Chim-giân 2 - 現代台語譯本羅馬字版(TTVR)-闽南语

Tì-hūi ê Pò-siúⁿ

1Góa ê kiáⁿ ah, lí nā chiap-siū góa ê ōe,

chiong góa ê bēng-lēng khǹg tī sim-lāi,

2chù-ì thiaⁿ tì-hūi,

choan-sim kiû chhong-bêng;

3lí nā kiû bêng-lí,

tōa-siaⁿ kiû chhong-bêng;

4nā chhē i chhin-chhiūⁿ chhē gûn,

chhiau-chhē i chhin-chhiūⁿ chhiau-chhē chhàng--teh ê pó-pòe;

5lí chiū bêng-pe̍k beh án-chóaⁿ kèng-ùi Siōng Chú,

chai beh án-chóaⁿ jīn-bat Siōng-tè.

6In-ūi Siōng Chú sù tì-hūi;

chai-bat kap chhong-bêng lóng tùi I ê chhùi chhut.

7I ūi-tio̍h chèng-ti̍t ê lâng chek-chū chin ê tì-hūi,

pó-hō͘ hêng-ûi toan-chèng ê lâng.

8I pó-siú chèng-ti̍t ê lâng ê lō͘,

pó-hō͘ tùi I tiong-sìn ê lâng ê tō-lō͘.

9Án-ni, lí chiū bêng-pe̍k kong-gī, kong-chèng, kong-pêng,

chiū-sī chhōa lâng kàu it-chhè liông-siān ê lō͘.

10Tì-hūi ōe ji̍p lí ê sim;

tì-sek ōe hō͘ lí ê sim-sîn hoaⁿ-hí.

11Chhek-lio̍k ōe pó-hō͘ lí;

chhong-bêng ōe pó-siú lí,

12kiù lí lī-khui pháiⁿ-lō͘,

thoat-lī oai-khiok sī-hui ê lâng.

13Hit-khoán lâng khì-sak chèng-ti̍t ê lō͘,

kiâⁿ o͘-àm ê tō-lō͘.

14In ài chòe pháiⁿ,

ì-ài pháiⁿ-lâng ê oai-khiok.

15In ê lō͘ oan-khiau,

in ê só͘-kiâⁿ phian-lī chiàⁿ-lō͘.

16Tì-hūi ōe hō͘ lí siám-pī îm-hū,

siám-pī kóng sai-nai-ōe ê ki-lú.

17I khì-sak siàu-liân ê sî ê phit-phòe,

bōe-kì-tit i ê Siōng-tè ê iok.

18Lí ji̍p i ê chhù chiū kiâⁿ-ji̍p sí-lō͘,

kiâⁿ i ê lō͘ chiū thàng kàu Im-hú.

19Kàu i hia--ê, bô chi̍t ê ōe-tàng oa̍t tò-tńg,

bô chi̍t ê ōe koh kiâⁿ tńg-lâi oa̍h-miā ê lō͘.

20Án-ni, tì-hūi ōe hō͘ lí kiâⁿ hó-lâng ê lō͘,

chhî-siú gī-lâng ê tō-lō͘.

21Chèng-ti̍t ê lâng ōe khiā-khí tī èng-ún ê thó͘-tōe;

bô thang chí-chek ê lâng ōe lâu tī hia.

22M̄-kú pháiⁿ-lâng ōe tùi tōe-bīn siau-bia̍t,

kan-chà ê lâng ōe tùi tōe-chiūⁿ liân kun khau hiat-ka̍k.

Learn More About Us