Í-hut-só͘-su 6

Í-hut-só͘-su 6 - 現代台語譯本羅馬字版(TTVR)-闽南语

Pē-bú kap Jî-lú ê Koan-hē

1Choh jî-lú--ê, tio̍h sūn-ho̍k pē-bú, che sī sìn Chú ê lâng eng-kai ū ê pún-hūn.

2-3“Tio̍h hàu-kèng pē-bú”, che sī thâu chi̍t tiâu hù-tài èng-ún ê kài-bēng, “án-ni chòe lín chiū ōe ta̍k-hāng hó-sè, tī chit-ê tōe kú-tn̂g khiā-khí.”

4Choh pē-bú--ê, m̄-thang kek lín ê jî-lú siū-khì, tio̍h chiàu Chú ê koán-kàu kap kà-sī kā in pôe-iúⁿ.

Lô͘-lē kap Chú-lâng ê Koan-hē

5Choh lô͘-lē--ê, kap sūn-ho̍k Ki-tok kâng-khoán, tio̍h ēng kèng-ùi kap kiaⁿ-hiâⁿ choan-sim sūn-ho̍k lín tī sè-chiūⁿ ê chú-lâng.

6M̄-thang tī lâng ê bīn-chêng kò͘-ì chòe hō͘ lâng khòaⁿ, hō͘ lâng hoaⁿ-hí; tio̍h choh Ki-tok ê lô͘-lē, tùi sim-lāi chun-thàn Siōng-tè ê chí-ì,

7kam-sim lo̍k-ì chīn lô͘-lē ê pún-hūn, chhin-chhiūⁿ teh ho̍k-sāi Chú, m̄-sī teh ho̍k-sāi lâng.

8Tio̍h chai, bô-lūn sī lô͘-lē á-sī chū-iû--ê, Chú lóng ōe chiàu ta̍k-ê lâng ê hó hêng-ûi kā in pò-tap.

9Choh chú-lâng--ê, mā tio̍h ēng kâng-khoán ê thài-tō͘ tùi-thāi lín ê lô͘-lē; m̄-thang kā in ui-hia̍p. Tio̍h chai, lín kap lín ê lô͘-lē lóng sio̍k kâng chi̍t ūi thiⁿ-téng ê Chú-lâng; I ēng kâng-khoán ê phiau-chún tùi-thāi ta̍k-ê lâng.

Kap Siâ-ok Kau-chiàn

10Chòe-āu, góa khǹg lín tio̍h kap Chú kiat-liân, khò I ê tōa lêng-le̍k chòe kian-kiông ê lâng.

11Tio̍h chhēng Siōng-tè só͘ sù choân-thò ê bú-chong, hō͘ lín khiā-chāi, thang tí-khòng Mô͘-kúi ê khúi-kè.

12In-ūi lán m̄-sī kap ū-huih-ū-bah ê lâng teh kau-chiàn, sī kap thian-kài ê siâ-lêng, chiū-sī chit-ê o͘-àm sè-tāi ê ú-tiū thóng-léng-chiá, koân-le̍k-chiá, chiáng-koân-chiá teh kau-chiàn.

13Só͘-í, tio̍h ēng Siōng-tè só͘ sù choân-thò ê bú-chong chong-pī ka-kī, thang tī siâ-ok ê ji̍t-chí ōe-tàng tí-khòng tùi-te̍k ê kong-kek, kian-chhî kàu-tóe chhî-siú tīn-tōe.

14Só͘-í, tio̍h khiā-chāi, ēng chin-lí chòe tòa hâ, ēng chèng-gī chòe hō͘-heng-kah chhēng,

15ēng chún-pī hó-sè ê hô-pêng ê hok-im chòe ôe chhēng.

16Tio̍h put-sî ēng sìn-sim chòe tún-pâi, thang phah-hoa Siâ-ok-chiá siā--lâi hé ê chìⁿ.

17Tio̍h ēng chín-kiù chòe thâu-khoe, ēng Sèng Sîn chòe kiàm, chiū-sī Siōng-tè ê ōe.

18Tio̍h khò Sèng Sîn choân-sim kî-tó, siông-siông kî-kiû. Tio̍h put-sî kéng-séng, sî-siông ūi-tio̍h só͘-ū ê sìn-tô͘ kî-tó;

19mā ūi-tio̍h góa kî-tó, kiû Siōng-tè sù góa sìn-sit, thang hó-táⁿ khui-chhùi soan-iông hok-im ê ò-pì.

20Ūi-tio̍h chit-ê hok-im, góa hiān-chāi chòe chi̍t ê kòa thih-liān ê tāi-sài. Tio̍h ūi-tio̍h góa kî-tó, hō͘ góa thang hó-táⁿ soan-iông eng-kai kóng--ê.

Chòe-āu ê Chhéng-an

21Lán chhin-ài ê hiaⁿ-tī, mā-sī Chú tiong-si̍t ê chhe-ēng Chhui-ki-kó͘, ōe pò lín chai góa ê tāi-chì kap kūn-hóng.

22Góa chhe i khì lín hia, bo̍k-te̍k sī beh pò lín chai goán chia ê chêng-hêng, hō͘ lín ê sim tit-tio̍h kó͘-lē.

23Goān Pē Siōng-tè kap Chú Iâ-so͘ Ki-tok sù pêng-an, jîn-ài, kap sìn-sim hō͘ chèng hiaⁿ-tī chí-bē!

24Goān Siōng-tè ê un-tián kap só͘-ū ēng put-piàn ê thiàⁿ lâi thiàⁿ lán ê Chú Iâ-so͘ Ki-tok ê lâng tông-chāi!

Í-hut-só͘-su 6 - 現代台語譯本羅馬字版(TTVR)-闽南语

Learn More About Us