio̍h in àⁿ-thâu kî-tó.

14Góa khoán-thāi in chòe góa ê pêng-iú, chòe góa ê hiaⁿ-tī;

góa khut-lo̍h ai-siong, ká-ná ūi-tio̍h lāu-bú sí--khì teh pi-siong.

15M̄-kú góa poa̍h-tó sit-pāi ê sî, in tàu-tīn hoaⁿ-hí;

liân siⁿ-hūn-lâng mā it-ti̍t kā góa lêng-jio̍k kong-kek.

16In chòe-hé phì-siùⁿ góa, thí-chhiò góa,

thòng-hūn góa, tùi góa kā-gê-chhiat-chhí.

17Chú ah, lí ná tiām-tiām teh khòaⁿ, beh khòaⁿ jōa kú?

Kiû lí kiù góa thoat-lī in ê chân-hāi,

kiù góa ê sìⁿ-miā thoat-lī siàu-chòng ê sai.

18Góa beh tī tōa chū-hōe tiong kám-siā lí,

tī chèng-lâng ê tiong-kan chheng-chàn lí.

19Kiû lí m̄-thang iông-ún bô-iân-bô-kò͘ te̍k-tùi góa ê lâng tùi góa khoa-kháu,

m̄-thang hō͘ bô lí-iû oàn-hūn góa ê lâng kā góa gîn.

20In-ūi in bô kóng hô-pêng ê ōe,

tian-tò chō-iâu tiòng-siong ì-ài hô-pêng ê lâng.

21In khui-chhùi tōa-siaⁿ kong-kek góa, kóng,

“Lí khòaⁿ leh! Goán ū chhin-ba̍k khòaⁿ--tio̍h.”

22Siōng Chú ah, lí í-keng ū khòaⁿ--tio̍h, kiû lí m̄-thang tiām-tiām;

Chú ah, m̄-thang khiā-hn̄g-hn̄g m̄ chhap góa.

23Góa ê Siōng-tè, góa ê Chú ah,

kiû lí cheng-sîn, kiû lí khí--lâi,

ūi góa piān-hō͘, thòe góa sin-oan.

24Siōng Chú — góa ê Siōng-tè ah, kiû lí chiàu lí ê kong-gī phòaⁿ-toàn,

m̄-thang hō͘ in tī góa ê bīn-chêng iông-iông-tek-ì.

25M̄-thang iông-ún in sim-lāi kóng, “Lí khòaⁿ, tāi-chì tú chiàu goán ê sim-goān!”

M̄-thang iông-ún in kóng, “Goán í-keng kā i thun--lo̍h-khì.”

26Goān ài góa tú-tio̍h hoān-lān ê lâng kiàn-siàu làu-khùi;

goān kiau-ngō͘ tùi-thāi góa ê lâng lóng sit-bāng kiàn-siàu.

27Goān ài góa siū phòaⁿ bô chōe ê lâng khoài-lo̍k chhiùⁿ-koa;

goān in put-sî kóng, “Tio̍h chun Siōng Chú chòe tōa,

in-ūi I ì-ài I ê po̍k-jîn pêng-an hoân-êng.”

28Góa ê chhùi-chi̍h beh soan-iông lí ê gī,

kui-ji̍t lóng chheng-chàn lí.

Si-phian 35 - 現代台語譯本羅馬字版(TTVR)-闽南语

Learn More About Us