Iok-pek-kì 3

Iok-pek-kì 3 - 現代台語譯本羅馬字版(TTVR)-闽南语

Iok-pek Chiù-chó͘ Ka-kī

1Āu-lâi Iok-pek khui-chhùi, chiù-chó͘ i chhut-sì ê ji̍t.

2Iok-pek kóng:

3Goān góa chhut-sì hit-ji̍t siau-sit;

goān kóng “Ū hoâi-īn ta-po͘-kiáⁿ” hit-mî mā siau-sit.

4Goān hit-ji̍t pìⁿ-chòe o͘-àm;

goān thiⁿ-téng ê Siōng-tè bô khòaⁿ-kò͘ i, kng mā bô chiò i.

5Goān o͘-àm kap sí-ìm kā hit-ji̍t chhú--khì;

goān ba̍t-hûn khàm tī hit téng-bīn;

goān ji̍t-thâu choân-si̍t phah-kiaⁿ i.

6Goān hit-mî hō͘ o͘-àm thun--khì,

tùi nî-le̍k san-tû, bô khǹg tī ge̍h-le̍k lāi-bīn.

7Goān hit-mî bô lâng siⁿ-kiáⁿ,

bô thiaⁿ-tio̍h hoaⁿ-hí ê siaⁿ.

8Goān hiah-ê liām hû-chiù, ōe-hiáu ho͘-hoàn hái-siù--ê,

khí-lâi chiù-chó͘ hit-ji̍t.

9Goān khé-bêng-chhiⁿ pìⁿ-chòe o͘-àm,

só͘ kî-thāi ê thiⁿ-kng bōe chhut-hiān,

mā khòaⁿ bōe tio̍h chheng-chá ê ji̍t-kng;

10in-ūi i bô koaiⁿ-ba̍t góa ê lāu-bú ê chú-kiong,

tì-kàu góa ê ba̍k-chiu khòaⁿ-tio̍h chin chōe hoān-lān.

11Góa ná ōe bô tī thai--ni̍h chiū sí,

ná ōe bô chhut pak-tó͘ chiū tn̄g-khùi?

12Sī-án-chóaⁿ ū kha-thâu-u kā góa chiap,

ū lin hō͘ góa suh?

13Nā bô, góa í-keng an-jiân kè-sin,

í-keng chēng-chēng khùn--khì,

14kap tōe-chiūⁿ ūi-tio̍h ka-kī tiông-kiàn hong-hòe ê kiong-tiān ê kun-ông siú-léng chòe-hé teh khùn;

15á-sī kap kim-gûn châi-pó móa chhù ê ông-chú chòe-hé khùn,

16ná bô chhin-chhiūⁿ liû-sán chiū kā tâi ê eⁿ-á,

chhin-chhiūⁿ bô kìⁿ-tio̍h kng ê thai-jî.

17Tī hia pháiⁿ-lâng bōe koh jiáu-loān;

ià-siān ê lâng ōe tit-tio̍h an-lêng.

18Tī hia siû-hoān lóng tit-tio̍h an-hioh,

bōe koh thiaⁿ-tio̍h tok-kang ê siaⁿ.

19Bô-lūn tōa-sòe kùi-chiān lóng tī hia;

lô͘-lē mā thoat-lī chú-lâng ê koán-chè, tit-tio̍h chū-iû.

20Siōng-tè sī-án-chóaⁿ sù kng-bêng hō͘ siū-khó͘ ê lâng,

sī-án-chóaⁿ sù sìⁿ-miā hō͘ sim-sîn thòng-khó͘ ê lâng?

21In ài-beh sí, koh sí bōe khì;

chhē sí pí chhē chhàng--teh ê pó-pòe khah pek-chhiat.

22In chi̍t-ē chhē-tio̍h hûn-bōng chiū khoài-lo̍k,

hoaⁿ-hí kàu bōe-kò͘--tit.

23Lâng ê lō͘ í-keng hō͘ Siōng-tè cha̍h--teh,

cháu-tâu-bô-lō͘, ná koh sù i kng-bêng?

24Góa ēng thó͘-khùi chòe pn̄g chia̍h;

tōa-siaⁿ háu, chhin-chhiūⁿ choh tōa-chúi.

25Góa teh kiaⁿ--ê, kèng-jiân hoat-seng,

só͘ kiaⁿ-hiâⁿ--ê, phian-phian lîm-kàu.

26Góa bô pêng-an, bô pêng-chēng, bô tit-tio̍h an-hioh,

chí-ū chai-lān put-toān lîm-kàu góa.

Iok-pek-kì 3 - 現代台語譯本羅馬字版(TTVR)-闽南语

Learn More About Us