Si-phian 145 - 現代台語譯本羅馬字版(TTVR)-闽南语

Tāi-pi̍t o-ló ê si.Siōng-chàn ê Si

1Góa ê Siōng-tè góa ê Ông ah, góa beh chun lí chòe chì-koân;

góa beh éng-éng-oán-oán chheng-chàn lí ê miâ.

2Góa beh ji̍t-ji̍t chheng-chàn lí,

beh éng-oán o-ló lí ê miâ.

3Siōng Chú chì-tōa, eng-kai siū tōa chheng-chàn;

I ê úi-tāi bô hoat-tō͘ chhek-to̍k.

4Chit-tāi beh tùi hit-tāi chheng-chàn lí ê chok-ûi,

beh pò-iông lí tōa koân-lêng ê só͘-chòe.

5Lâng beh kóng-khí lí chun-kùi êng-kng ê ui-giâm;

góa beh siàu-liām lí kî-biāu ê chok-ûi.

6Lâng beh kóng-khí lí thang kiaⁿ-ùi ê tōa koân-lêng;

góa beh pò-iông lí úi-tāi ê chok-ûi.

7In beh pò-iông lí ke̍k-tōa ê un-hūi,

beh chhiùⁿ-koa o-ló lí ê kong-gī.

8Siōng Chú ū un-hūi, ū lîn-bín,

bô khoài siū-khì, ū tōa chû-ài.

9Siōng Chú thiàⁿ-sioh bān-iú;

I ê lîn-bín phó͘-ki̍p I só͘ chō ê it-chhè.

10Siōng Chú ah, lí só͘ chō ê it-chhè beh kám-siā lí;

lí sèng ê chú-bîn mā beh chheng-chàn lí.

11In beh kóng-khí lí kok-tō͘ ê êng-kng,

tâm-lūn lí ê tōa koân-lêng,

12thang hō͘ sè-kan-lâng chai lí tōa koân-lêng ê chok-ûi,

chai lí kok-tō͘ ê ui-giâm kap êng-kng.

13Lí ê kok-tō͘ éng-oán chûn-chāi;

lí chip-chiáng ê koân-pèng sòa kàu bān-tāi.

Siōng Chú it-chhè ê èng-ún sìn-si̍t khó-khò;

I thiàⁿ-sioh I só͘ chō ê it-chhè.

14Poa̍h-tó sit-pāi ê lâng, Siōng Chú hû-chhî in;

siū ap-chè ê lâng, I hû in khí--lâi.

15Só͘-ū ê oa̍h-mi̍h lóng gióng-bōng lí;

lí chiàu-sî hō͘ in chia̍h-mi̍h.

16Lí thí-khui chhiú,

hō͘ só͘-ū ê oa̍h-mi̍h lóng chiàu só͘ ài tit-tio̍h pá-chiok.

17Siōng Chú it-chhè ê só͘-chòe lóng kong-chèng;

I ê chok-ûi chhiong-móa jîn-chû.

18Só͘-ū kiû-kiò Siōng Chú ê lâng, I kap in chhin-kūn;

I chhin-kūn sêng-si̍t kiû-kiò I ê lâng.

19Kèng-ùi I ê lâng, I ōe hō͘ in ê sim-goān si̍t-hiān,

koh ōe thiaⁿ in ê kiû-kiò, lâi chín-kiù in.

20Siōng Chú pó-hō͘ só͘-ū thiàⁿ I ê lâng;

m̄-kú chòe pháiⁿ ê lâng, I ōe kā in siau-bia̍t.

21Góa ê chhùi beh kóng-chhut chheng-chàn Siōng Chú ê ōe;

goān it-chhè ū sìⁿ-miā--ê, lóng éng-éng-oán-oán chheng-chàn I ê sèng-miâ.

Learn More About Us