Hô-se-a-su 14 - 現代台語譯本羅馬字版(TTVR)-闽南语

Í-sek-lia̍t Tio̍h Hôe-kui Siōng Chú

1 Í-sek-lia̍t ah, lí ê chōe ū hō͘ lí poa̍h-tó,

tio̍h oa̍t-thâu kui-ǹg Siōng Chú — lí ê Siōng-tè;

2Tio̍h tò-tńg-lâi kui Siōng Chú,

kā beh kóng ê ōe chún-pī hó-sè;

tio̍h tùi I kóng, “Kiû lí sià-bián goán lóng-chóng ê chōe,

ēng un-tián chiap-la̍p goán,

goán chiū ēng chheng-chàn tāi-thòe seng-lé.

3 A-su̍t bōe-tàng kiù goán;

goán bô beh koh khiâ-bé chhut-chiàn,

bô beh koh tùi goán chō ê ngó͘-siōng kóng,

‘Lí sī goán ê Siōng-tè.’

In-ūi goán chiah-ê chòe ko͘-jî--ê chí-ū ōe-tàng tùi lí tit-tio̍h lîn-bín.”

Èng-ún Í-sek-lia̍t Sin Sìⁿ-miā

4Siōng Chú kóng:

Góa beh i-hó Í-sek-lia̍t ê pōe-poān,

chīn-chêng thiàⁿ in,

in-ūi góa í-keng tùi in soah góa ê siū-khì.

5Góa beh chhin-chhiūⁿ kam-lō͘ kàng-lo̍h hō͘ Í-sek-lia̍t,

in chiū chhin-chhiūⁿ pek-ha̍p-hoe khui-hoe,

chhin-chhiūⁿ Lê-pa-lūn ê pek-hiuⁿ-chhiū tèng-kun.

6In ê ki chhun-tn̂g,

ōe bō͘-sēng chhin-chhiūⁿ kaⁿ-ná-chhiū;

in ê phang-bī chhin-chhiūⁿ Lê-pa-lūn ê pek-hiuⁿ-chhiū.

7In ōe tò-tńg-lâi tiàm tī góa ê ìm-ńg-ē,

ōe chhin-chhiūⁿ ngó͘-kok seng-tióng,

phû-tô-chhiū khui-hoe;

in ê hó miâ-siaⁿ chhin-chhiūⁿ Lê-pa-lūn ê chiú.

8 Í-sek-lia̍t ah, góa kap ngó͘-siōng ū sím-mi̍h koan-hē?

Góa beh ìn-tap lín, khòaⁿ-kò͘ lín,

beh chhin-chhiūⁿ chhiⁿ-chhùi ê siông-chhiū tì-ìm lín.

Góa sī it-chhè hok-khì ê goân-thâu.

9Ū tì-hūi ê lâng ōe bêng-pe̍k chiah-ê sū.

Bêng-lí ê lâng ōe liáu-kái chiah-ê it-chhè.

Siōng Chú ê tō-lō͘ chèng-ti̍t;

gī-lâng it-tēng ōe kiâⁿ chiah-ê lō͘,

m̄-kú pōe-ge̍k ê lâng ōe tī chiah-ê lō͘ poa̍h-tó.

Learn More About Us