Tān-í-lí-su 12

Tān-í-lí-su 12 - 現代台語譯本羅馬字版(TTVR)-闽南语

Boa̍t-ji̍t

1Siōng-tè ê sù-chiá kè-sio̍k tùi góa kóng, “Hit-sî, hit-ê pó-hō͘ lí ê tông-pau ê thiⁿ-sài-tiúⁿ Bí-ka-le̍k beh chhut-hiān, jiân-āu it-tēng ōe ū chi̍t tōaⁿ chai-lān ê sî-kî; hit-ê chai-lān sī tùi khai-kok í-lâi m̄-bat ū--ê. Hit-sî, lí hiah-ê miâ ū kì tī oa̍h-miā-chheh ê tông-pau ōe tit-tio̍h kái-kiù.

2Chin chōe í-keng sí--khì ê lâng ōe koh-oa̍h; ū-ê tit-tio̍h éng-oán ê sìⁿ-miā, ū-ê éng-oán siū thí-chhiò iàm-chiān.

3Ū tì-hūi ê lâng ōe hoat-kng, chhin-chhiūⁿ thiⁿ-téng ê kng; hiah-ê chhōa chin chōe lâng kui-ǹg chèng-ti̍t ê lâng, ōe chhin-chhiūⁿ chhiⁿ-sîn éng-oán hoat-kng.

4“Tān-í-lí, boa̍t-ji̍t kàu í-chêng, lí tio̍h chiong chiah-ê ōe pó-bi̍t, kā chit-pún chheh hong-ba̍t. Tī chit-tōaⁿ sî-kan, it-tēng ū chin chōe lâng choan-sim thàm-thó ò-pì ê sū, tì-sek chiū ná ke-thiⁿ.”

5Āu-lâi, góa Tān-í-lí khòaⁿ-tio̍h ū nn̄g ê lâng khiā--teh: chi̍t ê tī hô ê chit-pêng, chi̍t ê tī hô ê hit-pêng.

6Kî-tiong chi̍t ê tùi lēng-gōa khiā tī hô-chúi téng-bīn, chhēng iù-môa-pò͘ ê saⁿ hit-ê lâng kóng, “Chiah-ê kî-īⁿ ê sū sím-mi̍h sî ōe si̍t-hiān?”

7Hit-ê khiā tī hô-chúi téng-bīn, chhēng iù-môa-pò͘ ê saⁿ ê lâng ǹg thiⁿ gia̍h siang-chhiú; góa thiaⁿ-kìⁿ i kí éng-oa̍h ê Chú soan-sè kóng, “Koh saⁿ nî pòaⁿ, chiū-sī chân-hāi hiah-ê sèng ê chú-bîn ê sè-le̍k kiat-sok ê sî, chiah-ê it-chhè ê sū lóng ōe si̍t-hiān.”

8Góa thiaⁿ-liáu, bōe bêng-pe̍k, chiū mn̄g kóng, “Góa ê chú, chiah-ê sū ê kiat-kio̍k ōe án-chóaⁿ?”

9I kóng, “Tān-í-lí, lí m̄-bián chhau-hoân, in-ūi tī boa̍t-ji̍t í-chêng, chiah-ê ōe lóng ōe hong-ba̍t pó-bi̍t.

10It-tēng ōe ū chin chōe lâng tit-tio̍h sóe-chheng, kiat-chēng, chiap-siū thoàn-liān. M̄-kú, pháiⁿ-lâng ōe kè-sio̍k chòe pháiⁿ. Chiah-ê sū pháiⁿ-lâng bōe bêng-pe̍k, chí-ū ū tì-hūi ê lâng chiah ōe.

11“Tùi kìm-chí ta̍k-ji̍t hiàn-chè hō͘ Siōng-tè, koh chhāi hit-ê tì-kàu bia̍t-bông khó-ò͘ⁿ ê siōng hit-ji̍t khai-sí, tio̍h koh thèng-hāu chi̍t-chheng nn̄g-pah káu-cha̍p ji̍t.

12Só͘-ū kian-chhî kàu chi̍t-chheng saⁿ-pah saⁿ-cha̍p-gō͘ ji̍t ê lâng chin ū hok-khì!

13“Lí leh, lí tio̍h kian-chhî kàu kiat-kio̍k ê sî. Lí ōe tit-tio̍h an-hioh, kàu boa̍t-ji̍t, lí ōe koh khí--lâi, hióng-siū lí ê hok-hūn!”

Tān-í-lí-su 12 - 現代台語譯本羅馬字版(TTVR)-闽南语

Learn More About Us