Si-phian 49 - 現代台語譯本羅馬字版(TTVR)-闽南语

Khó-la hō͘-tāi ê si, kau hō͘ sèng-ga̍k-tiúⁿ.Óa-khò Châi-hù Sī Gû-gōng

1Bān-bîn ah, lóng tio̍h thiaⁿ;

sè-chiūⁿ lóng-chóng ê chū-bîn ah, tio̍h àⁿ hī-khang thiaⁿ.

2Bô-lūn pi-chiān chun-kùi,

hó-gia̍h sàn-chhiah, lóng tio̍h thiaⁿ.

3Góa ê chhùi beh kóng tì-hūi ê ōe;

góa ê sim beh siūⁿ bêng-lí ê sū.

4Góa beh àⁿ hī-khang thiaⁿ phì-jū,

tôaⁿ-khîm kóe-seh ò-pì.

5Pháiⁿ-lâng ēng khúi-chà pau-ûi góa,

tī hoān-lān ê ji̍t, góa mā m̄ kiaⁿ.

6In óa-khò châi-hù, khoa-kháu hó-gia̍h;

7in bô chi̍t ê ū hoat-tō͘ sio̍k-hôe ka-kī,

mā bōe-tàng ēng chîⁿ tùi Siōng-tè sio̍k-hôe sìⁿ-miā.

8In-ūi sio̍k-hôe sìⁿ-miā ê kè-chîⁿ siuⁿ kùi,

éng-oán hù bōe khí;

9lâng bōe-tàng kú-tn̂g oa̍h--teh,

bián siū húi-bia̍t.

10Ū lâng khòaⁿ-tio̍h tì-hūi ê lâng sí,

gû-gōng bû-ti ê lâng mā lóng bia̍t-bông,

chîⁿ-châi lóng lâu hō͘ pa̍t-lâng.

11In siūⁿ-kóng in ê chhù ōe éng-oán lâu--teh,

in khiā-khí ê só͘-chāi ōe sòa kàu bān-tāi,

só͘-í ēng ka-kī ê miâ hō ka-kī ê tōe.

12M̄-kú lâng bōe-tàng kú-tn̂g hióng-siū hù-kùi,

ōe chhin-chhiūⁿ cheng-siⁿ sí--khì.

13Che sī óa-khò ka-kī ê lâng só͘ kiâⁿ ê lō͘,

sī chàn-tông in ê ōe ê lâng ê kiat-kio̍k.

14Chhin-chhiūⁿ chù-tiāⁿ lo̍h Im-hú ê iûⁿ,

Sí-bông chòe in ê bo̍k-chiá chhōa in chi̍t-lō͘ kàu hûn-bōng;

in ê seng-khu tī Im-hú siau-bia̍t,

bô koh ū khiā-khí ê só͘-chāi.

15M̄-kú Siōng-tè ōe sio̍k-hôe góa thoat-lī Im-hú ê koân-sè;

in-ūi I ōe chiap-la̍p góa.

16Lâng hoat-châi, ka-têng ke-thiⁿ kong-chhái;

lí m̄-bián in-ūi án-ni tio̍h-kiaⁿ.

17In-ūi i sí ê sî, bô chi̍t hāng tòa ōe khì;

i ê êng-hôa bōe tè i khì.

18Sui-jiân i chāi-siⁿ ka-kī khoa-iāu ū hok-khì,

sêng-kong tit-tio̍h lâng ê o-ló,

19i chòe-āu mā tio̍h khì kìⁿ in chó͘-kong,

éng-oán bōe koh khòaⁿ-kìⁿ kng.

20Lâng bōe-tàng kú-tn̂g hióng-siū hù-kùi,

i ōe chhin-chhiūⁿ cheng-siⁿ sí--khì.

Learn More About Us