Si-phian 41 - 現代台語譯本羅馬字版(TTVR)-闽南语

Tāi-pi̍t ê si, kau hō͘ sèng-ga̍k-tiúⁿ.Phòa-pīⁿ ê Sî ê Kî-tó

1Khòaⁿ-kò͘ sàn-chhiah-lâng ê lâng chin ū hok-khì!

Tī hoān-lān ê ji̍t, Siōng Chú ōe kiù i.

2Siōng Chú ōe pó-siú i ê sìⁿ-miā,

hō͘ i tī tōe-chiūⁿ hióng-hok,

bōe chiàu tùi-te̍k ê sim-goān chiong i kau hō͘ in.

3I tó tī pīⁿ-chhn̂g, Siōng Chú ōe hû-chhî i;

i phòa-pīⁿ ê sî, Siōng Chú ōe hō͘ i koh peh--khí-lâi.

4Góa bat kóng, “Siōng Chú ah, góa ū tek-chōe lí,

kiû lí lîn-bín góa, i-tī góa.”

5Góa ê tùi-te̍k ēng pháiⁿ-ōe gī-lūn góa, kóng,

“I tī-sî ōe sí, i ê miâ tī-sî ōe siau-sit?”

6In lâi khòaⁿ góa lóng kóng pe̍h-chha̍t-ōe;

in sim chûn kan-ok,

chi̍t-ē chhut--khì chiū sì-kòe kā lâng kóng.

7Só͘-ū oàn-hūn góa ê lâng chhi-bú-chhi-chhū gī-lūn góa;

in siat kè-bô͘ beh hāi góa.

8In kóng, “I ê seng-khu ū tì-tio̍h choa̍t-chèng,

í-keng tó-chhn̂g bōe koh khí--lâi.”

9Góa só͘ sìn-jīm, chia̍h góa ê pn̄g, ti-kí ê pêng-iú,

kèng-jiân gia̍h kha that góa.

10Siōng Chú ah, kiû lí lîn-bín góa,

hō͘ góa koh peh khí-lâi pò-ho̍k in.

11Góa ê tùi-te̍k bōe iâⁿ góa,

góa chiū chai lí ì-ài góa.

12In-ūi góa sûn-choân chèng-ti̍t, lí ōe hû-chhî góa,

hō͘ góa éng-oán khiā tī lí ê bīn-chêng.

13Goān chheng-chàn kui hō͘ Siōng Chú — Í-sek-lia̍t ê Siōng-tè,

tùi éng-oán kàu éng-oán!

Amen! Amen!

Learn More About Us