Hi-pek-lâi-su 10

Hi-pek-lâi-su 10 - 現代台語譯本羅馬字版(TTVR)-闽南语

1Kì-jiân Lu̍t-hoat m̄-sī teh-beh lâi hó-sū pún-sin ê chin-siōng, sī hó-sū ê iáⁿ, só͘-í bōe-tàng chi̍t nî kè chi̍t nî kè-sio̍k ēng siâng-khoán ê chè-mi̍h hō͘ chhin-kūn Siōng-tè ê lâng tit-tio̍h oân-choân.

2Nā-sī ōe, hiàn-chè ê sū eng-kai í-keng thêng-chí ah, in-ūi kèng-pài ê lâng chi̍t piàn chiū oân-choân tit-tio̍h kiat-chēng, bô koh ū chōe ê ì-sek.

3Kî-si̍t, ta̍k-nî só͘ hiàn ê chè-mi̍h chí-ū ōe hō͘ lâng siūⁿ-khí in ê chōe;

4in-ūi gû, iûⁿ ê huih bōe-tàng tû-khì lâng ê chōe.

5Só͘-í, Ki-tok lâi kàu sè-kan ê sî ū kóng:

Chè-sū kap lé-mi̍h, lí bô ài;

m̄-kú lí ū kā góa chún-pī seng-khu.

6Sio-hòa-chè kap sio̍k-chōe-chè, lí bô kah-ì.

7Hit-sî góa kóng:

Siōng-tè ah, góa lâi lah;

góa lâi sī beh si̍t-hêng lí ê chí-ì.

Góa ê sū ū kì-chài tī chheh--ni̍h.

8Góa téng-bīn ū kóng, “Chè-sū kap lé-mi̍h, sio-hòa-chè kap sio̍k-chōe-chè lí bô ài, mā bô kah-ì; chiah-ê sī chiàu Lu̍t-hoat lâi hiàn--ê.”

9I sòa lo̍h-khì kóng, “Khòaⁿ ah, góa lâi sī beh si̍t-hêng lí ê chí-ì.” Án-ni, Siōng-tè hòe-tû chêng--ê, sī beh kiàn-li̍p āu--ê.

10Iâ-so͘ Ki-tok si̍t-hêng Siōng-tè ê chí-ì, chí-ū chi̍t piàn hiàn I ka-kī ê seng-khu chiū kàu-gia̍h hō͘ lán tit-tio̍h sèng-hòa kui Siōng-tè.

11Chè-si ta̍k-ji̍t khiā-teh ho̍k-sāi Siōng-tè, chi̍t-piàn koh chi̍t-piàn hiàn siâng-khoán ê chè, éng-oán bōe-tàng tû-khì lâng ê chōe.

12M̄-kú Ki-tok chí-ū chi̍t piàn hiàn sio̍k-chōe-chè, jiân-āu chē tī Siōng-tè ê chiàⁿ-pêng,

13thèng-hāu Siōng-tè hō͘ I ê tùi-te̍k chòe I ê kha-tiam.

14Ki-tok thong-kè chi̍t piàn ê hiàn-chè, hō͘ sèng-hòa kui Chú ê lâng éng-oán oân-choân.

15Sèng Sîn mā ū tùi lán choh-chèng. I ū kóng:

16Chú kóng: Hiah-ê ji̍t-chí í-āu,

Góa kap in só͘ beh li̍p ê iok chiū-sī án-ni:

Góa beh chiong góa ê Lu̍t-hoat khǹg tī in ê sim-lāi,

siá tī in ê náu-lāi.

17Jiân-āu I koh kóng:

Góa bōe koh kì-tit in ê chōe-ok kap kè-hoān.

18Kì-jiân chōe í-keng tit-tio̍h sià-bián, chiū m̄-bián koh hiàn sio̍k-chōe-chè.

Lán Lâi Chhin-kūn Siōng-tè

19Só͘-í, hiaⁿ-tī chí-bē, lán khò Iâ-so͘ lâu-huih sí ōe-tàng ū khak-sìn kap ióng-khì chìn-ji̍p Chì-sèng-só͘.

