Ngá-ko 1

Ngá-ko 1 - 現代台語譯本羅馬字版(TTVR)-闽南语

Tē-it Siú

1 Só͘-lô-bûn si-koa tiong ê si-koa.

(Lú)

2Lâi, ēng lí ê chhùi kā góa chim;

lí ê ài-chêng pí chiú khah hó.

3Lí ê phang-iû si̍t-chāi chin phang;

lí ê miâ chhin-chhiūⁿ tò--chhut-lâi ê phang-iû;

só͘-í, bô chi̍t ê cha-bó͘ gín-á bô ài lí.

4Chhiáⁿ khan góa, lán kín lâi cháu!

Ông ah, chhōa góa ji̍p-khì lí ê pâng-keng,

lán lâi hoaⁿ-hí khoài-lo̍k;

lí ê ài-chêng pí chiú khah hó,

bo̍k-koài só͘-ū ê cha-bó͘ gín-á lóng ài lí.

5 Iâ-lō͘-sat-léng ê cha-bó͘ gín-á ah,

góa o͘, m̄-kú siⁿ-chòe súi,

chhin-chhiūⁿ Ki-ta̍t ê pò͘-pîⁿ,

chhin-chhiūⁿ Só͘-lô-bûn ê tiùⁿ-lî.

6M̄-thang in-ūi góa phê-hu o͘-o͘ ti̍t-ti̍t kā góa khòaⁿ,

he sī ji̍t-thâu pha̍k--ê.

Góa ê hiaⁿ-tī tùi góa siū-khì,

kiò góa khì kò͘ phû-tô-hn̂g;

góa soah bōe-tàng chiàu-kò͘ ka-kī ê hn̂g.

7Góa sim-ài--ê ah, kā góa kóng,

lí tī sím-mi̍h só͘-chāi teh chhī iûⁿ, tiong-tàu tī tó-ūi hō͘ iûⁿ hioh-khùn,

góa chiah bián tī lí tâng-phōaⁿ ê iûⁿ-kûn tiong sì-kòe chhē lí.

(Lâm)

8Cha-bó͘ gín-á tiong siōng-súi--ê ah, lí nā m̄ chai góa tī tó-ūi,

tè iûⁿ-kûn ê kha-jiah khì,

tī bo̍k-chiá ê pò͘-pîⁿ piⁿ chhī lí ê soaⁿ-iûⁿ-á.

9Góa ê ài-jîn, góa khòaⁿ lí chhin-chhiūⁿ Hoat-ló chiàn-chhia ê bé.

10Lí pìn-piⁿ ê chng-thāⁿ hō͘ lí ê bīn chin súi;

lí ê ām-kún kòa chin-chu-liān chin hó-khòaⁿ.

11Goán beh kā lí chòe kim ê liān-á, siuⁿ gûn ê liú-á.

(Lú)

12Ông chē-toh ê sî,

góa ê ná-ta̍t phang-iû chhèng-chhut phang-bī.

13Góa chhin-ài--ê, lí sī chi̍t pau bu̍t-io̍h,

kòa tī góa ê heng-chêng.

14Góa chhin-ài--ê, lí sī chi̍t pha chńg-kah-hoe,

tī Ún Ki-tí ê phû-tô-hn̂g lāi teh khui.

(Lâm)

15Góa ê ài-jîn, lí chin súi, si̍t-chāi chin súi!

Lí ê ba̍k-chiu chhin-chhiūⁿ hún-chiáu.

(Lú)

16Góa chhin-ài--ê, lí chin eng-chùn, góa chin kah-ì!

Lán ēng chhiⁿ-chhùi ê chháu-po͘ chòe chhn̂g-pho͘,

17ēng pek-hiuⁿ-chhâ chòe chhù ê niû,

chhêng-pek-chhâ chòe kak-á.

Ngá-ko 1 - 現代台語譯本羅馬字版(TTVR)-闽南语

Learn More About Us