Chim-giân 23

Chim-giân 23 - 現代台語譯本羅馬字版(TTVR)-闽南语

1Lí nā kap koaⁿ-tiúⁿ chē-toh, tio̍h chù-ì tī lí bīn-chêng--ê sī sím-mi̍h-lâng.

2Lí ūi-kháu nā hó, tio̍h ōe-hiáu ka-kī iok-sok.

3M̄-thang tham mi̍h-kiāⁿ hó-chia̍h, in-ūi he sī teh pián--lâng ê chia̍h-mi̍h.

4M̄-thang thoa-bôa kiû hó-gia̍h, tio̍h ū tì-hūi ka-kī iok-sok.

5Lí ba̍k-chi̍t-ē-nih, chîⁿ-châi chiū bô--khì, in-ūi i ōe hoat-si̍t, chhin-chhiūⁿ eng-chiáu pe-chiūⁿ thiⁿ.

6M̄-thang chia̍h tàng-sng ê lâng ê pn̄g, mā m̄-thang tham i ê hó chia̍h-mi̍h.

7I chin gâu sǹg, bōe hō͘ lí pe̍h-pe̍h-chia̍h. I sui-jiân tùi lí kóng “Chhiáⁿ chia̍h, chhiáⁿ lim”, kî-si̍t i sim-lāi bô teh án-ni siūⁿ.

8Lí só͘ chia̍h hit-tiám-á mā tio̍h thò͘--chhut-lâi; lí só͘ kóng ê hó-ōe lóng bô lō͘-ēng.

9M̄-thang kóng-ōe hō͘ gōng-lâng thiaⁿ, i ōe khòaⁿ-khin lí tì-hūi ê ōe.

10M̄-thang î-sóa chá-chêng só͘ li̍p ê tōe-kài, mā m̄-thang chhim-chiàm ko͘-jî ê chhân-hn̂g.

11In-ūi in ê Sio̍k-hôe-chiá Siōng Chú tōa ū lêng-le̍k, I ōe thòe in sin-oan.

12Tio̍h choan-sim niá-siū kà-sī, àⁿ hī-khang thiaⁿ tì-sek ê ōe.

13Gín-á m̄-thang bô koán-kàu; ēng chhê-á phah, bōe tì-kàu sí.

14Lí ēng chhê-á phah, ōe kiù i bián lo̍h Im-hú.

15Góa ê kiáⁿ ah, lí ê sim nā ū tì-hūi, góa ê sim ōe chin hoaⁿ-hí.

16Lí ê chhùi nā kóng chèng-ti̍t, góa ê sim ōe chin khoài-lo̍k.

17M̄-thang him-siān pháiⁿ-lâng, tio̍h put-sî kèng-ùi Siōng Chú,

18chiong-lâi it-tēng ū ǹg-bāng, lí ê ǹg-bāng bōe bô--khì.

19Góa ê kiáⁿ ah, tio̍h thiaⁿ, tio̍h ū tì-hūi, hō͘ lí ê sim ǹg chèng-ti̍t ê lō͘.

20Hò͘ⁿ-chiú--ê, tham-chia̍h--ê, m̄-thang kap in óng-lâi chòe-tīn,

21in-ūi hò͘ⁿ-chiú tham-chia̍h, ōe tì-kàu sàn-chhiah; kui-ji̍t teh khùn, ōe tì-kàu chhēng phòa-saⁿ.

22Tio̍h thiaⁿ-thàn siⁿ lí ê lāu-pē; lí ê lāu-bú lāu ê sî mā m̄-thang kā i khòaⁿ-khin.

23Tio̍h bóe chin-lí, m̄-thang bōe; mā tio̍h bóe tì-hūi, kà-sī, kap bêng-lí.

24Chèng-ti̍t-lâng ê lāu-pē ōe tōa khoài-lo̍k; lâng siⁿ-tio̍h tì-hūi ê kiáⁿ ōe in-ūi i tōa hoaⁿ-hí.

25Tio̍h hō͘ lí ê pē-bú hoaⁿ-hí, hō͘ siⁿ lí ê lāu-bú khoài-lo̍k.

26Góa ê kiáⁿ ah, tio̍h chiong lí ê sim kau-thok góa, ba̍k-chiu tio̍h chù-ì khòaⁿ góa ê tō-lō͘.

27In-ūi chhiong-ki sī Chhim-khiⁿ, îm-hū sī hām-chíⁿ.

28I chhin-chhiūⁿ chha̍t teh tng-tán, beh hō͘ bô tiong-si̍t ê lâng cheng-ka.

29Siáⁿ-lâng teh hoah “chhám ah”? Siáⁿ-lâng teh hoah “hāi ah”? Siáⁿ-lâng teh oan-ke? Siáⁿ-lâng teh oàn-thàn? Siáⁿ-lâng bô iân-kò͘ siū siong? Siáⁿ-lâng ba̍k-chiu teh khí ian-n̄g?

30Chiū-sī lim-chiú m̄-chai soah, sì-kòe chhē tiâu-hô ê chiú lim hit-khoán lâng.

31-32Chiú tī poe-lāi pìⁿ âng siám-sih, lí m̄-thang khòaⁿ; lim ê sî ku̍t-âu, kàu-bé chhin-chhiūⁿ hō͘ chôa kā--tio̍h, hō͘ to̍k-chôa tok--tio̍h.

33Lí ê ba̍k-chiu ōe khòaⁿ-tio̍h kî-koài ê kéng-siōng; lí ê sim ōe chhò-loān, chhùi kóng chiú-ōe.

34Lí ōe chhin-chhiūⁿ tó tī hái-tiong, khùn tī chûn-thiāu-téng.

35Lí ōe kóng, “Lâng phah góa, góa bōe thiàⁿ; lâng kòng góa, góa m̄-chai thiàⁿ; góa chhíⁿ--khí-lâi chiū koh khì chhē chiú lim.”

Chim-giân 23 - 現代台語譯本羅馬字版(TTVR)-闽南语

Learn More About Us