20I thong-kè tiùⁿ-lî, chiū-sī ka-kī ê seng-khu, kā lán khui chi̍t tiâu sin koh oa̍h ê lō͘.

21Lán í-keng ū chi̍t ūi úi-tāi ê Chè-si teh tī-lí Siōng-tè ê ke,

22lán tio̍h ēng chin-sêng ê sim, kian-koat ê sìn, chheng-khì bô khui-khiàm ê liông-sim kap chheng-chúi sóe--kè ê seng-khu lâi chhin-kūn Siōng-tè.

23Lán tio̍h kian-koat chhî-siú só͘ soan-jīn ê ǹg-bāng, in-ūi èng-ún lán ê Siōng-tè khó-khò.

24Lán tio̍h hō͘-siōng koan-sim thang kek-lē saⁿ-thiàⁿ kap chòe hó-sū.

25Ū chi̍t-kóa lâng thêng-chí chū-hōe, m̄-thang o̍h in ê si̍p-koàn, tian-tò tio̍h hō͘-siōng khoàn-bián; kì-jiân lín chai Chú ê Ji̍t teh-beh kàu, koh-khah tio̍h án-ni.

26Lán jīn-bat chin-lí í-āu iáu kò͘-ì hoān-chōe, chiū bô koh ū thang sio̍k-chōe ê chè-mi̍h,

27chí-ū ēng kiaⁿ-hiâⁿ ê sim thèng-hāu sím-phòaⁿ kap teh-beh sio-bia̍t te̍k-tùi Siōng-tè ê lâng ê lia̍t-hé.

28Ûi-hoān Mô͘-se ê Lu̍t-hoat--ê, kun-kù nn̄g ê á-sī saⁿ ê lâng choh-chèng chiū thang kā i chhú-sí, lóng bô khoan-sià.

29Án-ni, thún-ta̍h Siōng-tè ê Kiáⁿ, biáu-sī hō͘ in sèng-hòa kui Chú ê iok ê huih, koh bú-bān si-un ê Sèng Sîn ê lâng, lín siūⁿ in eng-kai siū ê hêng-hoa̍t ōe ke jōa tāng?

30Lán chai, kóng “Sin-oan chāi-tī góa, góa ōe pò-èng”, koh kóng “Chú beh sím-phòaⁿ I ê chú-bîn” hit-ūi sī sím-mi̍h-lâng?

31Hām-lo̍h éng-oa̍h Siōng-tè ê chhiú si̍t-chāi chin thang kiaⁿ!

32Lín tio̍h ōe-kì-tit kè-khì ê ji̍t-chí. Lín siū Siōng-tè ê kng chiò í-āu, ū jím-siū tōa cheng-tò͘ ê khó͘-lān;

33ū sî lín kong-jiân siū bú-jio̍k, ge̍k-thāi; ū sî lín kap pa̍t-lâng tâng siū ge̍k-thāi.

34Lín kap siû-hoān tâng siū-khó͘; lín ê châi-bu̍t siū chhiúⁿ-toa̍t mā kam-goān jím-siū, in-ūi chai lín ka-kī ū koh-khah hó koh éng-oán chûn-chāi ê sán-gia̍p.

35Só͘-í, m̄-thang sit-lo̍h ióng-khì; chit-ê ióng-khì ōe hō͘ lín tōa ê pò-siúⁿ.

36Lín tio̍h ū nāi-sim chiah ōe-tàng si̍t-hêng Siōng-tè ê chí-ì, niá-siū I só͘ èng-ún ê hok-hūn.

37In-ūi koh chi̍t-sî-á kú,

Hit-ūi teh-beh-lâi--ê ōe kàu, bōe iân-tî.

38M̄-kú sio̍k góa ê gī-lâng ōe tùi sìn lâi oa̍h.

Nā ū lâng tiû-tû thè-āu, góa chiū bô kah-ì.

39Lán leh, lán m̄-sī thè-āu tì-kàu tîm-lûn, sī tùi sìn tì-kàu sìⁿ-miā tit-tio̍h pó-choân.

Hi-pek-lâi-su 10 - 現代台語譯本羅馬字版(TTVR)-闽南语

Learn More About Us