Í-sài-a-su 17

Í-sài-a-su 17 - 現代台語譯本羅馬字版(TTVR)-闽南语

Siōng-tè Sím-phòaⁿ Tāi-má-sū-kek kap Í-sek-lia̍t

1Che sī iú-koan Tāi-má-sū-kek ê sìn-sit:

Khòaⁿ leh, Tāi-má-sū-kek bô koh sī siâⁿ-chhī,

it-tēng ōe pìⁿ-chòe pùn-sò-tui.

2 A-lô-ní ê siâⁿ-chhī ōe éng-oán hong-hòe,

pìⁿ-chòe chhī iûⁿ ê só͘-chāi;

iûⁿ tó-teh hioh-khùn mā bōe siū heh-kiaⁿ.

3 Í-sek-lia̍t bōe koh ū iàu-sài,

Tāi-má-sū-kek mā bōe koh ū chú-koân;

só͘ chhun ê Sū-lī-a-lâng

ōe chhin-chhiūⁿ Í-sek-lia̍t-lâng sit-khì kong-chhái.

Siōng Chú — Bān-kun ê Thóng-sòe án-ni soan-kò.

4Tī hit-ji̍t, Í-sek-lia̍t ê kong-chhái ōe siau-sit,

i pûi-nńg ê seng-khu ōe siau-sán-lo̍h-bah;

5chhin-chhiūⁿ siu-koah liáu ê be̍h-hn̂g, chhun ê be̍h-á hō͘ lâng khioh--khì;

chhin-chhiūⁿ Lī-hoa̍t-im Soaⁿ-kok siu-koah--kè ê be̍h-hn̂g, chhun ê be̍h-sūi mā hō͘ lâng khioh-liáu-liáu.

6 Í-sek-lia̍t-lâng tiong-kan chí-ū chió-sò͘ ōe lâu--teh;

in ōe chhin-chhiūⁿ tú-á siu-sêng liáu ê kaⁿ-ná-chhiū,

chhiū-téng chí-ū chhun nn̄g saⁿ lia̍p kaⁿ-ná,

ē-bīn ê ki siōng chōe mā chiah chhun sì gō͘ lia̍p.

Siōng Chú — Í-sek-lia̍t ê Siōng-tè án-ni soan-kò.

7Tī hit-ji̍t, lâng ōe choán-ǹg in ê Chhòng-chō-chú; in ê ba̍k-chiu ōe gióng-bōng Í-sek-lia̍t sîn-sèng ê Siōng-tè.

8In bōe koh kui-ǹg in chhin-chhiú khí ê chè-tôaⁿ, mā bōe koh óa-khò in chńg-thâu-á chō ê A-sià-la lú-sîn ê thiāu-siōng kap hiuⁿ-tâi.

9Tī hit-ji̍t, Í-sek-lia̍t hông-pī kian-kò͘ ê siâⁿ-chhī ōe pha-hng hong-hòe, chhin-chhiūⁿ A-mô͘-lī-lâng kap Hi-bī-lâng tùi Í-sek-lia̍t-lâng bīn-chêng tô-cháu khì-sak ê siâⁿ-chhī.

10 Í-sek-lia̍t ah, lí í-keng bōe-kì-tit chín-kiù lí ê Siōng-tè,

bōe-kì-tit hō͘ lí pī-lān ê Tōa-chio̍h-pôaⁿ,

khì pài gōa-kok ê sîn-bêng.

Lí chhin-chhiūⁿ ū chai siōng-hó ê chhiū-châng,

m̄-kú chiap gōa-lâi ê chhiū-ki.

11Sui-jiân tī chai-chèng hit-ji̍t chiū puh-íⁿ,

tī chai-chèng hit chá-khí chiū khui-hoe,

chóng-sī siu-sêng ōe lo̍k-khong;

hit-ji̍t, chí-ū pīⁿ-thiàⁿ kap tōa thòng-khó͘.

Tùi-te̍k Siū Phah-pāi

12Thiaⁿ leh, ū chin chōe jîn-bîn teh soan-hoa;

in soan-hoa ê siaⁿ chhin-chhiūⁿ tōa-hái hōa-hōa-háu!

Lia̍t-kok ná tōa-éng teh chhiong-kek,

chhin-chhiūⁿ pho-lōng ti̍t-ti̍t chhiong.

13Lia̍t-kok sui-jiân ná tōa-chúi ti̍t-ti̍t phoah,

Siōng-tè chi̍t-ē chek-pī, in sûi-sî cháu-lī-lī,

chhin-chhiūⁿ chho͘-khng hō͘ soaⁿ-téng chhe--lo̍h-lâi ê kńg-lê-á-hong sàu-cháu,

chhin-chhiūⁿ chháu-iù-á hō͘ tōa-hong chhe-sòaⁿ.

14Khòaⁿ leh! Mî--sî, ū khióng-pò͘,

ji̍t bē chhut, in chiū lóng siau-sit.

Che chiū-sī chhiúⁿ goán ê lâng èng-siū ê pò-èng,

sī kiap goán ê lâng èng-iú ê miā-ūn.

Í-sài-a-su 17 - 現代台語譯本羅馬字版(TTVR)-闽南语

Learn More About Us