Í-se-kiat-su 26

Í-se-kiat-su 26 - 現代台語譯本羅馬字版(TTVR)-闽南语

Khiàn-chek Thài-ní

1Tē-cha̍p-it nî bó͘ chi̍t kò-ge̍h ê chhoe-it, Siōng Chú tùi góa kóng,

2“Jîn-chú ah, in-ūi Thài-ní-lâng ǹg Iâ-lō͘-sat-léng kóng, ‘Ha ha, hit-ê kap bān-kok chòe bō͘-e̍k ê siâⁿ í-keng húi-hoāi lah! Seng-lí lóng pìⁿ-chòe goán ê lah! I beh soe-bî, goán beh hoân-êng!’

3“Só͘-í, góa — Chì-koân ê Siōng Chú án-ni kóng: Thài-ní, góa beh kap lí choh-tùi! Góa beh tiàu-chi̍p lia̍t-kok, hō͘ in chhin-chhiūⁿ hái-éng giâ khí-lâi kong-táⁿ lí.

4In beh húi-hoāi lí ê siâⁿ-chhiûⁿ, thiah-húi lí ê siâⁿ-lâu. Góa mā beh kā só͘-ū ê thô͘ lóng pê chheng-khì, chhun kng-ku̍t ê chio̍h-pôaⁿ.

5Hái-tiong ê Thài-ní beh pìⁿ-chòe pha̍k hî-bāng ê só͘-chāi. Góa — Chì-koân ê Siōng Chú án-ni soan-kò. I beh chiâⁿ-chòe lia̍t-kok ê la̍h-bu̍t,

6i chiu-ûi siâⁿ-tìn ê chū-bîn beh hō͘ to-kiàm thâi-sí. Án-ni, in chiū chai góa sī Siōng Chú.

7“Chì-koân ê Siōng Chú án-ni kóng: Góa beh tiàu lia̍t-kok chi ông, Pa-pí-lûn-ông Nî-pò͘-kah-nî-sat, tòa-niá chiàn-bé, chiàn-chhia, bé-peng, tùi pak-hng lâi kong-táⁿ Thài-ní.

8Lí chiu-ûi siâⁿ-tìn ê chū-bîn mā lóng beh siū châu-bia̍t; tùi-te̍k beh chō thô͘-tui, khí koân-tâi, gia̍h tún-pâi kong-táⁿ lí.

9I beh ēng lòng-siâⁿ ê thûi kong-phòa lí ê siâⁿ-chhiûⁿ, ēng thih-khì thiah-húi lí ê siâⁿ-lâu.

10I tōa-kûn chiàn-bé ká--khí-lâi ê thô͘-hún beh kā lí jia-khàm. I ê bé-peng kap chiàn-chhia hoat-chhut ê siaⁿ hō͘ lí ê siâⁿ-chhiûⁿ tín-tāng. I beh ji̍p lí ê siâⁿ-mn̂g, chhin-chhiūⁿ lâng tùi phòa-khiah ê siâⁿ-chhiûⁿ ji̍p--khì.

11I ê bé-peng beh thún-ta̍h lí ê tōa-koe-sió-hāng, ēng to-kiàm thâi-sí lí ê jîn-bîn. Lí ê sîn-biō kian-kò͘ ê tōa-thiāu beh tó tī thô͘-kha.

12Tùi-te̍k beh chhiúⁿ lí ê châi-pó, toa̍t lí ê hè-mi̍h, chhia-tó lí ê siâⁿ-chhiûⁿ, thiah-húi lí súi ê chhù-the̍h, kā chio̍h-thâu, chhâ, thô͘ lóng hiat-lo̍h hái.

13Góa beh hō͘ lí bōe-tàng koh chhiùⁿ-koa, lâng bōe-tàng koh thiaⁿ-kìⁿ lí tôaⁿ-khîm ê siaⁿ.

14Góa beh hō͘ lí pìⁿ-chòe kng-ku̍t ê chio̍h-pôaⁿ, chòe pha̍k hî-bāng ê só͘-chāi; lí bô khó-lêng koh tiông-kiàn. Góa — Chì-koân ê Siōng Chú án-ni soan-kò.”

15Chì-koân ê Siōng Chú koh tùi Thài-ní kóng, “Lí ê jîn-bîn siū tô͘-sat, siū-siong haiⁿ-haiⁿ-chhan ê sî, iân-hái ê chū-bîn kiám bōe in-ūi thiaⁿ-kìⁿ lí tó-hoāi ê siau-sit kiaⁿ kah phi̍h-phi̍h-chhoah?

16Iân-hái kok-ka ê kun-ông lóng beh lī-khui in ê chō-ūi, kā ông-phàu kap siù-hoe ê saⁿ thǹg--khí-lâi, chē tī thô͘-kha, it-ti̍t kiaⁿ-hiâⁿ ngia̍uh-ngia̍uh-chhoah; lí ê kiat-kio̍k hō͘ in lóng gāng--khì.

17In beh ūi lí chhiùⁿ ai-ko:

Ah, lí chit-ê chhut-miâ ê siâⁿ,

hiān-chāi kèng-jiân bia̍t-bông lah!

Lí bat chheng-pà hái-siōng;

lí kap lí ê jîn-bîn bat hō͘ só͘-ū tòa tī iân-hái ê lâng kiaⁿ-hiâⁿ.

18Lí siū húi-bia̍t hit-ji̍t,

hái-tó beh ngia̍uh-ngia̍uh-chhoah;

tòa tī hia ê lâng lóng beh in-ūi lí ê siau-bia̍t kiaⁿ-hiâⁿ.”

19Chì-koân ê Siōng Chú án-ni kóng, “Góa beh hō͘ lí hong-hòe chhin-chhiūⁿ bô lâng khiā-khí ê siâⁿ. Góa beh ēng chhim-ian ê chúi khàm-kè lí, ēng tōa-chúi im-ba̍t lí.

20Góa beh hō͘ lí kap lo̍h Chhim-khiⁿ ê lâng, chòe-hé lo̍h-khì kó͘-chá sí--khì ê lâng hia. Góa beh hō͘ lí kap lo̍h Chhim-khiⁿ ê lâng tòa tī tōe chhim, kó͘-chá chiū hong-hòe ê só͘-chāi. Lí bōe-tàng koh tī jîn-kan tián-ui.

21Góa beh hō͘ lí tú-tio̍h khióng-pò͘ ê kiat-kio̍k, lí bô koh chûn-chāi; lâng beh chhē lí, éng-oán chhē bōe tio̍h.” Chì-koân ê Siōng Chú án-ni soan-kò.

Í-se-kiat-su 26 - 現代台語譯本羅馬字版(TTVR)-闽南语

Learn More About Us