Iâ-lī-bí-su 18

Iâ-lī-bí-su 18 - 現代台語譯本羅馬字版(TTVR)-闽南语

Iâ-lī-bí tī Sio-hûi-lâng ê Chhù

1Siōng Chú tùi Iâ-lī-bí kóng,

2“Lí khì sio-hûi-lâng ê chhù, góa beh tī hia tùi lí kóng-ōe.”

3Góa chiū khì sio-hûi-lâng ê chhù, khòaⁿ-tio̍h i teh se̍h tńg-pôaⁿ chòe hûi-khì.

4I chhiú-tiong só͘ chòe ê hûi, chòe bô hó-sè, chiū ēng hit-tè hûi-thô͘ lēng-gōa chòe i kah-ì ê hûi-khì.

5Siōng Chú koh tùi góa kóng,

6“Í-sek-lia̍t-ke ah, góa kiám bōe-tàng chhin-chhiūⁿ sio-hûi-lâng án-ni tùi-thāi lín? Hûi-thô͘ tī sio-hûi-lâng ê chhiú--ni̍h án-chóaⁿ, lín tī góa ê chhiú--ni̍h mā siâng-khoán.

7Bô-lūn sím-mi̍h sî, góa soan-pò͘ beh pu̍ih-chhut, thiah-húi, á-sī phò-hoāi chi̍t ê kok-ka,

8hit-ê kok-ka nā lī-khui siâ-ok, góa chiū ōe hôe-sim-tńg-ì, bô kàng chai-hō hō͘ in.

9Bô-lūn sím-mi̍h sî, góa soan-pò͘ beh chai-chèng, tiông-kiàn chi̍t ê kok-ka,

10hit-ê kok-ka nā m̄ thiaⁿ-thàn góa ê ōe, chòe góa khòaⁿ-chòe pháiⁿ ê sū, góa chiū ōe kái-piàn sim-ì, bô beh chiong góa só͘ èng-ún ê hok-khì sù hō͘ in.

11Taⁿ, lí tio̍h tùi Iû-tāi-lâng kap Iâ-lō͘-sat-léng ê chū-bîn kóng, ‘Siōng Chú án-ni kóng: Góa koat-tēng beh chhú-hoa̍t lín, kàng chai-hō hō͘ lín; lín tio̍h hôe-thâu lī-khui lín siâ-ok ê hêng-ûi, kái-chèng lín ê só͘-kiâⁿ-só͘-chòe.

12In ōe ìn kóng: Lí kóng che bô lō͘-ēng lah! Goán beh chiàu ka-kī ê kè-ōe kiâⁿ, ta̍k-ê lâng chiàu siâ-ok ê pún-sèng chòe.’”

Í-sek-lia̍t-lâng Khì-sak Siōng Chú

13Siōng Chú án-ni kóng,

“Lín mn̄g chiah-ê kok-ka,

ū sím-mi̍h-lâng thiaⁿ-kè chit-khoán tāi-chì?

Í-sek-lia̍t kèng-jiân chòe chiah-ni̍h khó-ò͘ⁿ ê sū!

14 Lê-pa-lūn soaⁿ-téng ê seh kiám bat iûⁿ--kè?

Soaⁿ-téng lâu--lo̍h-lâi chheng-liâng ê khoe-chúi kiám ōe ta--khì?

15M̄-kú, góa ê jîn-bîn bōe-kì-tit góa,

kā hu-ké ê sîn-bêng sio-hiuⁿ,

tì-kàu in tī eng-kai kiâⁿ ê lō͘ poa̍h-tó;

in bô kiâⁿ kó͘-chá ê chiàⁿ-lō͘,

tian-tò khì kiâⁿ khâm-khia̍t oai-chhoa̍h ê lō͘.

16In ê thó͘-tōe pìⁿ-chòe pha-hng ê só͘-chāi,

éng-oán hō͘ lâng thí-chhiò;

kè-lō͘ ê lâng lóng kiaⁿ-hiâⁿ hàiⁿ-thâu.

17Góa beh tī tùi-te̍k ê bīn-chêng

chhin-chhiūⁿ tang-hong kā góa ê chú-bîn chhe-sòaⁿ;

góa beh tī in tú-tio̍h chai-lān ê sî,

oa̍t-tńg-sin m̄ chhap in.”

Bô͘-hāi Iâ-lī-bí

18In kóng, “Lâi, lán lâi siat-kè tùi-hù Iâ-lī-bí! Lán put-sî ū chè-si kà lu̍t-hoat, ū tì-hūi ê lâng chhut kè-tì, mā ū sian-ti thoân-ta̍t Siōng-tè ê ōe. Lán lâi khòng-kò Iâ-lī-bí, mài koh thiaⁿ i ê ōe.”

19In-ūi án-ni, góa kî-tó kóng, “Siōng Chú ah, kiû lí thiaⁿ góa ê khún-kiû, mā thiaⁿ góa ê tùi-te̍k khòng-kò góa ê ōe.

20Lâng kiám ōe-ēng-tit ēng pháiⁿ pò hó? In ó͘ hām-chíⁿ beh hāi góa. Kiû lí ōe-kì-tit góa án-chóaⁿ tī lí ê bīn-chêng thòe in kóng hó-ōe, hō͘ lí bô tùi in hoat siū-khì.

21M̄-kú, chit-sî góa kiû lí hō͘ in ê jî-lú tú-tio̍h ki-hng, sí tī to-kiàm; hō͘ in ê bó͘ sit-khì tiōng-hu kap kiáⁿ-jî, ta-po͘-lâng hō͘ lâng thâi-sí, siàu-liân-lâng sí tī chiàn-tiûⁿ.

22Kiû lí phài chi̍t tōa-tīn kiông-tō hut-jiân lâi kàu, hō͘ kiaⁿ-hiâⁿ thî-khàu ê siaⁿ tùi chhù-lāi thoân--chhut-lâi; in-ūi in ó͘ hām-chíⁿ beh lia̍h góa, ēng lô-bāng beh hō͘ góa poa̍h-tó.

23Siōng Chú ah, lí chai in siat-kè beh thâi góa, kiû lí m̄-thang sià-bián in ê chōe, m̄-thang chhat-siau in ê chōe-kò; kiû lí hō͘ in tī lí ê bīn-chêng sit-pāi kiàn-siàu; kiû lí hoat tōa siū-khì kā in hêng-hoa̍t.”

Iâ-lī-bí-su 18 - 現代台語譯本羅馬字版(TTVR)-闽南语

Learn More About Us