Í-se-kiat-su 31

Í-se-kiat-su 31 - 現代台語譯本羅馬字版(TTVR)-闽南语

Ēng Pek-hiuⁿ-chhiū Pí-phēng Ai-ki̍p

1Tē-cha̍p-it nî, saⁿ-ge̍h chhoe-it, Siōng Chú tùi góa kóng,

2“Jîn-chú ah, lí tio̍h kā Ai-ki̍p-ông kap i ê jîn-bîn kóng:

Lí ê kiông-sēng, siáⁿ-lâng ōe-tàng kap lí pí?

3Lí khòaⁿ, A-su̍t bat chhin-chhiūⁿ Lê-pa-lūn ê pek-hiuⁿ-chhiū,

ki-hio̍h chhiⁿ-chhùi, chhiū-nâ bō͘-sēng,

chhiū-châng koân-tōa, chhiū-bé tú-thiⁿ.

4Pek-hiuⁿ-chhiū ū chúi lūn-te̍k;

tōe-hā chúi-goân hō͘ i koân-tōa.

I chai-chèng ê só͘-chāi sì-chiu-ûi ū kang-hô;

chi-liû koàn-ak chhân-iá só͘-ū ê chhiū-ba̍k.

5Só͘-í, i pí kî-tha ê chhiū-ba̍k khah tōa-châng;

in-ūi chúi-goân chhiong-chiok,

i ê chhiū-oe tn̂g koh chōe, hio̍h bō͘-sēng.

6Khong-tiong ê pe-chiáu tī chhiū-oe choh-siū;

tōe-chiūⁿ ê cháu-siù tī chhiū-ńg ē seng-sán;

lia̍t-kok ê jîn-bîn lóng tī i ê ìm-ńg-ē khiā-khí.

7Chiah-ni̍h tōa-châng koh súi ê chhiū!

Chhiū koân, chhiū-oe tn̂g, hio̍h bō͘-sēng;

chhiū-kun tèng chhim, chhim-ji̍p tōe-hā ê chúi-goân.

8Siōng-tè hn̂g-tiong ê pek-hiuⁿ-chhiū bōe pí i khah koân;

siông-chhiū ê chhiū-ki bōe pí i khah tn̂g;

png-chhiū ê chhiū-oe bōe-tàng kap i pí.

Siōng-tè hn̂g-tiong ê chhiū bô chi̍t châng chhin-chhiūⁿ i hiah súi.

9Góa hō͘ i ê ki-hio̍h bō͘-sēng, siⁿ-chòe chin súi;

Siōng-tè ê hn̂g I-tiân só͘-ū ê chhiū lóng him-siān i.

10“Só͘-í, góa — Chì-koân ê Siōng Chú án-ni kóng: Chit-châng chhiū in-ūi koân-tōa, chhiū-bé koân kah tú-thiⁿ, soah chū-ko kiau-ngō͘,

11góa chiū kā i kau hō͘ lia̍t-kok tiong siōng kiông-tāi ê thóng-tī-chiá; chit-ê thóng-tī-chiá beh chiàu i ê siâ-ok kā i pò-èng. Góa í-keng kā i khì-sak.

12Hiong-ok ê gōa-kok-lâng kā i chám-tn̄g, hiat-ka̍k. I ê ki-hio̍h lak tī soaⁿ-téng kap soaⁿ-kok tiong, chhiū-ki chi̍h--khì lak tī hô-piⁿ; chhiū-ńg ē lia̍t-kok ê jîn-bîn lóng lī-khui.

13Khong-tiong ê pe-chiáu beh hioh tī tó--lo̍h-khì ê chhiū-kho͘; chhân-iá ê cháu-siù beh tó tī lak--lo̍h-khì ê chhiū-ki.

14Í-āu, chai-chèng tī chúi-piⁿ ê chhiū bô thang koh in-ūi tōa-châng, koân kah tú-thiⁿ chū-ko kiau-ngō͘. Hiah-ê chhiū lóng beh ko͘-tâ, chhin-chhiūⁿ kiau-ngō͘ ê sè-kan-lâng sí--khì, kap sí-lâng chòe-hé lo̍h-khì Im-kan.

15“Chì-koân ê Siōng Chú koh kóng: Hit-châng tōa-châng chhiū lo̍h-khì Im-kan ê sî, góa beh khàm chhim-ian, chia̍t-tn̄g kang-hô, hō͘ chúi-lâu thêng-chí lâi piáu-sī ai-siong. Góa beh hō͘ o͘-àm jia-khàm Lê-pa-lūn-soaⁿ, hō͘ chhiū-nâ lāi ê chhiū-ba̍k lóng ko͘-tâ.

16Góa kā i hiat-lo̍h Im-kan, hō͘ i kap lo̍h chhim-ian ê sí-lâng chòe-hé ê sî, i siak--lo̍h-khì ê siaⁿ iô-tāng lia̍t-kok. I-tiân-hn̂g ê chhiū, í-ki̍p Lê-pa-lūn chúi-goân chhiong-chiok, siōng-hó siōng-súi ê chhiū-ba̍k, lóng beh tī Im-kan tit-tio̍h an-ùi.

17Chiah-ê chhiū lóng beh kap hit-châng tōa-châng chhiū lo̍h-khì Im-kan, kap hō͘ to thâi-sí ê lâng chòe-hé. Só͘-ū tòa tī hit-châng chhiū ìm-ńg-ē ê lâng lóng beh siū hòng-tio̍k khì lia̍t-kok.

18“Lí ê êng-kng kap koân-tōa, I-tiân-hn̂g lāi-bīn ê chhiū-ba̍k ū tó chi̍t châng ōe-tàng kap lí pí? M̄-kú, lí beh kap I-tiân-hn̂g lāi-bīn ê chhiū-ba̍k siâng-khoán hō͘ lâng hiat-lo̍h Im-kan, kap hiah-ê bô siū kat-lé í-ki̍p hō͘ to thâi-sí ê lâng chòe-hé. Che sī chí Ai-ki̍p-ông kap i ê jîn-bîn kóng--ê. Chì-koân ê Siōng Chú án-ni soan-kò.”

Í-se-kiat-su 31 - 現代台語譯本羅馬字版(TTVR)-闽南语

Learn More About Us